12-تۋردان كەيىنگى جاعداي بويىنشا «اتىراۋ» تۋرنير كەستەسىندە 27 ۇپايمەن كوش باستاعان بولسا, ەكى ويىن كەم وتكىزگەن «قايرات» 25 ۇپايمەن كەلە جاتقان-دى. ەكى ۇجىم اراسىنداعى سەنبى كۇنگى العاشقى ويىندا (13-تۋر) الماتىنىڭ «قايراتى» قارسىلاستارىنىڭ قاقپاسىنا جاۋاپسىز بەس گول سوعىپ, ءىرى ەسەپپەن جەڭىسكە جەتتى. بيىلعى ەۋرو-2022 چەمپيوناتىنىڭ ۇزدىك سۇرمەرگەنى ءبىرجان ورازوۆ ءدۋبلدىڭ اۆتورى اتانسا, ۆيتاو, يگيتا جانە البەرت اقبالىقوۆ ءبىر-ءبىر رەتتەن مەرگەندىك تانىتتى.
كەلەسى كۇنگى ماتچتا (14-تۋر) كوماندالاردىڭ كۇشتەرى تەڭ بولدى – 2:2. دەگەنمەن بۇل كەزدەسۋ دە «قايراتتىڭ» جەڭىسىمەن اياقتالۋى دا مۇمكىن ەدى. الايدا «اتىراۋ» فۋتزالشىلارى تەز ارادا ەسەپتى تەڭەستىرىپ ۇلگەردى. الماتىلىقتار ساپىنان بۇل ويىندا ۆيتاو مەن ءبىرجان ورازوۆ كوزگە تۇسسە, «اتىراۋدان» دەو مەن جاكو اماندوسوۆ گول سوقتى.
ەكى ويىننىڭ قورىتىندىسى بويىنشا «قايرات» 29 ۇپايمەن كوش باسىنا شىقتى. ال «اتىراۋ» 28 ۇپايمەن ەكىنشى ورىنعا ءتۇسىپ قالدى.
