ەلىمىزدە 1 ناۋرىز – «العىس ايتۋ كۇنى» بولىپ 2016 جىلدان باستاپ اتاپ وتىلۋدە. مەن دە وسى كۇننىڭ قارساڭىندا وتكەنگە وي جىبەرىپ, جەكە ازامات رەتىندە ءوزىمنىڭ العىسىمدى ۇشكە ءبولىپ ايتقىم كەلەدى.
ەڭ الدىمەن, بيىلعى قاڭتار ايىنىڭ باسى حالقىمىزعا قيىن بولدى. ەل باسىنا قاتەر توندىرگەن سىندارلى ساتتە, ەل تاۋەلسىزدىگى سىنعا تۇسكەن شاقتا تاباندىلىق تانىتقان, تۇراقتىلىقتى ساقتاپ قالعان مەملەكەت باسشىسى قاسىم-جومارت توقاەۆقا العىس ايتقىم كەلەدى. ءبىز بۇل كۇندەردىڭ قانشالىقتى كۇردەلى بولعانىن ءالى تۇسىنبەۋىمىز مۇمكىن. سوعان قاراماستان, قاڭتاردىڭ قاندى جاراسى جازىلىپ كەلەدى, ەل تۇرمىسى قالىپتى ىرعاعىنا ءتۇستى. الەمدەگى, جاقىن كورشىلىلەرىمىزدەگى سوڭعى وقيعالاردى كورە وتىرىپ, ەل تىنىشتىعى ەڭ باستى بايلىق ەكەنىنە كوزىمىز جەتە ءتۇستى.
ەكىنشىدەن, مەن ءوزىمدى دۇنيەگە اكەلگەن, تاربيە بەرگەن, ءبىلىم بەرگەن اتا-اناما العىس ايتامىن. ولار ءبىزدى – قارىنداسىم ەكەۋمىزدى قاتارىمىزدان قالدىرماۋ ءۇشىن بىرنەشە قىزمەتتى قوسا اتقارىپ, تىنىمسىز ەڭبەك ەتتى. مەن جوعارى زاڭگەرلىك ءبىلىم الدىم, قارىنداسىم ءۇش ماماندىقتى يگەردى. مەنىڭ تاربيەمە ءوزىمنىڭ اجەم, اتاقتى پارتيزان قازاق قىزى نۇرعانىم بايسەيىتوۆا ەرەكشە اسەر ەتكەنىن ايتا كەتەيىن. كىشكەنتايىمنان اجەم مەنى مەيىرىمدىلىككە, تاباندىلىققا, يماندىلىققا تاربيەلەدى. ولارعا العىسىم شەكسىز!
ۇشىنشىدەن, حالقىما راحمەت! بۇل – قۇر پافوس ءسوز ەمەس. سوڭعى التى جىل ىشىندە قايىرىمدىلىقپەن, ەرىكتىلىك ىسىمەن تۇراقتى شۇعىلدانىپ كەلەمىز. ءبىز اتقارعان يگىلىكتى ىستەر باتىس قازاقستان وبلىسىنىڭ ىشىندە عانا ەمەس, بۇكىل قازاقستانعا بەلگىلى. قانداي دا ءبىر ماسەلە كوتەرىپ, مۇقتاج جاندارعا اكتسيا جاريالاعان كەزدە حالىق جان-جاقتان قاۋمالاپ, كومەك قولىن سوزا كەتەدى. كۇنى كەشە عانا تەرەكتى اۋدانىنا قاراستى پودستەپنوە اۋىلىندا ءبىر وتباسىنا, اپامىزعا كومەكتەستىك. ول ۇيدە اۋىز سۋ بولماعان ەدى. وسى جاعداي جاريالانعان ساتتە قايىرىمدى جانداردىڭ ءبىرى تۇربا بەردى, ءبىرى تەحنيكامەن كومەكتەستى. ءسويتىپ, اپايدىڭ اۋلاسىنان قۇدىق قازىپ بەردىك. جينالعان ارتىق اقشاعا قولجۋعىش, ازىق-ت ۇلىك, ءدارى-دارمەك سەكىلدى كەرەك-جاراعىن الدىق. ءبىر كاسىپكەر ول ءۇيدىڭ كىلەمىن تەگىن جۋىپ بەردى.
جاقىندا, 22 اقپاندا ۆايناح حالقىنىڭ دەپورتاتسياسى كۇنىنە وراي ورال قالاسىندا تۇراتىن شەشەن حالقىنىڭ وكىلدەرى 40 وتباسىنا ازىق-ت ۇلىك كومەگىن كورسەتتى. ءبىز وبلىستىق مەشىتپەن بىرلەسىپ, از قامتىلعان وتباسىلارىنا ۇلەستىردىك.
ايتا كەتەيىك, مۇنداي قايىرىمدىلىق ىستەرىنە مەملەكەتتىك قۇرىلىمدار ۇنەمى كومەكتەسەدى. ءبىزدىڭ جۇمىسىمىز ءاردايىم كوپپەن بىتەتىن ىستەر عوي. قانداي باستاما بولماسىن, مەملەكەتتىك قۇرىلىمدار, اكىمدىكتەر ۇنەمى جاردەم بەرەدى, الدىمىزدان شىعادى. مىسالى, جاقىندا از قامتىلعان ءبىر وتباسىنا سۋ قۇبىرىن جەتكىزۋگە باتىس سۋ ارناسى مەكەمەسى كومەكتەستى. مۇنداي مىڭداعان مىسالدى ايتىپ بەرە الامىن.
جەتىمدى جىلاتپاۋ, مۇقتاجعا كومەكتەسۋ – ادامزات بالاسىنىڭ بارلىعىنا ورتاق اسىل قاسيەت. ىزگى ىستەر دە, شىنايى العىس تا جومارت جۇرەكتەن شىعادى, جىلى جۇرەكتەن تارالادى. وزگەنىڭ قاسىرەتىن ءوز جۇرەگىنەن وتكىزەتىن جاندار اينالامىزدا كوپ بولسىن! قاسيەتتى قازاقستانىمىز, ورتاق وتانىمىز امان بولسىن!
تالعات چۋدوباەۆ,
باتىس قازاقستان وبلىستىق قحا ەرىكتىلەر ورتالىعىنىڭ جەتەكشىسى
باتىس قازاقستان وبلىسى
