پرەزيدەنت نيدەرلاند كورولى ۆيللەم-الەكساندرمەن كەزدەستى

مەملەكەت باسشىسى نۇرسۇلتان نازارباەۆ نيدەرلاند كورولى ۆيللەم-الەكساندرمەن كەزدەستى. بۇل تۋرالى اقوردا. kz حابارلادى. كەزدەسۋدە قازاقستان مەن نيدەرلاند اراسىنداعى ەكىجاقتى ىنتىماقتاستىقتى, سونىڭ ىشىندە مادەني-گۋمانيتارلىق ءوزارا ىقپالداستىق اياسىن كەڭەيتۋ پەرسپەكتيۆالارى تالقىلاندى. نيدەرلاند كورولى قازاقستاننىڭ جانە نۇرسۇلتان نازارباەۆتىڭ جاھاندىق يادرولىق قاۋىپسىزدىكتى نىعايتۋعا زور ۇلەس قوسقانىنا توقتالدى. جوعارى دەڭگەيدەگى تۇراقتى كەزدەسۋلەر ەكى ەل اراسىنداعى قارىم-قاتىناستاردىڭ ودان ءارى دامۋىنا سەپتىگىن تيگىزەتىنى اتاپ ءوتىلدى. پرەزيدەنت نيدەرلاند كورولدىگىنىڭ پرەمەر-ءمينيسترى مارك ريۋتتەمەن دە كەزدەستى. كەزدەسۋ بارىسىندا ەكىجاقتى ىنتىماقتاستىقتىڭ كەڭ اۋقىمداعى ماسەلەلەرى قوزعالدى. بۇعان قوسا, حالىقارالىق كۇن ءتارتىبىنىڭ نەگىزگى جايتتارى, سونىڭ ىشىندە ۋكرايناداعى جاعداي قارالدى.تاراپتار باستى نازاردى يادرولىق قارۋسىزدانۋ جانە يادرولىق قاۋىپسىزدىك ماسەلەلەرىنە, سونداي-اق ساۋدا-ەكونوميكالىق, ينۆەستيتسيالىق, عىلىمي-تەحنيكالىق جانە ەنەرگەتيكالىق ىنتىماقتاستىق اياسىن كەڭەيتۋ باعىتتارىنا اۋداردى.سونداي-اق, تاراپتار ەرتەڭ گااگا قالاسىندا وتەدى دەپ جوسپارلانعان يادرولىق قاۋىپسىزدىك جونىندەگى جاھاندىق سامميت باعدارلاماسىن تالقىلادى. نۇرسۇلتان نازارباەۆ قازاقستان ءۇشىن نيدەرلاند ەۋروپالىق وداقتاعى نەگىزگى جانە پەرسپەكتيۆالىق سەرىكتەسىنىڭ ءبىرى ەكەنىنە توقتالىپ ءوتتى. ونىڭ ايشىقتى ايعاعى – ەكى ەلدىڭ ءتۇرلى سالالارداعى بەلسەندى ساۋدا-ينۆەستيتسيالىق ىنتىماقتاستىعى. نيدەرلاند ەلىمىزدىڭ ەكونوميكاسىنا سالىنعان ينۆەستيتسيا كولەمى جونىنەن ءبىرىنشى جانە ساۋدا سەرىكتەستەرىمىز اراسىندا جەتەكشى ورىن الادى, قازاقستاندا گوللاند كاپيتالى سالىنعان 800-گە جۋىق كومپانيا ءوز قىزمەتىن جۇزەگە اسىرۋدا. مەملەكەت باسشىسى اۋىل شارۋاشىلىعى مەن يننوۆاتسيالىق سالاداعى ەكىجاقتى ءوزارا ىقپالداستىقتىڭ ماڭىزدىلىعىن اتاپ ءوتتى, سونداي-اق گوللاند كومپانيالارىن استاناداعى ەكسپو-2017 دۇنيەجۇزىلىك كورمەسىنىڭ جۇمىسىنا بەلسەنە قاتىسۋعا شاقىردى.سونىمەن قاتار, تاراپتار سۋ رەسۋرستارىن ءتيىمدى باسقارۋ جانە ەكولوگيا, ەكى ەلدىڭ ترانزيت-كولىك الەۋەتى مەن لوگيستيكالىق  ينفراقۇرىلىمىن دامىتۋ ماسەلەلەرىن تالقىلادى. كەزدەسۋ قورىتىندىسىندا قازاقستان رەسپۋبليكاسى سىرتقى ىستەر مينيسترلىگى مەن نيدەرلاند كورولدىگى سىرتقى ىستەر مينيسترلىگى اراسىنداعى ساياسي كونسۋلتاتسيالار بويىنشا ءوزارا تۇسىنىستىك تۋرالى مەموراندۋمعا, قازاقستان – نيدەرلاند ىسكەرلىك كەڭەسىن قۇرۋ تۋرالى كەلىسىمگە قول قويىلدى. دەرەككوز: اقوردا. kz. فوتو: Ortcom.kz.