نۇرلان ءابدىروۆ 2021 جىلعى 29 جەلتوقساندا وسك پارلامەنت سەناتىنىڭ دەپۋتاتى نۇرلان ناۋرىز ۇلى قىلىشباەۆتىڭ وكىلەتتىگىن توقتاتۋعا اكەپ سوقتىراتىن نەگىزدىڭ پايدا بولۋى تۋرالى قاۋلى قابىلداعانىن جەتكىزدى. سونداي-اق ول «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 69 جانە 83-باپتارىنا سايكەس سەنات دەپۋتاتتارىن شىعىپ قالعانداردىڭ ورنىنا سايلاۋدى ولاردىڭ مەرزىمىنەن بۇرىن توقتاتىلعان ساتىنەن باستاپ ەكى ايدان كەشىكتىرمەي ورتالىق سايلاۋ كوميسسياسى تاعايىنداۋعا ءتيىس ەكەنىن ايتتى. جوعارىدا ايتىلعاندار نەگىزىندە وسك شەشىمىمەن شىعىپ قالعان دەپۋتاتتىڭ ورنىنا الماتى وبلىسىنان قازاقستان رەسپۋبليكاسى پارلامەنتى سەناتىنىڭ دەپۋتاتىن سايلاۋ 2022 جىلعى 22 ساۋىرگە تاعايىندالدى.
وتىرىستا وسك توراعاسىنىڭ ورىنباسارى كونستانتين پەتروۆ بايانداما جاسادى. ول كونستيتۋتسياعا سايكەس وتىز جاسقا تولعان جانە سوڭعى ون جىلدا ەل اۋماعىندا جانە ءتيىستى وبلىستىڭ, رەسپۋبليكالىق ماڭىزى بار قالانىڭ نە استانانىڭ اۋماعىندا كەمىندە ءۇش جىل تۇراقتى تۇرىپ جاتقان قازاقستان رەسپۋبليكاسىنىڭ ازاماتى پارلامەنت سەناتىنىڭ دەپۋتاتى بولا الاتىنىن اتاپ ءوتتى. سونىمەن قاتار كانديداتتىڭ جوعارى ءبىلىمى جانە كەمىندە بەس جىل جۇمىس ءوتىلى جانە بەلسەندى سايلاۋ قۇقىعىنا يە بولۋى كەرەك. سونداي-اق وتىرىستا الماتى وبلىسىنان شىعىپ قالعان دەپۋتاتتىڭ ورنىنا 2022 جىلعى 22 ساۋىرگە تاعايىندالعان سايلاۋدى ازىرلەۋ مەن وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارى بەكىتىلدى. بۇل جوسپارعا سايكەس سايلاۋ ناۋقانىنىڭ كەلەسى كەزەڭدەرى انىقتالدى:
كانديداتتاردى ۇسىنۋ – وسى جىلعى 23 اقپاننان باستاپ 22 ناۋرىز ساعات 18-گە دەيىن (سايلاۋ تاعايىندالعان كۇننەن كەيىنگى كۇننەن باستالادى جانە سايلاۋ وتكىزىلەتىن كۇنگە ءبىر اي قالعاندا جەرگىلىكتى ۋاقىتپەن ساعات ون سەگىزدە اياقتالادى). سەنات دەپۋتاتتىعىنا كانديداتتى ۇسىنۋدى ءماسليحاتتار, سونداي-اق ءوزىن-ءوزى ۇسىنۋ تارتىبىمەن جۇزەگە اسىرادى. كانديداتتى وبلىستىڭ بارلىق ءماسليحاتى اتىنان وكىلدىك ەتەتىن تاڭداۋشىلاردىڭ جالپى سانىنىڭ كەمىندە ون پايىزى, بىراق ءبىر ءماسليحاتتان تاڭداۋشىلار داۋىسىنىڭ جيىرما بەس پايىزىنان اسپايتىن داۋىس قولداۋعا ءتيىس.
