ەكى كۇن قاتارىنان وتەتىن بۇل كورمەنىڭ جىل سايىن جىبەك جولى كوشەسىنىڭ بويىندا ءوتۋى جايدان-جاي ەمەس. تابيعي ونىمدەردەن اسقان تالعاممەن جاسالعان كوركەم دۇنيەلەردى كەلۋشىلەر ۇلى جىبەك جولىنىڭ بويىمەن وتكەن ساۋدا كەرۋەنىنىڭ زاماناۋي فورماسى رەتىندە قابىلدايدى. سوڭعى ون جىل كولەمىندە ءداستۇرلى شاراعا اينالعان قولونەر كورمەسىنە الماتىلىقتار عانا ەمەس, ەلىمىزدىڭ باسقا وڭىرلەرىنەن دە شەبەرلەر قاتىسۋدا.
كورمەگە قولونەر بۇيىمدارىنىڭ مىڭنان استام تۇرلەرى قويىلعان. بۇگىندە شەبەرلەر قولونەرلىك كاسىپتى جەكە كاسىپكەرلىكپەن ۇشتاستىرىپ, وسى سالانى دامىتۋعا بارىنشا ۇلەستەرىن قوسىپ كەلەدى. قازاقستاندىق شەبەرلەر جاساعان بۇيىمدار ەلىمىز عانا ەمەس, ەۋروپا, ورتالىق ازيا ەلدەرىنە دە تانىمال.
كورمەنىڭ الەۋمەتتىك سيپاتى دا باسىم. قازاقستان قولونەرشىلەر پالاتاسى وسى جوبا اياسىندا الەۋمەتتىك قورعاۋعا مۇقتاج ازاماتتاردى ءجۇن مەن كيىزدەن بۇيىمدار دايىنداۋعا وقىتۋ, زاعيپ جانە عارىپ جانداردى ءجۇن مەن بىلعارىدان بۇيىمدار وڭدەۋگە جانە دايىنداۋعا, جۇمىسسىزداردى كۇمىس پەن مەلحيوردان زەرگەرلىك بۇيىمدار جاساۋعا ۇيرەتۋدى دە ماقسات ەتەدى.
سۋرەتتەردى تۇسىرگەن اۆتور.
