رەسەي استاناسى – ماسكەۋ قالاسىندا 2013 جىلدىڭ «جىل اقىنى» جانە «جىل جازۋشىسى» ۇلتتىق ادەبي سىيلىقتارىنىڭ يەگەرلەرى انىقتالدى. بۇل تۋرالى يتار-تاسس حابارلادى.
وسىعان ارنالعان سالتانات ورتالىق ادەبيەتشىلەر ۇيىندە ءوتتى. «سىيلىقتىڭ مىندەتى – قازىرگى زامانعى ورىس ادەبيەتىن دامىتۋعا ايتارلىقتاي ۇلەس قوسا الاتىن جاڭا تالانتتى اۆتورلاردى ىزدەستىرۋ, سونداي-اق ولاردىڭ شىعارماشىلىعىنا وقىرمانداردىڭ كەڭ اۋقىمىن تارتۋ, - دەپ ءتۇسىندىردى كونكۋرستى ۇيىمداستىرۋشىلار. – سايىسقا رەسەي مەن باسقا دا ەلدەردىڭ جاستارى 16-عا تولعان ازاماتتارى قاتىسا الادى». كونكۋرسقا قاتىسۋعا تالاپ بىلدىرۋشىلەر شىعارمالارىن 700 مىڭنان استام ادەبيەتشىنىڭ باسىن بىرىكتىرىپ وتىرعان «ستيحي.رۋ» جانە «پروزا.رۋ» پورتالدارىنا جونەلتەدى.
ۇيىمداستىرۋ كوميتەتىنىڭ توراعاسى, «ستيحي.رۋ» جانە «پروزا.رۋ» پورتالدارىنىڭ باس ديرەكتورى دميتري كراۆچۋك يتار-تاسس تىلشىسىنە ەكى سىيلىق ادەبي كەڭىستىكتى قالىپتاستىرۋعا ىقپال ەتەتىنىن ايتتى. «ءبىز سىيلىق اينالىمىنىڭ ءوسىپ كەلە جاتقانىنا قۋانىشتىمىز. ۇلكەن قازىلار القاسى بيىل كوپتەگەن كۇشتى اۆتورلاردى اتاپ ءوتتى, - دەدى ول. – ەكى كاتەگوريا بويىنشا اتالىم العان اۆتورلار سانى ءبىر جارىم ەسەگە ءوستى».
بيىلعى ماۋسىمدا «جىل جازۋشىسىنىڭ» فينالىنا 75 جازۋشى شىقسا, «جىل اقىنىنىڭ» اقتىق سىنىنا 150 اقىن ىرىكتەلىپ الىندى. ناتيجەسىندە جازۋشى ۆيورەل لوموۆ پەن اقىن يان برۋشتەين ۇزدىك اتاندى. ەندى ولاردىڭ شىعارمالارى «يۋنوست», «زناميا», «درۋجبا نارودوۆ» جانە باسقا دا جۋرنالداردا جاريالانادى. ولەڭدەر اعىلشىن, پولياك, ۋكراين جانە بەلورۋس تىلدەرىنە اۋدارىلدى.
لاۋرەاتتارعا اق ءمارماردان جاسالعان ءمۇسىن تاپسىرىلدى. جەڭىمپازدار سونداي-اق باسپامەن كىتاپ شىعارۋ جونىندەگى كەلىسىم-شارتقا وتىردى. ولاردى تاراتقاننان تۇسكەن قارجىنىڭ ءبارى اۆتورلارعا بەرىلەدى.
جالپى, «جىل اقىنى» جانە «جىل جازۋشىسى» ۇلتتىق ادەبي سىيلىعىن رەسەي جازۋشىلار وداعى «اۆتورسكايا كنيگا» باسپاسىمەن بىرگە تاعايىندايدى. ونىڭ ۇلكەن قازىلار القاسى قۇرامىنا ءوز ءىسىنىڭ مايتالمانى اتانعان تانىمال ادەبيەتشىلەر تاڭداپ الىنعان. ولاردىڭ قاتارىندا سۆياتوسلاۆ بەلزا, لاريسا ۆاسيلەۆا, ۆلاديمير ۆيشنەۆسكي, يگور ۆولگين, الەكساندر گورودنيتسكي, بوريس گراچەۆسكي, يۋري گرىموۆ, باقىت كەنجەەۆ, ناتاليا نەستەروۆا, ۆالەنتين نيكيتين, مارك روزوۆسكي سەكىلدى تانىمال قالامگەرلەر بار.
مۇرات ايتقوجا.
دەرەككوز: يتار-تاسس.
فوتو: يتار-تاسس.
