«ماۋسىمدىق اۋا رايى بولجامى, قارالىپ وتىرعان ماۋسىم ءۇشىن كليماتتىق شامالاردان (نورما) اۋىتقۋ (انوماليا) تۇرىندە كورسەتىلگەن ورتاشا مەتەورولوگيالىق پارامەترلەردىڭ (اۋا تەمپەراتۋراسى مەن جاۋىن-شاشىن مولشەرى) سيپاتتاماسىن بىلدىرەدى.
2022 جىلعى 15 اقپاندا قازگيدرومەت كوكتەمگە ارنالعان ماۋسىمدىق بولجامنىڭ پيلوتتىق جوباسىن ءۇش ايعا بولە وتىرىپ شىعاردى. بۇدان ءارى, ماۋسىمدىق بولجام جىلىنا التى رەت جاسالاتىن بولادى: جىلى جارتى جىلدىققا ارنالعان 1 بولجام, سۋىق جارتى جىلدىققا ارنالعان 1 بولجام. ولار ءوزارا, قازاقستان رەسپۋبليكاسىنىڭ 14 وبلىسى بويىنشا, قىس, كوكتەم, جاز جانە كۇزگە ارنالعان, توقساندىق بولجاممەن ناقتىلاناتىن بولادى», دەلىنگەن حابارلامادا.
سونىمەن ماۋسىمدىق بولجام:
- 15 اقپان كۇنى كوكتەمگە (ناۋرىز-مامىر);
- 15 ناۋرىزدا جىلى كەزەڭگە ء(ساۋىر-قازان);
- 15 مامىر كۇنى جازعا (ماۋسىم-تامىز);
- 15 تامىزدا كۇزگە (قىركۇيەك-قاراشا);
- قازاننىڭ 15-ءى سۋىق كەزەڭگە (قاراشا-ناۋرىز);
- 15 قاراشادا بولسا قىسقا (جەلتوقسان-اقپان).
كوكتەمدە اۋا تەمپەراتۋراسىنىڭ وڭ انومالياسى بار كۇندەر كوبىرەك بولادى دەپ بولجانۋدا. ماسەلەن, ناۋرىز ايىندا اۋانىڭ ورتاشا تەمپەراتۋراسى رەسپۋبليكانىڭ باسىم بولىگىندە نورمادان 1-2°س جوعارى, باتىس قازاقستان وبلىسىندا, اتىراۋ وبلىسىنىڭ سولتۇستىك-باتىسىندا نورماعا جۋىق بولادى دەپ كۇتىلىپ وتىر.
«ال ءساۋىر ايىندا ەلىمىزدىڭ بارلىق اۋماعىندا اۋا تەمپەراتۋراسى نورمادان 1°س جوعارى بولماق. باتىس قازاقستان وبلىسىندا, شىعىس قازاقستان وبلىسىنىڭ باسىم بولىگىندە, الماتى وبلىسىنىڭ وڭتۇستىك-شىعىسىندا بولسا, نورما شاماسىندا.
الايدا, كوكتەمگى اۋا رايى قىسقى توسىنسىيلار تۋدىرۋى مۇمكىن. سەبەبى وتپەلى ماۋسىمدا سينوپتيكالىق پروتسەستەر وتە تۇراقسىز. وسىلايشا, سۋىق اۋا ماسسالارىنىڭ اعىندارى كەزىندە, قارلى بوران كوبىنەسە سولتۇستىك ايماقتاردا, ال اركتيكالىق انتيتسيكلونداردىڭ كىرۋىمەن وڭتۇستىك ايماقتاردا اياز بولۋى مۇمكىن.
مامىر ايىندا رەسپۋبليكانىڭ باسىم بولىگىندە, اۋانىڭ ورتاشا ايلىق تەمپەراتۋراسى كوپ جىلدىق نورماعا جۋىق بولادى دەپ كۇتىلۋدە. الايدا بىرقاتار وبلىستاردا مامىر كۇندەرى اۋا تەمپەراتۋراسى كليماتتىق نورمادان 1°س تومەن بولادى دەپ بولجانۋدا. اسىرەسە, ەلدىڭ سولتۇستىك, ورتالىق جانە شىعىس وڭىرلەرىندە. بۇل ءسىبىردىڭ اۋداندارىنان سۋىق اۋا ماسسالارىنىڭ اعىپ كەتۋىنە بايلانىستى بولادى دەپ بولجانۋدا», دەپ جازادى سينوپتيكتەر.
ناۋرىز ايىندا رەسپۋبليكانىڭ باسىم بولىگىندە جاۋىن-شاشىن مولشەرى نورماعا جۋىق, ال قازاقستاننىڭ سولتۇستىك-باتىس بولىگىندە نورمادان ارتىق بولادى دەپ بولجانۋدا.
ال ساۋىردە جاۋىن-شاشىن مولشەرى, رەسپۋبليكانىڭ باسىم بولىگىندە, ەلىمىزدىڭ باتىسىندا, قيىر سولتۇستىگىندە, شىعىس قازاقستان جانە الماتى وبلىستارىنىڭ وڭتۇستىك-شىعىس جارتىسىندا, تۇركىستان جانە جامبىل وبلىستارىنىڭ تاۋلى, تاۋ بوكتەرلى اۋداندارىندا نورمادان از بولماق.
مامىر ايىندا بولسا, رەسپۋبليكانىڭ باسىم بولىگىندە جاۋىن-شاشىن مولشەرى نورماعا جۋىق, قىزىلوردا, تۇركىستان, قوستاناي وبلىستارىنىڭ باسىم بولىگىندە, قاراعاندى وبلىسىنىڭ باتىس جارتىسىندا, جامبىل وبلىسىنىڭ سولتۇستىك-باتىس جارتىسىندا, اقتوبە وبلىسىنىڭ وڭتۇستىك-شىعىسىندا نورمادان از بولادى دەپ بولجانادى.
