قىتاي استاناسى بەيجىڭدە XXIV قىسقى وليمپيادا ويىندارى اياقتالدى. قازاقستان كومانداسى سوڭعى جارىس كۇنىندە شاڭعىدان ايەلدەر اراسىنداعى مارافونعا قاتىستى. ال قۇرامانىڭ بەيجىڭدەگى ەڭ ۇلكەن كورسەتكىشى – 4-ورىن.
بەيجىڭ وليمپياداسىندا قازاقستان اتىنان 34 سپورتشى ونەر كورسەتتى. ولار جالپى ەسەبى 87 جولداما جەڭىپ العان بولاتىن.
ءبىزدىڭ اتلەتتەر شاڭعى جارىسى, بياتلون, فريستايل-موگۋل, فريستايل-اكروباتيكا, شورت-ترەك, كونكيمەن جۇگىرۋ, تاۋ شاڭعىسى, شاڭعى قوسسايىسى جانە شاڭعىمەن تۇعىردان سەكىرۋ بويىنشا باق سىنادى.
كوماندا ساپىنداعى ەڭ ۇزىك كورسەتكىش شورت-ترەكشى ابزال اجىعاليەۆكە تيەسىلى. ول 500 مەترگە جۇگىرۋدەن ا فينالىنا شىعىپ, ءتورتىنشى ورىنعا تابان تىرەدى. سونداي-اق, باستى فينالدا سىنعا تۇسكەن ءادىل عالياحمەتوۆ 1500 مەتردە سەگىزىنشى ورىن الدى.
سول سياقتى كونكيشى نادەجدا موروزوۆا ماسس-ستارتتا فينالعا جولداما الىپ, اقتىق سىندا 14-ورىننان كورىندى.
اقمارجان قالمۇرزاەۆا شاڭعى اكروباتيكاسىنان ىرىكتەۋ سىنىندا 98.68 ۇپاي جيناپ, توپ-12 قاتارىنا ەندى.
قازاقستان تاريحىندا العاش رەت شىڭعىس راكپاروۆ شاڭعى قوسسايىسىنان وليمپيادادا باق سىنادى.
سونداي-اق, بەيجىڭ تورىندە جاس سپورتشىلارعا دا جول اشىلدى. 16 جاستاعى اناستاسيا گورودكو, 17 جاستاعى ولەسيا گراۋر (ەكەۋى دە فريستايل-اكروباتيكا), 17 جاستاعى دانيل ۆاسيلەۆ (شاڭعىمەن تۇعىردان سەكىرۋ) جانە 18 جاستاعى الەكساندرا ترويتسايا (تاۋ شاڭعىسى) بولاشاقتا ەل سپورتىنىڭ وركەندەۋىنە ۇلەس قوسارى ءسوزسىز.
سوڭعى ءۇش وليمپيادادا جۇلدە الىپ كەلگەن قازاقستان قۇراماسى 2006 جىلعى تۋرين ويىندارىنان كەيىن العاش رەت مەدالسىز قالدى.
