- زاڭسىز ارەكەتتى ىنتالى توپ شەتەلدىك ينۆەستورلاردىڭ قولداۋىمەن بۇرىن ماقتا-ماتا فابريكاسى بولعان «قارعالى اكتسيونەرلىك قوعامىنىڭ اۋماعىندا جۇزەگە اسىرىپ كەلگەن. بەلگىلى بولعانداي, ۇيىمداستىرۋشىلار ماينينگ فەرماسى تۇتىنعان ەلەكتر قۋاتى ءۇشىن جەڭىلدەتىلگەن تاريف بويىنشا اقى تولەگەن. ياعني, جۇمسالعان ەنەرگيانى توقىما ءوندىرىسى اتىنان تۇتىنىلاتىن ەلەكتر قۋاتىنىڭ قۇنىمەن ەسەپتەپ, جاۋىپ وتىرعان. ءتىنتۋ كەزىندە ماماندار قۇنى 1 ملرد تەڭگەدەن اساتىن كريپتوۆاليۋتا وندىرۋگە قابىلەتتى ءىرى شيفرلاۋ كەشەنىنەن تۇراتىن 2800 بىرلىكتەن استام جابدىقتى تاركىلەدى. قازىر تەرگەۋ امالدارى باستالىپ, ساراپتاما تاعايىندالدى. وزگە اقپارات تەرگەۋ مۇددەسىنە ساي جاريا ەتىلمەيدى, - دەيدى سىبايلاس جەمقورلىققا قارسى كۇرەس قىزمەتى الماتى وبلىسى بويىنشا دەپارتامەنتىنىڭ ءباسپاسوز قىزمەتىنىڭ وكىلى.
وسىلايشا, اۋىلداعى ماينينگ فەرماسى مەملەكەتكە 131 198 909 تەڭگە مولشەرىندە زالال كەلتىرگەن كورىنەدى. ءارى بۇل الدىن الا باعالاۋ بويىنشا بەلگىلى بولعان شىعىن عانا. تەكسەرۋ بارىسىندا ايماقتىڭ ەنەرگەتيكالىق قاۋىپسىزدىگىنە كەلگەن زياننىڭ كولەمى مەن كولەڭكەلى ەكونوميكاعا جۇمسالعان قارجىنىڭ مولشەرى ءوسۋى مۇمكىن. ايتپاقشى, ماينينگ فەرماسىن ۇيىمداستىرۋشىلار الماتى وبلىسىن قۋات كوزىمەن قامتاماسىز ەتىپ وتىرعان ءىر مونوپوليست مەكەمە – «الاتاۋ جارىق كومپانياسى» اكتسيونەرلىك قوعامىنىڭ لاۋازىمدى تۇلعالارى مەن مەن جامبىل اۋدانى ەلەكترمەن قامتۋ جۇيەسى تورابىنىڭ باقىلاۋشى قىزمەتكەرلەرىنە 50 مىڭ تەڭگەدەن باستاپ, 1,5 ملن تەڭگەگە دەيىنگى سومادا پارا بەرىپ وتىرعان ەكەن. بۇعان دەيىن «الاتاۋ جارىق» كومپانياسىن 2011 جىلدان بەرى باسقارىپ كەلگەن مۇحيت ۇمبەتوۆ ءوز ەركىمەن قىزمەتتەن كەتكەن بولاتىن.
جالپى, الماتى وبلىسى ەلىمىزدەگى ەلەكتر قۋاتىن اسا ءىرى كولەمدە تۇتىناتىن ايماققا جاتادى. ءارى ءوڭىردىڭ ەنەرگەتيكا ءوندىرۋ مۇمكىندىگى ىشكى قۋات نارىعىنداعى سۇرانىستىڭ 60 پايىزىن عانا ورىنداۋعا مۇمكىندىك بەرەدى. ال جەتىسۋلىقتار جارىق جەتىسپەۋشىلىگىن كورشىلەس جامبىل وبلىسى مەن قىرعىزستاننان تاسىمالداناتىن ەنەرگيا كوزدەرى ارقىلى شەشۋگە ءماجبۇر بولىپ وتىر.
