1950 جىلى تۇساۋى كەسىلگەن بۇل دودا اۋەسقوي بوكستان ەۋروپاداعى ەڭ كونە حالىقارالىق جارىستىڭ ءبىرى سانالادى. سول جىلى ۇيىمداستىرىلعان العاشقى تۋرنيردە بارلىق سالماقتا جەرگىلىكتى سپورتشىلار جەڭىمپاز اتانىپ, حريستو پوپوۆ باسەكەنىڭ ەڭ ۇزدىك بوكسشىسى دەپ تانىلدى. ۋاقىت ۇزاعان سايىن ستراندجا مەموريالىنىڭ گەوگرافياسى كەڭەيىپ, تۋرنيرگە الىس-جاقىن شەتەلدىڭ بوكسشىلارى دا قاتىسا باستادى. ال سارى قۇرلىقتىڭ ەڭ ۇزدىك قۇرامالارى سانالاتىن قازاقستان, وزبەكستان, ءۇندىستان, تايلاند, موڭعوليا, قىتاي, وڭتۇستىك كورەيا, يران, قىرعىز رەسپۋبليكاسى سەكىلدى ەلدەردىڭ بوكسشىلارى بۇل دوداعا ءسال كەيىنىرەك قوسىلدى.
حالىقارالىق ءتۋرنيردىڭ قاناتى كەڭگە جايىلىپ, مارتەبەسىنىڭ ارتۋىنا بۇرىنعى جانە قازىرگى بوكس جۇلدىزدارى زور ۇلەس قوستى. اتاپ ايتقاندا, بولگارياداعى باسەكەگە ءار جىلدارى حەلسينكي وليمپياداسىنىڭ قولا جۇلدەگەرى اناتولي بۋلاكوۆ, ماسكەۋ وليمپياداسىنىڭ چەمپيوندارى كۋبالىق ارماندو مارتينەس پەن بولگاريالىق پەتار لەسوۆ, اتلانتا وليمپياداسىنىڭ جۇلدەگەرى تونچو تونچەۆ, كاسىپقوي بوكستىڭ اسا اۋىر سالماعىنداعى الەمنىڭ ەكس-چەمپيونى بولگاريالىق كۋبرات پۋلەۆ, افينا وليمپياداسىنىڭ كۇمىس جۇلدەگەرى بريتانيالىق امير حان, وليمپيادا جانە الەم چەمپيوندارى رەسەيلىك الەكساندر پوۆەتكين مەن يتاليالىق روبەرتو كاممارەللە, وليمپيادا جەڭىمپازى, كاسىپقوي بوكستان الەمنىڭ ءابسوليۋتتى چەمپيونى ۋكراينالىق الەكساندر ۋسيك, ءۇش دۇركىن وليمپيادا, بەس دۇركىن الەم چەمپيونى كۋبالىق فەليكس ساۆون جانە تاعى باسقا بوكسشىلار وسى تۋرنيردە ونەر كورسەتىپ, جۇلدەگە تالاسقان بولاتىن.
ال جارىستىڭ ەڭ كوپ جەڭىمپازى كىمدەر دەگەن سۇراققا كەلسەك, قازىرگى تاڭدا نەبارى ءتورت بوكسشى عانا حالىقارالىق جارىستا ەكى رەتتەن كوپ باس جۇلدەنى جەڭىپ العان. ونىڭ ۇشەۋى بولگاريالىق بوكسشىلار بولسا, بىرەۋى ۇندىستاندىق سپورتشى. ماسەلەن, تساچو اندرەيكوۆسكي (1974, 1976, 1978, 1979) مەن دانيل پەتروۆ (1994, 1997, 1998, 1999) باسەكەنىڭ ءتورت دۇركىن جەڭىمپازى سانالادى. تاعى ءبىر جەرگىلىكتى بوكسشى سەرافيم تودوروۆ (1989, 1993, 1996) ءۇش رەت تۇعىردىڭ ەڭ بيىك ساتىسىنان كورىنگەن. ال ۇندىستاندىق اميت پانگال بۇل تۋرنيردە 2018 جانە 2019 جىلدارى قاتارىنان ەكى رەت ءوز سالماعىندا ۇزدىك شىققان.
بولگاريا بوكس فەدەراتسياسى تاراتقان اقپارات بويىنشا, بيىلعى ءتۋرنيردىڭ ۋاقىتى ءبىر اپتادان 10 كۇنگە دەيىن ۇزارتىلىپ, جەكپە-جەكتەر سوفياداعى «ميللەنيۋم گراند» قوناقۇيىندە وتەدى. سونداي-اق حالىقارالىق بوكس فەدەراتسياسى (IBA) جارىس جەڭىمپازدارىن ىنتالاندىرۋ ءۇشىن ءىرى كولەمدە قارجىلاي سىياقى تاعايىنداپ وتىر.
ازيا بوكس فەدەراتسياسىنىڭ مالىمەتىنشە, بولگارياداعى باسەكەدە سارى قۇرلىقتىڭ كەيىنگى ونجىلدىقتاعى ەڭ مىقتى بوكسشىلارى قاتىسادى دەپ كۇتىلۋدە. الەمدىك بوكس دەرجاۆالارىنىڭ ءبىرى سانالاتىن قازاقستان قۇراماسى ساپىنان اتالعان جارىستا 26 بوكسشى (ەرلەر جانە ايەلدەر) شارشى الاڭدا ونەر كورسەتەدى. ولاردىڭ قاتارىندا بىلتىرعى الەم بىرىنشىلىگىنىڭ كۇمىس جۇلدەگەرى ماحمۇد سابىرحان مەن جاستار اراسىنداعى الەم جانە ازيا چەمپيوندارى دا بار.
ال وزبەكستان قۇراماسى بولگارياعا 26 بوكسشى اپارماق. الا تاقيالى اعايىندار بۇل تۋرنيردە تاجىريبەلى بوكسشىلارى مەن جاس تالانتتارىنا ءۇمىت ارتادى. اتاپ ايتقاندا, الداعى جارىستا بىلتىرعى الەم چەمپيوناتىنىڭ جۇلدەگەرلەرى ابدۋماليك حالاكوۆ پەن قانداسىمىز ماديار سايدراحيموۆ, ريو وليمپياداسىنىڭ جەڭىمپازى حاسانبوي دۋسماتوۆ جانە ازيا چەمپيونى سايدجامشيد جافاروۆ باق سىنايدى.
بىلتىرعى Strandja-2021 تۋرنيرىندە جەرلەستەرىمىز اسا ءساتتى ونەر كورسەتتى دەپ ايتا المايمىز. ويتكەنى توكيو وليمپياداسىنا بايلانىستى ءبىرىنشى ءنومىرلى بوكسشىلار بۇل تۋرنيرگە قاتىسقان جوق. باپكەرلەر قۇرامى بولگارياعا نەگىزىنەن جاس بوكسشىلاردى الىپ باردى. ولار: ولجاس باينيازوۆ, بەيبارىس جەكسەن, ءساماتالى تولتاەۆ, قۋان قۋاتوۆ, نۇرقانات رايىس, باۋىرجان بايعونشەكوۆ, ساعىندىق توعامباي, ايبولدى داۋرەن ۇلى جانە ءادىل باسىعاراەۆ. تۋرنير قورىتىندىسى بويىنشا 9 بوكسشىمىزدىڭ تەك ەكەۋى عانا جۇلدەگە ىلىكتى. 75 كيلودا جۇدىرىقتاسقان نۇرقانات رايىس پەن جاستار اراسىنداعى ازيا چەمپيونى بەيبارىس جەكسەن (57 كگ) قولا مەدال يەلەندى.
