تاۋەلسىز باقىلاۋشىلار, ازاماتتىق قوعام وكىلدەرى جانە حالىقارالىق ساراپشىلار داۋىس بەرۋ پروتسەسستەرىنىڭ جوعارى دەڭگەيدە ۇيىمداستىرىلعانىن, پروتسەدۋرالاردىڭ اشىق بولعانىن جانە ايتارلىقتاي بۇزۋشىلىقتاردىڭ تىركەلمەگەنىن راستادى.
«ەل داۋىسى» قوعامدىق قورىنىڭ جەتەكشىسى, تانىمال بلوگەر ايدا جەكسەنوۆانىڭ ايتۋىنشا, باقىلاۋشىلار كۇنى بويى داۋىس بەرۋ ۋچاسكەلەرىنە حالىقتىڭ كوپ كەلىپ جاتقانىن اتاپ وتكەن ەكەن. ونىڭ ايتۋىنشا, كەي جەرلەردە ادامدار ۋچاسكە اشىلماي تۇرىپ جينالا باستاعان, ال داۋىس بەرۋشىلەردىڭ اعىنى تۇراقتى بولعان. كەلگەندەر اراسىندا ەگدە جاستاعى ازاماتتار, ستۋدەنتتەر جانە جاستار كوپ بايقالدى.
سونىمەن قاتار, ايدا جەكسەنوۆا «ەل داۋىسى» قورىنىڭ باقىلاۋشىلارى 32 قالادا جۇمىس ىستەگەنىن جانە ازاماتتاردىڭ رەفەرەندۋمعا شىنايى قىزىعۋشىلىق تانىتقانىن جەتكىزدى.
وڭىرلەردە ۇلكەن بەلسەندىلىك تىركەلىپ, ۇلگىلىك ۇيىمداستىرۋ قامتاماسىز ەتىلگەن. تۇركىستان وبلىسىندا «داۋىc» باقىلاۋشىلار كواليتسياسى 922 سايلاۋ ۋچاسكەسىن قامتىعان. وبلىستىق بولىمشەنىڭ جەتەكشىسى باقىتجان اشىرباەۆ بارلىق باقىلاۋشىلار ساعات 5:45-تەن باستاپ ۋچاسكەلەرگە كەلىپ, دايىندىق جۇمىستارىن باستاعانىن حابارلادى.
داۋىس بەرۋ كۇنىنە دەيىن باقىلاۋشىلاردىڭ بارلىعىنا ءتيىستى نۇسقاۋلىق بەرىلىپ, ولار ارنايى وقىتۋدان وتكەن. اشىرباەۆتىڭ ايتۋىنشا, مۇنداي الدىن الا دايىندىق سايلاۋ پروتسەسىن جۇيەلى جانە ساپالى باقىلاۋعا مۇمكىندىك بەرگەن.
حالىقارالىق ۇيىمداردىڭ بايقاۋشىلارى: العاش رەت داۋىس بەرگەندەر سانى كوپ
پاۆلودار وبلىسىندا «داۋىc» كواليتسياسىنىڭ جەرگىلىكتى فيليالىنىڭ جەتەكشىسى الما قوزباەۆانىڭ ايتۋىنشا, باقىلاۋشىلار ءۇشىن ءاربىر كەزەڭنىڭ اشىق ءارى ءادىل ءوتۋى ەرەكشە ماڭىزعا يە بولعان. باقىلاۋشىلار ۋچاسكەلەردى, سونىڭ ىشىندە مۇگەدەكتەر ءۇشىن قولجەتىمدىلىكتى الدىن الا تەكسەرگەن. كۇننىڭ قورىتىندىسى بويىنشا الما قوزباەۆا ازاماتتاردىڭ جاقسى كوڭىل كۇيى مەن ەرەكشە كوپ كەلۋىن اتاپ ءوتتى.
قاراعاندى وبلىسىندا «داۋىc» كواليتسياسىنىڭ فيليالىنىڭ جەتەكشىسى دميتري پولتارەنكو بارلىق ۋچاسكەنىڭ دۇرىس جابدىقتالعانىن, ونىڭ ىشىندە مۇگەدەكتىگى بار ازاماتتار ءۇشىن بارلىق جاعدايدىڭ قاراستىرىلعانىن حابارلادى. پولتارەنكونىڭ پىكىرىنشە, تاۋەلسىز باقىلاۋشىلاردىڭ بەلسەندى جۇمىسى ازاماتتاردىڭ سايلاۋ پروتسەسىنە دەگەن سەنىمىن ارتتىرۋعا جانە قازاقستانداعى دەموكراتيالىق ينستيتۋتتاردى دامىتۋعا سەپتىگىن تيگىزدى.
تانىمال قازاقستاندىق ستەنداپ-كوميك ەۆگەني چەباتكوۆ داۋىس بەردى
كوكشەتاۋدا «ەل داۋىسى» قورىنىڭ باقىلاۋشىسى ەلەونورا دالاباەۆا كۇنى بويى ازاماتتاردى مەملەكەتتەگى وزگەرىستەرگە بەيجاي قاراماۋعا جانە ءوز داۋىسىن بەرۋگە شاقىردى.
تارازداعى №494 سايلاۋ ۋچاسكەسىندە باقىلاۋشى گاۋحار سايلاۋحان كوميسسيا ءوز جۇمىسىن زاڭناماعا تولىق سايكەس جۇرگىزگەنىن, ءاربىر كەزەڭنىڭ باقىلانىپ وتىرعانىن جانە ۋچاسكە اشىلعاننان باستاپ داۋىس بەرۋگە كەلگەندەردىڭ كەزەگى كوپ بولعانىن راستادى. ءبىرىنشى كەلگەندەرگە ەستەلىك سىيلىقتار بەرىلىپ, العاش رەت داۋىس بەرۋشىلەرگە ەرەكشە كوڭىل ءبولىندى.
ورال قالاسىندا جۇمىس ىستەگەن باقىلاۋشى ءاليا ساليەۆا دا پروتسەسس ءادىل ءارى اشىق وتكەنىن راستادى.
رەسپۋبليكالىق رەفەرەندۋم قازاقستاننىڭ ازاماتتىق قوعامىنىڭ ەسەيگەنىن كورسەتتى. داۋىس بەرۋگە ەرەكشە جوعارى قاتىسۋ, ۋچاسكەلەردەگى ءتارتىپ جانە تىڭعىلىقتى دايىندالعان تاۋەلسىز باقىلاۋشىلارمەن قامتاماسىز ەتۋ – ازاماتتاردىڭ داۋىس بەرۋدى جەكە جاۋاپكەرشىلىك پەن سانالى ازاماتتىق تاڭداۋ رەتىندە قابىلداعانىن دالەلدەدى. باقىلاۋشىلاردىڭ بارلىعى داۋىس بەرۋ كەزىندە ايتارلىقتاي زاڭبۇزۋشىلىقتار تىركەلمەگەنىن ءبىر اۋىزدان اتاپ ءوتتى.
