ەكى مىڭنان اسا كورەرمەنگە ارنالعان ۇلكەن زال لىق تولى بولىپ, كونتسەرت بيلەتتەرى نەبارى ەكى-اق كۇندە ساتىلىپ كەتكەن. بەرلين فيلارمونياسىنىڭ وكىلدەرى مالىمدەگەندەي, بۇل پاندەميا باستالعالى بەرى العاشقى تولىق انشلاگ جيناعان كونتسەرت ەكەن. كەشتە كورەرمەننىڭ وركەسترگە دەگەن ىستىق ىقىلاسى, بەتحوۆەن مۋزىكاسىنىڭ تانىمالدىعى مەن قازاقستاندىق مۋزىكانتتاردىڭ ونەرىنە دەگەن قىزىعۋشىلىق ۇيلەسىم تاپتى.
«الەمدىك قاۋىمداستىق ەلىمىزدى قاڭتارداعى وقيعالاردىڭ سالدارىنان ساياسي كاتاكليزمدەر ارەناسى رەتىندە قابىلداعانى بەلگىلى. بىراق FORTE TRIO ءوز ونەرلەرى ارقىلى قازاقستاندى مادەنيەتى جوعارى دەڭگەيدە دامىعان, وزىندىك مۋزىكالىق داستۇرلەرى قالىپتاسقان مەملەكەت رەتىندە كورسەتە ءبىلدى. تريونىڭ ونەرىن جوعارى باعالاعان شەتەلدىكتەر ءبىزدىڭ ارتىستەردى كونتسەرتتەن كەيىن ساحناعا تاعى 5 رەت شاقىردى», دەدى «قازاقكونتسەرت» ديرەكتورىنىڭ ورىنباسارى لاۋرا احمەتوۆا.
وتكەن جىلدىڭ جەلتوقسان ايىندا FORTE TRIO فرانتسيانىڭ ءتورت قالاسىندا كونتسەرت وتكىزىپ, وسى ەلدىڭ 2021 جىلعى كونتسەرتتىك ماۋسىمىن اياقتاعانى ءمالىم. ەندى وتاندىق مۋزىكانتتار گەرمانيا ەلىنىڭ ونەرسۇيەر قاۋىمىن تامساندىرىپ, كوۆيدتىك شەكتەۋلەردەن شارشاعان تىڭدارماندارعا ۇمىتىلماس جارقىن ەموتسيا سىيلادى.
قازاقكونتسەرت قۇرامىنا كىرەتىن FORTE TRIO ءانسامبلى قازاقستاننىڭ ەڭبەك سىڭىرگەن قايراتكەرى تيمۋر ۋرمانچەەۆتىڭ كوركەمدىك جەتەكشىلىگىمەن ونەر كورسەتەدى. ۇجىمنىڭ ماقساتى – قازاقستاندىق كلاسسيكالىق مۋزىكانى الەمگە تانىتۋ.
ال قازاقستاندىقتار FORTE TRIO ۇجىمىنىڭ ونەرىن 2 ناۋرىز كۇنى «استانا وپەرا» تەاترىندا وتەتىن «ليۋبيتە لي ۆى برامسا؟» اتتى جاڭا كونتسەرتتە تاماشالاي الادى.
