امانات – قاسيەتتى, سالماعى مەن جاۋاپكەرشىلىگى اۋىر ۇعىم. بابام قازاق كۇندەلىكتى ومىردە «امانات» ءسوزىن قالاي بولسا سولاي, قيساپسىز قولدانا بەرمەگەن. سەبەبى بۇل ءسوزدىڭ ارتىندا ايتقان ادامعا دا, ايتىلعان ادامعا دا سالماعى مەن جاۋاپكەرشىلىگى, سۇراۋى بار ەكەنىن جاقسى سەزىنگەن.
ءبىز ءۇشىن ەلدىڭ بىرلىگى مەن جەردىڭ تۇتاستىعى – امانات! سان عاسىر اڭساپ جەتكەن تاۋەلسىزدىگىمىز – امانات! ءتىلىمىزدى, ءدىنىمىزدى, ءداستۇر-سالتىمىزدى بۇزباي تازا ۇستاۋ – امانات! جاس ۇرپاققا دۇرىس تاربيە بەرۋ, وتانىن, ۇلتىن سۇيۋگە باۋلۋ – امانات!
جەر تاعدىرى – ەلگە امانات, ەل تاعدىرى – كوش باستاعان ەرلەرگە امانات! ال اق جاۋلىقتى انانىڭ, اق ساقالدى اكەنىڭ, اق پەيىلدى بالانىڭ اماناتى قاشاندا بيلىكتىڭ موينىندا. امانات قيانات جاساماۋ – ساياسي ۇيىمنىڭ ەڭ باستى پارىزى. ەندەشە, حالىق اماناتىنا ادال بولۋ – Amanat پارتياسىنىڭ ەڭ نەگىزگى ۇستانىمى بولۋى شارت.
پرەزيدەنت ايتقانداي, Amanat ساياسي قۇرىلىمى ەل مۇددەسىن قورعايتىن ناعىز حالىقشىل پارتيا بولۋى كەرەك. پارتيا حاتشىسى اسحات ورال ۇلىنىڭ بايانداماسىندا كورسەتىلگەن ساياسي قۇرىلىمدى مودەرنيزاتسيالاۋ باعدارلاماسى بولاشاقتا وڭ ناتيجەلەرگە قول جەتكىزگەنىن تىلەيمىز.
پارتيا يگىلىكتى جەڭىستەر مەن جەتىستىكتەرگە, سەنىمگە يە بولۋ ءۇشىن جالعان پافوس پەن ماقتانشاقتىقتان, قۇرعاق ۋادەدەن اۋلاق بولۋعا ءتيىس. Amanat پارتياسى – ادىلەتتىلىك پەن شىنايىلىقتىڭ شىراقشىسى بولسىن. بيلىك الدىندا تالاپشىل, حالىق الدىندا قامقورشى كەلبەتىمەن قۋانتسىن.
جاڭا قازاقستاننىڭ كەمەلدەنۋى جولىندا ناقتى ناتيجەلەرگە قول جەتكىزسىن. تارتىسقا تولى ساياسات الاڭىندا ەل اماناتىنا ادال بولسىن!
امانجول ءالتاي,
ايتىسكەر اقىن
