وڭىرلىك بولىنىسكە سالساق, ەل ازاماتتارىنىڭ باسىم كوپشىلىگى الماتى وبلىسىندا قونىستانعان – 2,1 ملن ادام. ۇزدىك ۇشتىككە سونداي-اق 2,1 ملن اداممەن تۇركىستان وبلىسى, 2 ملن تۇرعىنمەن الماتى قالاسى كىرەدى. بۇل ءۇش ءوڭىر بۇكىل ەل حالقىنىڭ ۇشتەن ءبىرىن قۇرايدى. حالىق ەڭ از قونىستانعان ولكە – سولتۇستىك قازاقستان وبلىسى. تەرىسكەيدەگى جۇرتتىڭ سانى 540 مىڭ ادامدى ماڭايلايدى.
وسى كورسەتكىشتەر فونىنداعى ەڭ قىزىق دەرەك – قازاقستان دەگەن ەسىمى بار 24 ازاماتتىڭ بار ەكەنى. مەملەكەت اتاۋىن يەلەنگەن ازاماتتاردىڭ كوبى اقمولا وبلىسىندا تۇراتىن بولىپ شىقتى. ولاردىڭ سانى – 6 ادام. سونىمەن قاتار قاراعاندى وبلىسىندا – 4, قوستانايدا – 3, شىمكەنتتە – 2, الماتى, باتىس قازاقستان جانە ماڭعىستاۋ وبلىستارىندا 1 قازاقستان ءومىر ءسۇرىپ جاتىر.
بۇدان بولەك قالا اتاۋىن يەلەنگەن قازاقستاندىقتار دا بار. 28 ادامنىڭ ەسىمى سەمەي بولسا, اتا-انالار بالالارىنا الماتى جانە تۇركىستان دەگەن دە ەسىمدەر بەرگەن. سونداي-اق اتىراۋ, تاراز, قوستاناي, اقتاۋ, نۇر-سۇلتان, شىمكەنت, اقتوبە, تالدىقورعان اتاۋىن ەسىم قىلىپ جۇرگەن جاندار دا بارشىلىق.
