وسى ورايدا ءبىز قىزىلوردا وبلىسى م.شامەنوۆ اتىنداعى اۋىل تۇرعىندارىنىڭ «سالاماتتى اۋىل» اتتى جاڭا سپورت ورتالىعىن قالاي اشقانى تۋرالى ءسوز ەتپەكپىز.
جاڭا نىساندى اشۋ جونىندەگى باستامانى قۇرامىندا ءساتباي سەرالى ۇلى, يساتاي ەرباتىر, ناربوتا سەرالى بار توپ جۇزەگە اسىرا ءبىلدى.
جىگىتتەرگە باستامانى جۇزەگە اسىرۋعا اقپارات جانە قوعامدىق دامۋ مينيسترلىگىنىڭ تاپسىرىسى بويىنشا بولىنگەن شاعىن گرانت كومەكتەستى.
«سپورت ورتالىعىنىڭ نەمەسە كلۋبتىڭ پايدا بولۋىن ءبىزدىڭ اۋىلدىڭ بارلىق تۇرعىندارى ارماندادى. ءبىز ونى اشقان كەزدە, مۇنداي وقيعاعا بارلىعىنىڭ قانشالىقتى قۋانعانىن بايقادىق. ويتكەنى بىزدە بۇدان بۇرىن جاستاردىڭ بوس ۋاقىتىن وتكىزەتىن جەرى جوق ەدى. سونىمەن قاتار ءبىز وسكەلەڭ ۇرپاقتىڭ ۋاقىتتى پايدالى وتكىزگەنىن قالايمىز, ولار سپورتپەن شۇعىلدانىپ, سالاماتتى ءومىر سالتىن ۇستانسا دەيمىز. دەنى ساۋ ۇلت قانا باسەكەگە قابىلەتتى بولا الاتىنى بەلگىلى. اۋىلدا تۇراتىن جاستار دا بۇدان تىس قالماۋى كەرەك. ءبىز جاس ۇرپاقتىڭ دۇرىس جولدى تاڭداعانىن قالايمىز», دەيدى ءساتباي سەرالى ۇلى.
جاستار وزدەرىنىڭ ۇلگىسىمەن اۋىلداستارىنا بۇگىنگى تاڭدا ماقساتتى جۇزەگە اسىرۋ ءۇشىن نيەت پەن تاباندىلىق جەتكىلىكتى ەكەنىن كورسەتتى.
وتكەن جىلى قازاقستاندا «اۋىلداعى ازاماتتىق باستامالاردى دامىتۋعا باعىتتالعان ءىس-شارالار كەشەنىن ۇيىمداستىرۋ» جوباسى ىسكە اسىرىلعان بولاتىن.
جوبا اياسىنداعى بارلىق ۇزدىك باستامالار گرانتتىق قولداۋ ارقىلى جۇزەگە استى. وسىنداي جوبالاردىڭ ءبىرى – قىزىلوردا وبلىسى جالاعاش اۋدانىندا جۇزەگە اسىرىلىپ جاتقان «سالاماتتى اۋىل» جوباسى.
سپورت ورتالىعىنا كىرۋ تەگىن. بارلىق تۇرعىندار بۇل جوبانىڭ پايدالىلىعىن باعالاپ ۇلگەردى. جاڭا ۇيىمعا ءارتۇرلى جاستاعى ادامدار كەلەدى. ويتكەنى مۇندا سپورتپەن شۇعىلدانۋ ءۇشىن قاجەتتى جابدىقتار بار. 500 مىڭ تەڭگە ۇتىپ العان باستاماشىل توپ ۇستەل تەننيسىنە ارنالعان جابدىقتى, قابىرعاعا ىلىنەتىن تۋرنيكتەردى, ارنايى جاتتىعۋ جابدىقتارىن, بوكس قولعاپتارىن جانە باسقا دا قاجەتتى كەرەك-جاراقتاردى ساتىپ الدى.
ءساتباي سەرالى ۇلى الداعى جوسپارلارىمەن دە ءبولىستى. ونىڭ ايتۋىنشا, ورتالىقتا جاستار اراسىندا سپورتتىق جارىستار وتكىزىلەدى دەپ جوسپارلانۋدا.
ەسكە سالايىق, ازاماتتىق باستامالاردى قولداۋ ورتالىعىنىڭ قولداۋىمەن 2021 جىلى اۋىلدىق جەرلەردەگى ءومىردى جاقسارتۋعا باعىتتالعان ازاماتتىق باستامالاردى دامىتۋ ءۇشىن بۇكىل ەل بويىنشا 60 شاعىن گرانت ىسكە اسىرىلعان بولاتىن.
