مازمۇندى ءىس-شاراعا پارلامەنت سەناتىنىڭ دەپۋتاتى ايگۇل قاپباروۆا, قاراعاندى وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ, قاراعاندى قالالىق ءماسليحاتىنىڭ حاتشىسى قۇدايبەرگەن بەكسۇلتانوۆ جانە زيالى قاۋىم وكىلدەرى قاتىستى.
ۇلت ۇياسى ۇلىتاۋ وڭىرىندەگى بولعان انا كەسەنەسىنە ارحەولوگيالىق زەرتتەۋ جۇمىستارى 2018 جىلى باستالىپ, قازبا جۇمىستارى ناتيجەسىندە ءبىراز قۇندى جادىگەرلەر تابىلعان. بۇل زەرتتەۋلەر ۇلتتىق مۋزەيدىڭ جاۋاپتى عىلىمي قىزمەتكەرى, ارحەولوگ ايبار قاسەنالىنىڭ جەتەكشىلىگىمەن جۇزەگە استى. جاس تالانتتى عالىم بۇعان دەيىنگى تاريحي دەرەكتەردە بولعان انانى شىڭعىس حاننىڭ قىزى نەمەسە كەلىنى دەپ ايتىلىپ كەلگەنىن, بىراق سوڭعى جىلدارداعى گەنەتيكالىق ساراپتامانىڭ الدىن الا ناتيجەسىندە ول جوشى حاننىڭ قىزى دەگەن بولجامدى كەلتىرەدى.
«بولعان انا سۇيەگىنە انتروپولوگيالىق زەرتتەۋ جاپونيا مەن ۇلىبريتانيادا جاسالدى. بۇگىنگى كورمەدە بولعان انانىڭ سول كەزدەگى جاڭعىرتىلعان بەينەسىن قويىپ وتىرمىز. بۇل جۇمىس بىرنەشە انتروپولوگ جانە ءمۇسىنشىنىڭ كومەگىمەن ىسكە استى. ارحەولوگيالىق قازبا جۇمىستارى بولعان انا كەسەنەسىنەن بولەك, جوشى حان, الاشا حان كەسەنەلەرىندە دە جۇرگىزىلدى» دەدى ول.
سونداي-اق كورمەگە بولعان انا كەسەنەسىنەن تابىلعان التىن توستاعان, جىبەك ماتادان تىگىلگەن شاپان, ەر-توقىم, قارۋ-جاراق جانە تاعى باسقا زاتتار قويىلىپ, كوپشىلىك نازارىنا ۇسىنىلدى. عالىمداردىڭ پىكىرىنشە, بۇل جادىگەرلەردىڭ ءبارى التىن وردا داۋىرىنە تيەسىلى. ارحەولوگ, رەستاۆراتور, كونە توقىما تەحنولوگيالارىنىڭ مامانى تاتيانا كرۋپا ۇزىندىعى ءتورت مەتر بولاتىن شاپاننىڭ كوشىرمەسىن جاساعان.
مازمۇندى ءىس-شارا بارىسىندا ءسوز العان قاراعاندى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ: «مەملەكەت باسشىسى ۇلىتاۋدىڭ تاعىلىمعا تولى تاريحىن ۇرپاق تاربيەسىمەن بايلانىستىرا وتىرىپ, ىشكى ءتۋريزمدى دامىتۋعا پايدالانۋ كەرەگىن ايتقان ەدى. ءبىزدىڭ ماقسات – التىن وردا ءداۋىرىنىڭ تاريحىن جۇرتشىلىق اراسىنا كەڭىنەن ناسيحاتتاۋ» دەي كەلىپ, كورمەگە كەلۋشىلەرگە ريزاشىلىعىن ءبىلدىردى.
بولعان انا بەينەسىنىڭ جاڭعىرتىلعان نۇسقاسىن جاساۋعا گيپەررەاليست-ءمۇسىنشى ايدوس ەسماعامبەتوۆ ەكى اي ۋاقىت كەتكەنىن ايتتى.
− بۇعان دەيىن ەلىمىزدىڭ العاشقى قورعانىس ءمينيسترى ساعادات نۇرماعامبەتوۆ, اقش-تىڭ بۇرىنعى پرەزيدەنتى باراك وباما سەكىلدى تانىمال تۇلعالاردىڭ گيپپەررەاليستىك ءمۇسىنىن جاسادىم. ونى جاساۋ ماعان قيىن بولعان جوق, قولىمدا دايىن سۋرەت بولدى. ال بولعان انانىڭ ءمۇسىنىن جاساۋ ءۇشىن ءبىراز ىزدەندىم. ارحەولوگتارمەن جۇمىس ىستەدىم. ولار ماعان عالىمدار جاساعان انتروپولوگيالىق بەينەسىن اكەپ بەردى. سول ارقىلى كەيىپكەرىمنىڭ كوزى, مۇرنى, قاسى, قىسقاسى بەت-الپەتىن قالپىنا كەلتىردىم. ونىڭ ءبارى ماتەماتيكالىق دالدىكپەن ىسكە استى. بىزدە تۇلعالاردىڭ انتروپولوگيالىق بەينەسى شەتەلدە جاسالادى دا, كوبىنەسە ولار ەۋروپالىققا ۇقساپ تۇرادى. ال بولعان انانىڭ بەينەسىن شامام كەلگەنشە, وزىمىزگە, ياعني ازيالىقتارعا جاقىنداتتىم. مۇندا بولعان انانىڭ 45 جاستاعى كەزى, بويى شامامەن 1,65 سم. ءبىر سوزبەن ايتقاندا, مۇسىنگە جان بىتىرۋگە بارىنشا كۇش سالدىم, − دەيدى ءمۇسىنشى.
