مەملەكەت باسشىسى ءوز سوزىندە بىرقاتار ازاماتتاردىڭ جازىقسىز جانداردى قاماۋعا الدى دەگەن پىكىرمەن عانا جۇرگەنىن تىلىنە تيەك ەتتى. ولاردىڭ سول ۇراندى ەل ىشىنە تاراتىپ, قاتە كوزقاراس تۋىنداتۋعا تىرىساتىنىن دا اتاپ ءوتتى.
«بۇزاقىلار تۋرالى ماسەلەگە كەلسەك, كەيبىر ادامدار جازىقسىز ازاماتتاردى ەش سەبەپسىز قاماۋعا الدى دەپ ويلايدى دا, وسىنداي جالعان ۇرانداردى ەل ىشىندە تاراتادى. بىراق, مىنانى ۇمىتپاۋىمىز كەرەك, سولاردىڭ ىشىندە لاڭكەستەر دە, قىلمىسكەرلەر دە بار. قاراڭىزشى, مىڭداعان ادام قالانى قيراتىپ, ناعىز تەرروريستىك ارەكەتتەرگە باردى. بىراق, قازىر ءبارى جاي عانا بەيبىت ازاماتتار بولىپ شىقتى. بۇعان كىم سەنەدى؟ جالپى, لاڭكەستەردى, قاراقشىلاردى حالىق قاھارماندارى, باتىرلارى دەپ ايتۋعا بولمايدى. بۇل – ەشقانداي شىندىققا كەلمەيتىن جالعان ءۋاج», دەدى قاسىم-جومارت توقاەۆ.
قازاقستان پرەزيدەنتى اقيقاتقا كوز جەتكىزبەي جالعان سويلەيتىندەردىڭ ايتقانىنا يلانۋعا بولمايتىنىن اتاپ ءوتتى. سونداي-اق ءاربىر ءىستى مۇقيات زەردەلەۋ قاجەتتىگىن ەسكەرتتى.
«ەگەر ءبىز اقيقاتىنا كوز جەتكىزبەي, ولاردىڭ ايتقانىنا سەنەتىن بولساق, ەلىمىزگە تاعى ءبىر ۇلكەن قاۋىپ توندىرەمىز. بۇل قاراقشىلاردى قازاقستانعا شاقىرۋ دەگەن ءسوز. سوندىقتان اتالعان ماسەلەدە ءبىز وتە ساق بولۋىمىز كەرەك. ءاربىر ءىس بويىنشا مۇقيات تەرگەۋ جۇرگىزۋىمىز قاجەت», دەدى قاسىم-جومارت توقاەۆ.
