– راسىندا شەتەلدە جۇرگەن بىلىكتى ماماندارىمىز از ەمەس. بۇل ءۇشىن ەشكىمدى ايىپتاۋعا بولمايدى. قازىر – جاھاندانۋ زامانى. ادام قاي جەردە سۇرانىسقا يە بولسا, سول جەرگە بارىپ جۇمىس ىستەۋگە قاقى بار. وعان ەشكىم كەدەرگى جاسامايدى. ءبىز ءوز سالاسىندا تابىسقا جەتكەن ازاماتتاردى بۇعان دەيىن دە شاقىرعانبىز. ەلگە قايتىپ كەلگەن وتانداستارىمىز دا بار. بىراق, شىندىعىن ايتۋىمىز كەرەك, ەلىمىزگە ءبىلىمى جوعارى, پاراساتتى ادامدار كەرەك. جالپى, ادامي كاپيتال جوعارى بولۋى قاجەت. جالپاق تىلمەن ايتساق, وتانىمىزعا كەلگەن ادامداردىڭ ساپاسى نەعۇرلىم جوعارى بولسا, ەلىمىزگە سوعۇرلىم ءتيىمدى بولادى, – دەدى پرەزيدەنت.
سونداي-اق قاسىم-جومارت توقاەۆ ەلىمىزدەگى ەڭبەكقورلىقتىڭ, بىلىكتىلىكتىڭ يدەولوگياسىن كوتەرۋ كەرەكتىگىن باسا ايتتى.
– ۇلتىمىز دۇنيە جۇزىندە, ەڭ الدىمەن, ەڭبەكقور, جۇمىسقا ادال ۇلت رەتىندە مويىندالاتىن بولسا, بۇل ەكونوميكامىزعا وڭ اسەر ەتەدى. ماسىلدىقتان, جالقاۋلىقتان الشاق بولۋىمىز قاجەت. سوندا عانا جاڭا قازاقستان تۇجىرىمداماسى ىسكە اسادى. مەنىڭشە, ءبىز بۇرىن ۇلكەن يدەولوگيالىق قاتەلىك جىبەردىك. شەتەلگە, ياعني ورتا ازيادان رەسەيگە كەتكەن جۇمىسشىلارعا ك ۇلىپ, «قاراڭىزدار, ولار قارا جۇمىسپەن اينالىسۋعا ءماجبۇر بولدى, ال بىزگە كەلگەندە, بىردە-ءبىر قازاق شەتەلدە جۇمىس ىستەمەيدى, جايباراقات ءجۇرمىز» دەپ قاتتى ماقتاندىق. كەز كەلگەن ەڭبەكتى جوعارى باعالاۋ قاجەت, سولاي ەمەس پە؟ بۇگىنگى كۇنى ورتا ازياداعى جۇمىسشىلار رەسەيدە ەڭبەك ەتىپ, كۇن كورىپ جاتىر. ال, بىزدىكىلەر ەڭبەك باسەكەسىنە شىداي المايتىن بولدى. وكىنىشكە قاراي, بۇل «سىرەۆوە پروكلياتە», ياعني «شيكىزاتقا تاۋەلدى بولۋدىڭ» سالدارى, – دەدى مەملەكەت باسشىسى سۇحباتىندا.
