«قازگيدرومەت» ۇسىنعان بولجامعا سايكەس, ەل اۋماعىنداعى سينوپتيكالىق جاعدايعا كەتىپ بارا جاتقان تسيكلون مەن انتيتسيكلون سىلەمى اسەر ەتەدى. سونىڭ سالدارىنان قازاقستاننىڭ سولتۇستىگى مەن شىعىسىندا تۇنگى ۋاقىتتا قار جاۋادى.
ال كۇندىز رەسپۋبليكانىڭ باتىس بولىگىندە جاۋىن-شاشىن جانە, قار ارالاس جاڭبىر جاۋى ىقتيمال. مامانداردىڭ مالىمەتىنشە, ەلدىڭ قالعان ايماقتارىندا انتيتسيكلون ىقپالى ساقتالىپ, نەگىزىنەن جاۋىن-شاشىنسىز اۋا رايى قالىپتاسادى.
دەگەنمەن سينوپتيكتەر رەسپۋبليكا اۋماعىندا بىرقاتار قولايسىز قۇبىلىستار بولۋى مۇمكىن ەكەنىن ەسكەرتەدى. اتاپ ايتقاندا, كەي وڭىرلەردە تۇمان ءتۇسىپ, جەل كۇشەيەدى. سولتۇستىك پەن شىعىس وبلىستاردا جاياۋ بۇرقاسىن بولۋى ىقتيمال.
باتىس ايماقتاردا جەلدىڭ كۇشەيۋىمەن بىرگە شاڭدى داۋىل تىركەلۋى مۇمكىن. ماماندار اۋا رايىنىڭ مۇنداي قۇبىلىستارى جول قوزعالىسىنا جانە كۇندەلىكتى تىرشىلىككە اسەر ەتۋى مۇمكىن ەكەنىن ەسكەرتىپ وتىر.
