ء«رۋبلدى قولداۋعا جۇمسالۋى مۇمكىن رەسەيدىڭ 630 ملرد دوللار التىن-ۆاليۋتا قورى بار جانە سانكتسيانىڭ ماقساتى – باتىس بانكتەرىمەن كەلىسىمدەردى بۇعاتتاپ, بۇل ۆاليۋتانى رۋبلگە اۋىستىرۋدى مۇمكىن قىلماۋ», دەپ حابارلاعان ەدى اقۇي.
تەلەگرامداعى Tengenomika كانالىنىڭ ساراپشىلارى بۇل جاعدايعا مىناداي تۇسىنىكتەمە بەرەدى: ء«تۇرلى باعالاۋ بويىنشا, رەسەي ورتالىق بانكىنىڭ ۆاليۋتالىق-گەوگرافيالىق ءبولىنىسىن ەسكەرە وتىرىپ, قازىرگى 630 ملرد دوللاردىڭ 60 پايىزى باتىس ەلدەرىنىڭ تىكەلەي بۇعاتتاۋىنا تاپ بولۋى مۇمكىن. ونداي جاعدايدا ورتالىق بانك رەزەۆرىنىڭ تەك 40 پايىزى عانا بانك جۇيەسىن قولداپ, ينتەرۆەنتسيا جاساۋ ءۇشىن پايدالانىلادى. سونىمەن قاتار SWIFT-تەن اجىراتىلعان جاعدايدا حالىقارالىق سەرىكتەستەر ءۇشىن رەسەيلىك ەكسپورت – مۇناي, گاز, بيداي, اسكەري قارۋ-جاراق ءۇشىن تولەم جاساۋ قيىندايدى. ەكى سانكتسيا دا رەسەيگە جانە ونىڭ وڭىرلىك سەرىكتەسى قازاقستانعا دا جاقسىلىق اكەلمەيدى. رۋبل قۇلدىراۋى مۇمكىن. بۇل ءوز كەزەگىندە تەڭگەگە دە قىسىمدى كۇشەيتەدى».
رەسەيدەگى احۋالدىڭ ناشارلاپ, ءرۋبلدىڭ قۇنسىزدانۋى تاۋارلار مەن قىزمەتتەردىڭ قىمباتتاۋىنا اكەلىپ سوعادى. ال قازاقستان مەن رەسەيدىڭ اسا تىعىز ساۋدا سەرىكتەستەرى ەكەنىن ەسكەرسەك, مۇنىڭ سالقىنى ەلىمىزگە دە تيەدى. 2021 جىلى ەكى ەل اراسىنداعى تاۋار اينالىمى 20 ملرد دوللاردان اسقان. كوپتەگەن تۇتىنۋشىلىق تاۋارلاردى رەسەيدەن ساتىپ الامىز. دەمەك, رەسەيدە باعانىڭ قىمباتتاۋى قازاقستاندا دا قايتالانادى. مۇنداي جاعدايدا ينفلياتسيا يمپورتى بولۋى مۇمكىن بە؟
«سانكتسيالىق قىسىمدى ەسكەرەر بولساق, وزگە ەلدەرگە, ونىڭ ىشىندە قازاقستانعا دا ەكسپورتتالاتىن تاۋارلار باعاسىنىڭ ءوسۋى ابدەن ىقتيمال. قازاقستان يمپورتىندا رەسەيدىڭ ۇلەسى ايتارلىقتاي. سوندىقتان ينفلياتسيالىق قىسىمدى جوققا شىعارا المايمىز. ءبىزدىڭ ەلدىڭ جالپى يمپورتىنداعى رەسەي ۇلەسى بىلتىر 42,1 پايىزدى نەمەسە 17,3 ملرد دوللاردى قۇراعان. ۇلتتىق بانكتىڭ شۇعىل تۇردە بازالىق ستاۆكانى 13,50 پايىزعا وسىرگەنىن ەستەن شىعارمايىق. بۇل الەمدەگى ەنەرگيا تاسىمالداۋشىلاردىڭ رەكوردتىق جوعارى باعاسىنا بايلانىستى نارىقتاعى پروينفلياتسيالىق احۋالعا قارسى قوسىمشا قولداۋ كورسەتۋى مۇمكىن», دەيدى ساراپشى اندرەي چەبوتارەۆ.
تەڭگەنىڭ جاڭا باعامى بۇگىن بەلگىلى بولادى. وتكەن اپتانىڭ سوڭىندا تەڭگە كۋرسى 467 تەڭگەمەن اياقتالعان. Kurs.kz سايتىنداعى مالىمەت بويىنشا, 1 دوللاردى ورتاشا ايىرباستاۋ باعامى 463 تەڭگە دەپ كورسەتىلگەن.
