يننوۆاتسيا الاڭىندا وتاندىق ونەرتاپقىشتاردىڭ جاڭا تەحنولوگيالىق جوبالارى تانىستىرىلدى. سونىڭ ءبىرى – جاساندى ينتەللەكت نەگىزىندە قازاق تىلىندەگى اۆتوماتتى سۋردواۋدارمانىڭ جاڭا مودەلىن ازىرلەگەن نۇرزادا امانگەلدىنىڭ جوباسى. بۇل تەحنولوگيا ەستۋ قابىلەتى شەكتەۋلى ازاماتتاردىڭ اقپاراتقا قولجەتىمدىلىگىن ارتتىرۋعا باعىتتالعان.
ال, جاس عالىم ايبەك نيەتقاليەۆ − ينسۋلت سالدارىنان قوزعالۋ قابىلەتى شەكتەلگەن ادامدارعا ارنالعان ەكزوسكەلەت قۇرىلعىسىن تانىستىردى. بۇل تەحنولوگيا قول-اياق قيمىلى شەكتەلگەن ازاماتتاردىڭ قايتا قوزعالۋىنا كومەكتەسىپ, ولاردى كۇندەلىكتى ومىرگە بەيىمدەلۋگە باعىتتالعان.
يننوۆاتسيالىق جوبالاردىڭ قاتارىندا كەنشىلەردىڭ قاۋىپسىزدىگىن كۇشەيتۋگە ارنالعان «Mainsafe» سمارت-قولعابى دا ۇسىنىلدى. قۇرىلعى شاحتا جاعدايىندا جۇمىس ىستەيتىن مامانداردىڭ قوزعالىسىن باقىلاۋعا, قاۋىپتى جاعدايلاردى دەر كەزىندە انىقتاۋعا جانە وندىرىستىك قاۋىپسىزدىكتى كۇشەيتۋگە مۇمكىندىك بەرەدى. مۇنداي تەحنولوگيالار تاۋ-كەن وندىرىسىندەگى ەڭبەك قاۋىپسىزدىگىن ارتتىرۋدا ماڭىزدى ءرول اتقارادى.
ونلاين مارافونعا قوناق رەتىندە «توميريس» ارنايى جاساعىنىڭ وكىلدەرى قاتىسىپ, حالىقارالىق جارىستارداعى تاجىريبەلەرىمەن ءبولىستى. ايتا كەتۋ كەرەك, بۇل جاساق UAE SWAT Challenge حالىقارالىق تۋرنيرىندە ايەلدەر كوماندالارى اراسىندا جوعارى ناتيجە كورسەتكەن.
تۇركيادا ءبىلىم الىپ جاتقان قازاق جاستارى رەفەرەندۋمعا بەلسەندى قاتىستى
مارافوننىڭ ديسكۋسسيا الاڭىندا قوعام ءۇشىن وزەكتى تاقىرىپتار تالقىلاندى. سونىڭ ءبىرى – «كيبەرسپورت – سپورت پا, تاۋەلدىلىك پە؟» ماسەلەسى. بۇگىندە كيبەرسپورت پەن گەيمينگ جاس بۋىننىڭ باستى قىزىعۋشىلىقتارىنىڭ بىرىنە اينالىپ وتىر.
«قازسپورتينۆەست» اق جانىنداعى «بولاشاق ويىندارى» ءتۋرنيرىن ۇيىمداستىرۋ جانە وتكىزۋ جونىندەگى ديرەكتسيانىڭ سپورتتىق ويىندار ءبولىمىنىڭ باسشىسى ەرجان شاكەەۆ كيبەرسپورت يندۋسترياسىنىڭ دامۋ پەرسپەكتيۆالارىنا توقتالىپ, بۇگىنگى تاڭدا كيبەرسپورت تەك ويىن ەمەس, كاسىبي دايىندىقتى, ستراتەگيالىق ويلاۋدى جانە كوماندالىق ۇيلەسىمدى تالاپ ەتەتىن جاڭا باعىتقا اينالىپ كەلە جاتقانىن اتاپ ءوتتى. ونىڭ ايتۋىنشا, جاستاردىڭ بۇل سالامەن دۇرىس ءارى جاۋاپكەرشىلىك پەن اينالىسۋىنا جاعداي جاساۋ ماڭىزدى.
سونىمەن قاتار مارافون بارىسىندا ء«پاتريوتيزمدى قالاي ولشەيمىز؟» تاقىرىبىندا پىكىرتالاس ءوتتى. ديسكۋسسيا بارىسىندا ەلگە دەگەن سۇيىسپەنشىلىك پەن ازاماتتىق جاۋاپكەرشىلىكتىڭ قازىرگى قوعامداعى ماڭىزى, ءپاتريوتيزمدى قالىپتاستىرۋ جولدارى جانە ونىڭ كۇندەلىكتى ومىردەگى كورىنىسى تالقىلاندى.
پارلامەنت سەناتىنىڭ دەپۋتاتى بيبىگۇل جەكسەنباي قازاقستاننىڭ كوك پاسپورتى ەل ابىرويىمەن جاۋاپكەرشىلىگىنىڭ بەلگىسى ەكەنىن اتاپ ءوتتى.
مارافون ءوتىپ جاتقان ناۋرىزناما ونكۇندىگىنىڭ ءبىرى – قايىرىمدىلىق كۇنى اياسىندا «قايىرىمدى جان» نوميناتسياسىنىڭ جەڭىمپازدارى ماراپاتتالدى.
ونلاين مارافون اياسىندا قازاقستان رەسپۋبليكاسىنىڭ ورتالىق رەفەرەندۋم كوميسسياسى جانىنداعى پرەسس-ورتالىق رەفەرەندۋمنىڭ ءوتۋ بارىسى تۋرالى رەسمي اقپاراتتاردى تۇراقتى تۇردە تاراتتى.
