سەناتور مۇحتار قۇل-مۇحاممەدتىڭ توراعالىق ەتۋىمەن وتكەن كەزدەسۋدە ول پرەزيدەنتتىڭ جىل باسىندا بەرگەن تاپسىرمالارىن ۋاقتىلى جانە ساپالى زاڭنامالىق قامتاماسىز ەتۋ قاجەتتىگىن اتاپ ءوتتى.
قورعانىس ءمينيسترىنىڭ ورىنباسارى سۇلتان قامالەتدينوۆ بەرىلگەن تاپسىرمانى ىسكە اسىرۋ بارىسى تۋرالى دەپۋتاتتارعا ايتىپ بەردى. ول تەرروريزمگە قارسى وپەراتسيالاردى جۇرگىزۋ جانە داعدارىستىق جاعدايلاردى باسقارۋدىڭ بىرىڭعاي ورتالىعىن قۇرۋ كەزىندە لاۋازىمدى تۇلعالاردىڭ ءىس-قيمىلدارىن زاڭنامالىق دەڭگەيدە رەتتەۋ قاجەتتىگى تۋرالى ايتتى. جاستاردىڭ اسكەري قىزمەتكە دەگەن ىنتاسىن ارتتىرۋعا, اسكەرگە شاقىرىلاتىن جاستار مەن اسكەري قىزمەتشىلەردى تاربيەلەۋدە جاڭا تاسىلدەر مەن ستاندارتتاردى قولدانۋعا بايلانىستى شارالارعا ەرەكشە نازار اۋداردى.
سەناتور سەرگەي ەرشوۆ ءوز سوزىندە ءاربىر مەملەكەتتىك ورگاننىڭ ءرولىن, مىندەتتەرى مەن فۋنكتسيالارىن ايقىنداي وتىرىپ, ازاماتتاردى اسكەري-پاتريوتتىق تاربيەلەۋدى ۇيىمداستىرۋ قاجەتتىگىن اتاپ ءوتتى. ول سونداي-اق قارۋلى كۇشتەردىڭ جاۋىنگەرلىك جانە جۇمىلدىرۋ دايىندىعىن قاجەتتى دەڭگەيدە ۇستاپ تۇرۋ, كۇش قۇرىلىمدارى اراسىنداعى ءتيىمدى ۇيلەستىرۋدى قامتاماسىز ەتۋ جونىندەگى نورمالاردىڭ ءوزارا بايلانىسى تۇرعىسىندا زاڭنامالىق بازانى جۇيەلەۋدىڭ ماڭىزدىلىعىن ءسوز ەتتى.
كەزدەسۋ بارىسىندا پارلامەنتشىلەر قورعانىس شىعىستارىن قارجىلاندىرۋعا, سونداي-اق اسكەري ۇجىمدارداعى سىبايلاس جەمقورلىققا قارسى ءىس-قيمىلعا قاتىستى ماسەلەلەردى دە كوتەردى. سەناتتىڭ سالالىق كوميتەتىنىڭ توراعاسى مۇحتار قۇل-مۇحاممەد كەزدەسۋدى قورىتىندىلاي كەلىپ مۇددەلى مەملەكەتتىك ورگاندارمەن جانە جۇرتشىلىقپەن جەكەلەگەن ۇسىنىستاردى, ونىڭ ىشىندە اسكەرگە شاقىرۋ ماسەلەلەرىن شەشۋگە, مەرزىمدى اسكەري قىزمەت وتكەرۋدى ىنتالاندىرۋعا باعىتتالعان ۇسىنىستاردى كەلىسۋدىڭ ماڭىزدىلىعىن ايتتى.
