پالاتانىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۆولونتەرلىك قىزمەت, قايىرىمدىلىق, مەملەكەتتىك الەۋمەتتىك تاپسىرىس جانە ۇكىمەتتىك ەمەس ۇيىمدارعا ارنالعان گرانتتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالدى.
زاڭنامانى جەتىلدىرۋ شەڭبەرىندە گرانتتىق قارجىلاندىرۋ جۇيەسىن قايتا فورماتتاۋ جانە ۇەۇ-مەن ءوزارا ءىس-قيمىلدىڭ جاڭا تەتىگىن ەنگىزۋ ۇسىنىلادى.
«گرانتتىق قارجىلاندىرۋعا كەلەتىن بولساق, گرانت جۇيەسىنىڭ كەلەسى تۇرلەرىن ەنگىزۋ قاراستىرىلعان: قىسقا مەرزىمدى, ورتا مەرزىمدى جانە ۇزاق مەرزىمدى جوبالار. بۇل رەتتە گرانتتىڭ تۇرىنە بايلانىستى قارجىلاندىرۋ كولەمى, مەرزىمدەرى, ۇەۇ-نىڭ كونكۋرسقا قاتىسۋ شارتتارى جانە ەسەپتىلىككە قويىلاتىن تالاپتار ايقىندالادى. ارينە, مۇنداي ءتاسىل گرانتتىق قارجىلاندىرۋ راسىمدەرىن جەڭىلدەتەدى», دەدى بولات تىلەپوۆ.
ەكىنشىدەن, اتاپ وتىلگەندەي, وزەكتى باعىتتار بويىنشا گرانتتاردى جوسپارلاۋدىڭ جاڭا فورماتىن ەنگىزۋ جوسپارلانۋدا. بۇل گرانتتاردى حالىقتىڭ قاجەتتىلىكتەرىنە تىكەلەي باعىتتايدى. بۇل تەتىك «تومەننەن جوعارى» ءتاسىلىن ەنگىزۋگە مۇمكىندىك بەرەدى. ياعني, ۇەۇ ءوز جوبالارى ارقىلى قوعامداعى وزەكتى ماسەلەلەرگە جەدەل دەن قويىپ, ۋاقىتىلى شەشىم قابىلدايتىن بولادى.
«ۇشىنشىدەن, گرانتتىق ساياساتقا سالالىق ءتاسىلدى كەڭەيتۋ ءۇشىن ورتالىق مەملەكەتتىك ورگاندارعا وپەراتور ارقىلى گرانتتار بەرۋگە قۇزىرەتتەر بەرىلەتىن بولادى. تورتىنشىدەن, گرانتتاردىڭ تيىمدىلىگىن باعالاۋ تەتىگىن ەنگىزۋ كوزدەلگەن. بۇل ۇكىمەتتىك ەمەس ۇيىمدار قىزمەتىنىڭ ساپاسىن انىقتاۋعا, بيۋدجەت شىعىستارىنىڭ تيىمدىلىگىن قاداعالاۋعا جانە گرانتتاردىڭ ومىرشەڭدىگىن باعالاۋعا مۇمكىندىك بەرەدى», دەپ تولىقتىردى بولات تىلەپوۆ.