تىركەۋ – وسى جىلعى 1 ءساۋىر ساعات 18.00-گە دەيىن (بارلىق قاجەتتى قۇجاتتى العاننان كەيىن باستالادى). سەنات دەپۋتاتتىعىنا كانديداتتى تىركەۋدى وبلىستىق, قالالىق نەمەسە اۋداندىق ءماسليحاتتىڭ دەپۋتاتتىققا كانديدات ەتىپ ۇسىنۋ تۋرالى شەشىمى ء(ماسليحات ۇسىنعان جاعدايدا); دەپۋتاتتىققا كانديدات بولىپ داۋىسقا تۇسۋگە كەلىسىمى تۋرالى ءوتىنىشى (نەمەسە ءوزىن ءوزى ۇسىنعان جاعدايدا ازاماتتىڭ دەپۋتاتتىققا كانديدات بولىپ داۋىسقا ءتۇسۋ نيەتى تۋرالى ءوتىنىشى); ءتيىستى سايلاۋ كوميسسياسىنىڭ كانديداتتى قولداپ قويعان تاڭداۋشىلاردىڭ قولدارىن تەكسەرۋ ناتيجەلەرى تۋرالى حاتتاماسى; كانديداتتىڭ ومىرباياندىق دەرەكتەرى; مەملەكەتتىك كىرىس ورگانىنىڭ كانديدات پەن ونىڭ زايىبىنىڭ (جۇبايىنىڭ) اكتيۆتەرى مەن مىندەتتەمەلەرى تۋرالى دەكلاراتسيالار تاپسىرعانى تۋرالى انىقتاماسى; كانديداتتىڭ سايلاۋ جارناسىن ەنگىزگەنىن كۋالاندىراتىن 900 000 تەڭگە سوماسىندا قۇجات بولعان جاعدايدا جۇزەگە اسىرىلادى.
ەگەر سايلاۋ قورىتىندىلارى بويىنشا كانديدات سەنات دەپۋتاتى بولىپ سايلانعان نەمەسە داۋىس بەرۋ قورىتىندىسى بويىنشا كانديدات داۋىس بەرۋگە قاتىسقان تاڭداۋشىلار داۋسىنىڭ كەمىندە بەس پايىزىن العان جاعدايدا, سونداي-اق كانديدات قايتىس بولعان جاعدايدا ەنگىزىلگەن جارنا كانديداتقا قايتارىلادى. قالعان بارلىق جاعدايدا ەنگىزىلگەن جارنا قايتارىلۋعا جاتپايدى جانە رەسپۋبليكالىق بيۋدجەت كىرىسىنە الىنادى.
سايلاۋ الدىنداعى ۇگىت 1 ءساۋىر ساعات 18.00-دەن 21 ءساۋىر ساعات 00.00-گە دەيىن (كانديداتتاردى تىركەۋ مەرزىمى اياقتالعان ساتتەن باستالادى جانە سايلاۋ بولاتىن كۇننىڭ الدىنداعى كۇنگى جەرگىلىكتى ۋاقىت بويىنشا ءنول ساعاتتا اياقتالادى). تىنىشتىق كۇنى –. 21 ءساۋىر, ال داۋىس بەرۋ كۇنى – 22 ءساۋىر.
سايلاۋ زاڭناماسىنا سايكەس سەنات دەپۋتاتىنىڭ سايلاۋىندا داۋىستاردى ساناۋ ناتيجەلەرى داۋىس بەرۋگە ارنالعان پۋنكتتە وتكىزىلەتىن الماتى وبلىستىق سايلاۋ كوميسسياسىنىڭ وتىرىسىندا بەلگىلەنەدى. سەنات دەپۋتاتىن سايلاۋ قورىتىندىلارىن ورتالىق سايلاۋ كوميسسياسى سايلاۋ وتكىزىلگەن كۇننەن باستاپ جەتى كۇن مەرزىمنەن, ياعني بيىلعى 28 ساۋىردەن كەشىكتىرمەي بەلگىلەيدى جانە سايلاۋ قورىتىندىسى تۋرالى باق-تا حابار جاريالايدى.
