بايتەرەك اۋدانىنىڭ ورتالىعى پەرەمەتنىي اۋىلىندا ارقايسىسى 2 پاتەرلى 4 تۇرعىن ءۇي سالىندى. «سۇندەتوۆ» شارۋا قوجالىعىنىڭ باسشىسى, بايتەرەك اۋداندىق ءماسليحاتىنىڭ دەپۋتاتى ەسەن سۇندەتوۆ سالعان ءار ءۇيدىڭ اۋماعى – 69 شارشى مەتر. ۇيلەر ينفراقۇرىلىممەن تولىقتاي قامتىلعان, اۋلاسى قورشالعان جاڭا ۇيلەردىڭ قۇرىلىسى اياقتالعان سوڭ جەرگىلىكتى اكىمدىك ونى ءتيىمدى باعاعا ساتىپ الدى. ءسويتىپ, ءۇي كەزەگىندە تۇرعان ءارءتۇرلى ساناتتاعى – كوپبالالى, مۇمكىندىگى شەكتەۋلى, اسىراۋشىسىنان ايىرىلعان, اپاتتى ءۇي يەلەرى, ت.ب. تۇلعالار مەن اسا قاجەت ماماندىق يەلەرىنە جالعا بەرىلدى.
– تاۋەلسىزدىك العان 30 جىل ىشىندە ەل ۇكىمەتى ازاماتتاردىڭ بارلىق جاعدايىن جاساۋعا جانە لايىقتى باسپانامەن قامتۋعا كۇش سالىپ كەلەدى. بىلتىر ەل تاۋەلسىزدىگىنىڭ 30 جىلدىق تويىنا اۋدان ۇلكەن جەتىستىكپەن جەتتى. اۋدان تۇرعىندارىنىڭ ءال-اۋقاتىن كوتەرۋ, پرەزيدەنت تاپسىرماسىن ىسكە اسىرۋ جولىندا ءبىراز جۇمىس اتقارىلدى. نەگىزىنەن, اۋىل تۇرعىندارىن تولعاندىراتىن جول, گاز, سۋ ماسەلەلەرىن رەتتەۋگە كۇش سالدىق. وسى ماسەلەلەردى شەشۋگە كومەك كورسەتكەن اۋدان كاسىپكەرلەرى مەن مەردىگەرلەرگە ريزاشىلىعىمىز شەكىز. جاڭا ءۇيدىڭ ءار بۇرىشى قۋانىش پەن شاتتىققا جانە باقىتقا تولسىن, – دەدى جاڭا ۇيلەردى تاپسىرۋ سالتاناتىندا بايتەرەك اۋدانىنىڭ اكىمى مارات توقجانوۆ.
بۇل كۇنى جاڭا ۇيگە كىرىپ, قونىس تويىن تويلاعان اقمانار عاليەۆا باسپانا كەزەگىندە 2007 جىلدان بەرى تۇرعان ەكەن. جاڭا پاتەرگە يە بولعان زەينەتكەر باسپانا سالىپ, ونى قاجەت ەتكەن وتباسىلارعا بەرگەن اۋدان باسشىلىعىنا ريزاشىلىعىن ءبىلدىردى. مەردىگەر ەسەن سۇندەتوۆ ءۇي يەسىنە سۋ جاڭا كىلەم تارتۋ ەتتى.
ايتا كەتەيىك, جاڭا باسپاناعا يە بولعانداردىڭ قاتارىندا وڭىرگە وتە قاجەتتى ماماندىق يەلەرى دە بار. مىسالى, وسى كۇنى اۋداندىق اۋرۋحانانىڭ جالپى تاجىريبەدەگى دارىگەرى ەلەنا مارات تا جاڭا ءۇيدىڭ كىلتىن الدى. اۋدانعا كەلگەنىنە كوپ بولماسا دا, باسپانالى بولعان جاس دارىگەر ەندى اتا-اناسىن كوشىرىپ الماق.
– وتە قۋانىشتىمىن! ەندى ەش الاڭسىز قىزمەت ەتىپ, ەلگە پايدامدى تيگىزۋگە كۇش سالامىن, – دەيدى جاس مامان.
باتىس قازاقستان وبلىسى
