وبلىس اۋماعىنداعى جەرگىلىكتى اۆتوجولدار جەلىسىنىڭ جالپى ۇزىندىعى – 5 082,7 كم. كەشەگە دەيىن وبلىستىق جانە اۋداندىق ماڭىزى بار وسى اۆتوجولدىڭ 34 پايىزى عانا جاقسى جانە قاناعاتتانارلىق جاعدايدا, قالعان 3 349,5 شاقىرىم جول قاناعاتتانارلىقسىز كۇيدە بولدى. مىنە, 2021 جىلعى جۇمىس قورىتىندىسى بويىنشا جاقسى جانە قاناعاتتانارلىق جولدار 150-دەي شاقىرىمعا ۇزارىپ, 1 874,3 كيلومەترگە جەتكەن. ال كەيبىر ەلدى مەكەندەردىڭ جويىلۋىنا بايلانىستى وڭىردەگى اۆتوجولداردىڭ جالپى ۇزىندىعى 320 شاقىرىمعا قىسقارىپتى.
– سوڭعى كورسەتكىش بويىنشا وبلىستاعى جەرگىلىكتى جولداردىڭ 39 پايىزى جاقسى جانە قاناعاتتانارلىق دەگەن دارەجەگە ءوتتى, – دەيدى وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسى ايدار مەنەەۆ. – الايدا بۇل قازاقستان رەسپۋبليكاسى بويىنشا ءالى دە ەڭ تومەنگى كورسەتكىش.
بيىل وبلىستىق جانە اۋداندىق ماڭىزى بار اۆتوموبيل جولدارىندا 37 جوبانى ىسكە اسىرۋ جوسپارلانعان. مۇنىڭ 17-ءسى جاڭا جوبا بولسا, 20 جوبا 2021 جىلى باستالعان اۋىسپالى قۇرىلىستار. وسى ماقساتقا رەسپۋبليكالىق جانە جەرگىلىكتى بيۋدجەتتەن 14,6 ملرد تەڭگە قاراستىرىلىپ وتىر. جىل سوڭىنا دەيىن وسى قاراجاتقا 215 شاقىرىمنان استام جول جوندەۋ جوسپارلاندى.
كەستەگە قاراعاندا, بيىل وبلىستىق مارتەبەدەگى بارباستاۋ – اقجايىق – يندەر اۆتوجولىنىڭ 43-93 شاقىرىم ارالىعى, ءبورلى – اقساي – جىمپيتى جولىنىڭ 68-139 كم ارالىعى, چاپاەۆ – جاڭاقالا – سايحىن جولىنىڭ 130-191 شاقىرىمى قايتا سالىنىپ, تەرەكتى مەن اقساي اراسىنداعى اۆتوجولدىڭ 28-58 شاقىرىمى ورتاشا جوندەۋدەن وتەدى. بۇل ءۇشىن رەسپۋبليكا قازىناسىنان 3 754,019 ملن تەڭگە, وبلىس بيۋدجەتىنەن 509,299 ملن تەڭگە قاراستىرىلعان. جوبانى Uniserv جانە «ايدانا» كومپانيالارى جۇزەگە اسىرماق.
قاڭتارداعى وقيعالاردان كەيىن مەملەكەت باسشىسى قاسىم-جومارت توقاەۆ قازاقستاننىڭ وڭتۇستىك جانە باتىس وڭىرلەرىن دامىتۋعا ارنالعان الەۋمەتتىك جانە بيزنەس باعدارلاماسىن قايتا قاراۋدى جۇكتەگەن بولاتىن. 25 قاڭتاردا باتىس قازاقستان وبلىسىنىڭ اكىمى عالي ەسقاليەۆ پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ تاپسىرماسى بويىنشا ازىرلەنگەن ءوڭىردىڭ 2025 جىلعا دەيىنگى الەۋمەتتىك-ەكونوميكالىق دامۋىنىڭ كەشەندى جوسپارىن تانىستىردى. وسى جوسپاردىڭ ىشىندە ءوڭىردىڭ اۆتوجولدارىن دا جوندەۋ, قايتا سالۋ جوبالارى قاراستىرىلعان.
ء«بىز جەرگىلىكتى حالىق تاراپىنان كوپتەن بەرى ايتىلىپ جۇرگەن ۇسىنىستاردى بولاشاق جوباعا ەنگىزدىك. مىسالى, جاڭاقالا اۋدانىنداعى پياتيمار (10 كم) جانە كوپجاسار (14 كم) اۋىلدارىنا, بوكەيورداسى اۋدانى مۇراتساي (18 كم) اۋىلىنا كىرمە جولداردى جوندەۋ ءۇشىن بۇگىنگى تاڭدا اۆتوموبيل جولدارى كوميتەتىنە بيۋدجەتتىك ءوتىنىم جىبەرىلدى. ەندى رەسپۋبليكالىق بيۋدجەتتىك كوميسسياسى وتىرىسىندا ءبىزدىڭ بيۋدجەتتىك ءوتىنىم ماقۇلدانسا, ءتيىستى قاراجات بولىنەدى. سونداي-اق ەلىمىزدىڭ جالپىۇلتتىق كيەلى نىساندارى قاتارىنا كىرەتىن دادەم اتا – جۇماعازى حازىرەت كەسەنەسىنە اپاراتىن جولدى رەكونسترۋكتسيالاۋعا قاراجات بولۋگە دە بيۋدجەتتىك ءوتىنىم جىبەرىلدى. جولدىڭ ۇزىندىعى 2,616 كم, سوماسى 253 383,7 ملن تەڭگەنى قۇراپ وتىر», دەيدى ايدار مەنەەۆ.
ايتا كەتەيىك, ۇكىمەتكە ۇسىنعان باتىس قازاقستان وبلىسىن كەشەندى دامىتۋ جوسپارى بەكىتىلسە, 2025 جىلعا دەيىن وڭىردەگى جەرگىلىكتى جولداردىڭ 78 پايىزى اسفالتتالماق. بۇل وبلىس ىشىندەگى كولىك قاتىناسىن كۇرت جاقسارتىپ, ەلدىڭ ءال-اۋقاتى دامۋىنا دا زور اسەر ەتەرى ءسوزسىز.
باتىس قازاقستان وبلىسى
