ۇلتتىق پاراليمپيادا كوميتەتى حابارلاعانداي, قازاقستان قۇراما كومانداسى 25 اقپاندا الماتى قالاسىنان XIII قىسقى پاراليمپيادا ويىندارىنا اتتانادى. قۇراما كوماندانىڭ رەسمي تاسىمالداۋشىسى - «ەير استانا» اۋەكومپانياسى.
بەيجىڭ-2022 قىسقى پاراليمپيادا ويىندارىنا قازاقستاندىق دەلەگاتسيا كورونوۆيرۋس ىندەتىنە قارسى بارلىق سانيتارلىق شارالاردى قولدانىپ, قاتاڭ كارانتين رەجيمىندە اتتانادى.
سوڭعى ءۇش جەتى بويى پاراليمپياداشىلار الماتى وبلىسى تالعار اۋدانىنداعى «الاتاۋ» شاڭعى-بياتلون كومپلەكسىندە كارانتين رەجيمىن قاتاڭ ساقتاپ, پاراليمپيادا ويىندارىنا سوڭعى وقۋ-جاتتىعۋ جيىنىن وتكىزدى.
ەستەرىڭىزگە سالا كەتەيىك, بەيجىڭدە وتەتىن XIII قىسقى پاراليمپيادا ويىندارى 2022 جىلدىڭ 4-13 ناۋرىز ارالىعىندا وتەدى.
بيىل پاراليمپيادا ويىندارىندا 50 مەملەكەتتەن كەلگەن ەڭ ۇزدىك 700-دەن استام سپورتشى قاتىسادى دەپ بولجانىپ وتىر. اتالعان تورتجىلدىقتىڭ باستى دوداسىندا 5 قازاقستاندىق اتلەت ەل نامىسىن قورعايدى. ولار - الەكساندر گەرليتس, ەربول حاميتوۆ, سەرگەي ۋسولتسەۆ, يۋري بەرەزين جانە دەنيس پەترەنكو. قازاقستان پاراليمپياداشىلارى ەكى سپورت ءتۇرى بويىنشا ونەر كورسەتەدى: پارابياتلون جانە پاراشاڭعى.
پاراليمپيادا ويىندارىنىڭ اشىلۋ سالتاناتى 4 ناۋرىزدا نۇر-سۇلتان ۋاقىتى بويىنشا ساعات 22.00-دە وتەدى. سالتاناتتى اشىلۋ راسىمىندە قازاقستان تۋىن الەم كۋبوگىنىڭ قولا جۇلدەگەرى ەربول حاميتوۆ ۇستاپ شىعادى.
