وڭىردەگى دەنساۋلىق ساقتاۋ باسقارماسى مەن سانيتاريالىق-ەپيدەميولوگيالىق باقىلاۋ دەپارتامەنتى ماماندارى كوروناۆيرۋس ينفەكتسياسىنىڭ تارالۋىنا بايلانىستى احۋالدى جاريا ەتتى. جىلدىڭ باسىنان بەرى COVID-19 ينفەكتسياسى وبلىستا 4 774 ادامنان انىق,
4 273 ادامنان سيمپتومسىز بايقالعان. 100 مىڭ تۇرعىنعا شاققاندا كورسەتكىش 1 344,2 بولدى. جالپى ەپيدەميا باستالعالى 49 117 ادام وسى اۋرۋدى جۇقتىرسا, 880 ادام COVID-19-دان كوز جۇمعان.
«وڭىردە اقپان ايى باستالعالى كوروناۆيرۋس ينفەكتسياسىنىڭ 1 949 جاعدايى تىركەلدى. بۇل جاعداي جرۆي بەلگىلەرى بويىنشا تەكسەرىلگەن 924 ادامدا, پروفيلاكتيكالىق ماقساتتا تەكسەرىلگەن 880 ادامدا, جاقىن قارىم-قاتىناستا بولعان ادامداردى تەكسەرۋ كەزىندە 130 ادامدا جانە ەپيدەميالىق قاداعالاۋ ماقساتىندا سىناما الىنعان 15 ادامدا انىقتالدى», دەدى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسى مۇحامعالي ارىسپاەۆ.
وبلىس اۋماعىندا 1 اقپاننان بەرى كوروناۆيرۋس ينفەكتسياسىنا پتر ادىسىمەن 12 254 زەرتحانالىق زەرتتەۋ جۇرگىزىلگەن. باتىسقازاقستاندىقتار مۇنداي زەرتحانالارعا ورتا ەسەپپەن تاۋلىگىنە 1 225 مارتە جۇگىنگەن.
رەسەي فەدەراتسياسىمەن اراداعى كەدەن بەكەتتەرىنەن اقپان ايىنىڭ العاشقى ونكۇندىگىندە COVID-19 انىقتاماسىنسىز 300 جولاۋشى وتكەن ەكەن. ولاردان پتر ادىسىمەن COVID-19 تەست الىنىپ, قورىتىندىسىندا 5 ادامنىڭ سىرقات ەكەنى انىقتالعان. سونداي-اق وبلىس ارقىلى حالىقارالىق جۇك تاسىمالداپ جۇرگەن جۇرگىزۋشىلەردىڭ 220-سىندا انىقتاما جوق بولۋى سەبەپتى ولاردان دا پتر ادىسىمەن COVID-19 تەست الىنىپ, قورىتىندىسىندا 13 ادام انىقتالدى. ولار وقشاۋلانىپ, كارانتين ورتالىقتارىنا جاتقىزىلعان.
Ashyq قوسىمشاسى دەرەكتەرى بويىنشا 2022 جىلعى 1 قاڭتاردان بەرى وبلىس اۋماعىندا ازاماتتار سانيتارلىق-كارانتيندىك رەجىمدى 729 رەت بۇزعانى انىقتالدى. ونىڭ ىشىندە, «قىزىل» مارتەبەسى بار 719 ادام جانە «سارى» مارتەبەسى بار 10 ادام تىركەلگەن. وسى ارەكەت ءۇشىن جەكە تۇلعالارعا اكىمشىلىك قۇقىق بۇزۋشىلىق تۋرالى كودەكستىڭ 425-بابى, 1-بولىگى بويىنشا 54 حاتتاما تولتىرىلىپ, 2 481 030 تەڭگەگە ايىپپۇل سالىندى.
ء«دال قازىر وبلىس بويىنشا امبۋلاتورلىق دەڭگەيدە 1 631 ناۋقاس ەم الۋدا, ونىڭ باسىم كوپشىلىگى ورال قالاسىندا. 1 036 ادام اۋرۋدىڭ جەڭىل اعىمىمەن اۋىرعان, 61 ادام – ورتاشا دارەجەدە, 534 ادامدا سىرقات سيمپتومسىز وتۋدە. وڭىردەگى 14 ينفەكتسيالىق ستاتسيوناردا 275 ناۋقاس ەم قابىلداپ جاتىر. اۋرۋحانالاردىڭ تولىمدىلىعى 36,6%, بۇل وتكەن اپتامەن سالىستىرعاندا 16%-عا تومەن», دەيدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ءابدىراحمانوۆا.
دەگەنمەن 21 ناۋقاس جانساقتاۋ بولىمىندە, ونىڭ التاۋى – اسا اۋىر جاعدايدا جاتقانى بەلگىلى بولدى.
وتكەن جىلدان بەرى وسى ىندەتكە شالدىققان 42 053 ادام اۋرۋدان جازىلىپ شىققان. سونىڭ ىشىندە 16 096 ادام ينفەكتسيالىق ستاتسيونارلاردا ەم الىپ شىقسا, 25 957 ادام امبۋلاتورلىق دەڭگەيدە ەمدەلگەن. ارينە, مۇنىڭ ارتىندا اق جەلەڭدى ابزال جانداردىڭ جانكەشتى ەڭبەگى جاتىر.
وبلىس بويىنشا كوروناۆيرۋس ينفەكتسياسىنا قارسى ۆاكتسينالاۋ باستالعاننان ۆاكتسينانىڭ ءى كومپونەنتىمەن 269 140 ادام ەگىلگەن. بۇل جالپى جوسپاردىڭ 64,9%-ىن قۇرايدى. ونىڭ ىشىندە سپۋتنيك V ۆاكتسيناسىن 191 148 ادام, QazVac ۆاكتسيناسىن 21 110 ادام, Hayat-Vax ۆاكتسيناسىن 25 021 ادام, Corona-Vac ۆاكتسيناسىن 7 753 ادام, Vero Cell ۆاكتسيناسىن 24 108 ادام العان.
ۆاكتسينانىڭ ءىى كومپونەنتىمەن بارلىعى 253 515 ادام ەگىلىپتى.
«قازىرگى تاڭدا Pfizer كومپانياسىنىڭ كوميرناتي ۆاكتسيناسىن 9 467 ادام الدى, ونىڭ ىشىندە 4 920-سى ءجاسوسپىرىم, 340-ى جۇكتى جانە 4 207-ءسى بالا ەمىزەتىن ايەلدەر. بۇگىندە وبلىستىڭ 52 349 تۇرعىنى رەۆاكتسينالاۋدان ءوتتى», دەپ مالىمدەيدى ماماندار.
كوۆيدكە قارسى ەكپەنىڭ ءۇشىنشى كەزەڭىنەن وتكەن باتىسقازاقستاندىقتاردىڭ 2 673-ءى سپۋتنيك Lite ۆاكتسيناسىن تاڭداعان. ال Pfizer كومپانياسىنىڭ كوميرناتي ۆاكتسيناسىمەن 2 307 ادام رەۆاكتسينالاندى, ونىڭ ىشىندە 1 052 مەديتسينا قىزمەتكەرى مەن 1 255-ءى – 60 جاستان اسقان ادامدار. ايتا كەتەيىك, بۇل – اقپاننىڭ 11-ىندەگى مالىمەت.
وبلىس اۋماعىندا سپۋتنيك V, QazVac, Vero Cell, Pfizer كومپانياسىنىڭ كوميرناتي, سپۋتنيك Lite ۆاكتسينالارىنىڭ كولەمى جەتكىلىكتى.
باتىس قازاقستان وبلىسى
