زەرەندى اۋدانىندا 500-گە جۋىق جاڭا جۇمىس ورنى اشىلدى. تارازى باسىنا تارتىپ باعامداساڭىز, بۇل وتە ۇلكەن كومەك. مەملەكەتتىك باعدارلاما بويىنشا ونداعان ادام قايتا دايارلاۋ كۋرستارىنان ءوتىپ, جاڭا ماماندىق يگەرۋدە.
40 مىڭعا جۋىق تۇرعىنى بار اۋدان كاسىپ باستاپ, ىرىسىن ارتتىرۋعا مۇمكىندىگى زور قولايلى جەرگە ورنالاسقان. ەڭ الدىمەن, بۇل ولكەدە تۋريزم سالاسىندا تياناقتى جۇمىس ىستەۋگە ابدەن بولادى. جادىراعان جاز ايلارىندا ماڭگى جاسىل قاراعايلار مەن قولدىڭ سالاسىنداي اققايىڭدار كومكەرگەن, كۇمىس سۋلى كولدەرى تانانىڭ كوزىندە جارقىراپ جاتقان جەر ءجانناتىنا كەلۋشىلەر كوپ. دەمەك, بۇل تاراپتا كوڭىل كوزى تۇسپەگەن كاسىپ تۇنىپ تۇر دەۋگە بولادى.
سوڭعى جىلدارى جاپپاي كاسىپكەرلىكتى دامىتۋعا باعىتتالعان مەملەكەتتىك باعدارلامالار ءوز جەمىسىن بەرە باستادى. «باستاۋ – بيزنەس» باعدارلاماسى بويىنشا وتكەن جىلى 58 گرانت تاعايىندالىپ, جالپى كولەمى 34 ملن تەڭگەنىڭ بيزنەسى قارجىلاندىرىلدى.
– اۋداندا اۋىل شارۋاشىلىعى جاقسى دامىپ كەلەدى. ادامداردىڭ دا تابىستى سالانىڭ تۇعىرىن بيىكتەتۋگە ىنتاسى زور, – دەيدى اۋداندىق جۇمىسپەن قامتۋ ورتالىعىنىڭ ديرەكتورى اسان سماتوۆ, – گرانتتىڭ نەگىزگى بولىگى مال شارۋاشىلىعىنا باعىتتالىپ وتىر. اتاپ ايتقاندا, 29 گرانت وسى سالاعا تيەسىلى, 19 گرانت حالىققا قىزمەت كورسەتۋ سالاسىنا ءبولىندى. ونىڭ ىشىندە جەرگىلىكتى جاعدايدى ەسكەرە وتىرىپ, قوعامدىق تاماقتاندىرۋ ورىندارىن كوبەيتۋ كوزدەلۋدە. ەل ەڭبەككە ىنتالى. ءسوزىم دالەلدى بولۋى ءۇشىن دايەك كەلتىرۋ قاجەت بولسا, وتكەن جىلى 170 ادامنىڭ «بيزنەس – باستاۋ» باعدارلاماسى بويىنشا بىلىمدەرىن جەتىلدىرگەنىن جانە ولاردىڭ باسىم كوپشىلىگىنىڭ ءوز ىستەرىن اشقاندىعىن ايتا كەتسەم دە بولار.
ەڭبەك ەتسەم دەپ ۇمتىلعانداردىڭ ءبىرى – اۋدان تۇرعىنى اناستاسيا گۋسلياروۆا. ول كاسىبىن قاي تاراپتان اشۋ قاجەتتىگىن ابدەن وي ەلەگىنەن وتكىزگەن. كوڭىلىنە قولايلىسى ءسان سالونى بولىپ شىعىپتى. اۋدان تۇرعىندارى ءۇشىن سۇرانىسقا يە سونى كاسىپ. ايتسە دە, بىردەن بەل بۋىپ كىرىسۋگە باتپاي, سالانىڭ سالماعىن, وزىندىك ەرەكشەلىكتەرىن جان-جاقتى زەرتتەگەن. ءتىپتى ەلورداداعى تالاپتىعا بەرەرى مول ارنايى بىلىكتىلىك كۋرستارىنان دا وتكەن. وسىنداي تىڭعىلىقتى دايىندىقتان كەيىن بارىپ مەملەكەتتىك باعدارلاماعا قاتىسىپ, گرانت ۇتىپ العان. استانادان 808 تولقىندى ديودتىق لازەر ساتىپ الىپتى. كۋرس اياقتالعان سوڭ سەرتيفيكاتىن دا يەلەنگەن. قازىرگى كۇنى ءوز شارۋاسىن ۇرشىقشا ءۇيىرىپ وتىر.
العا ۇمتىلعاندار از بولماعانىمەن, جۇمىسسىزدىق مۇلدەم جويىلىپ كەتكەن جوق, رەسمي دەرەك بويىنشا ءالى دە جەتپىستەن استام ادام جۇمىسسىز. وسى ارادا بۇل ماسەلەنى شەشۋگە باعىتتالعان ءتيىمدى ءارتۇرلى باعدارلامالاردىڭ بار ەكەندىگىن ايتا كەتۋگە ءتيىستىمىز. تەك جانىمدى جالداپ جۇمىس ىستەپ, تابىسىمدى كوبەيتەمىن دەيتىن نيەت بولسىن دەڭىز.
اقمولا وبلىسى,
زەرەندى اۋدانى
