بۇل كۇندەرى ەڭ ۇزدىك ناتيجەگە شورت-ترەكشىلەرىمىز قول جەتكىزدى. انىعىن ايتقاندا, ورال قالاسىنىڭ تۋماسى ءادىل عالياحمەتوۆ 1 500 مەترگە جارىسۋدا الەمنىڭ ەڭ مىقتى دەگەن 8 سپورتشىسىنىڭ قاتارىنان كورىنىپ, وليمپيا ويىندارىنىڭ فينالىندا باق سىنادى. بۇل – ءادىل عالياحمەتوۆ ءۇشىن ۇلكەن جەتىستىك. سەبەبى ول ەرەسەكتەر اراسىنداعى وليمپياداعا تۇڭعىش رەت قاتىسىپ, ءبىرىنشى مۇمكىندىگىندە-اق فينالعا جولداما الدى.
23 جاستاعى وتانداسىمىز ء«ا» دەگەننەن شيرەك فينال باسەكەسىن ءساتتى باستادى. جارتىلاي فينالدا قانداسىمىز ءبىراز ۋاقىت كوش باسىندا كەلە جاتتى. مارەگە جاقىنداعان تۇستا ونى قارسىلاستارى باسىپ وزىپ, كەيىن ءادىل قايتادان شابۋىلعا شىققان بولاتىن. وسى تۇستا قىتايلىق جەن تسزە ۆەي العا وزباق بولعان قازاقستاندىق سپورتشىعا قارسى ويىن ەرەجەسىن بۇزىپ, جارىس جولاعىنان شىعارىپ جىبەردى. تورەشىلەر ەرەجە بۇزىلعان ءساتتى ۇزاق ۋاقىت تالقىلاپ, ناتيجەسىندە قىتايلىق سپورتشىعا پەنالتي بەرىپ, جارىستان شەتتەتتى. ال ءادىل ا فينالىنا تىكەلەي جولداما الدى.
وتانداسىمىز وليمپيادانىڭ التىنى ءۇشىن وتكەن جارىستا الەمنىڭ مىقتىلارىمەن ءبىر قاتاردا ونەر كورسەتىپ, سەگىزىنشى ورىنعا تابان تىرەدى. بۇل قاشىقتىقتا التىندى 2016 جىلعى جاسوسپىرىمدەر وليمپياداسىنىڭ جەڭىمپازى, الەمنىڭ ءتورت دۇركىن چەمپيونى وڭتۇستىككورەيالىق حۆان دە حون, كۇمىستى ءتورت قۇرلىق چەمپيوناتىنىڭ بەس دۇركىن كۇمىس جۇلدەگەرى كانادالىق ستيۆەن ديۋبۋا, قولانى قازاقستان قۇراماسىمەن بىرگە جاتتىعاتىن رەسەيلىك سەمەن ەليستراتوۆ يەلەندى. ەليستراتوۆ 2014 جىلى سوچيدە كوماندالىق جارىستا التىن السا, ءتورت جىل بۇرىنعى پحەنچحان وليمپياداسىندا 1 500 مەتردە قولا مەدالدى ولجالاعان ەدى.
وكىنىشكە قاراي, 1 500 مەتردە باق سىناعان تاعى ءبىر جەرلەسىمىز دەنيس نيكيشا شيرەك فينالدا قۇلاپ, وزىمەن بىرگە كانادالىق سپورتشىنى دا جارىس جولىنان شىعارىپ جىبەردى. ءسويتىپ ول جارتىلاي فينالدان تىس قالدى. سونىمەن قاتار ايەلدەر اراسىندا 1000 مەترگە جۇگىرۋدە ىرىكتەۋ جارىستارىنا قاتىسقان ولگا تيحونوۆا دا قارسىلاسىنا سوقتىعىسىپ قۇلاپ قالدى. ءسويتىپ, تورەشىلەر تيحونوۆانى دا جارىستان شەتتەتتى. ەندى ول 16 اقپان كۇنى
1 500 مەترگە جۇگىرۋدەن سىنعا تۇسەدى.
فينالدىق باسەكەدەن كەيىن ءادىل عالياحمەتوۆ باق وكىلدەرىنە ارناپ سۇحبات بەردى. ول ءوزىنىڭ تۇڭعىش وليمپياداسىندا فينالعا شىققانىن ۇلكەن جەتىستىككە بالاپ, الداعى ءىرى جارىستاردا شەبەرلىگىن شىڭداي تۇسەتىنىن ايتتى. «وسى وليمپياداعا قاتىسىپ, فينالعا شىققانىم ءۇشىن ەرەكشە قۋانىشتىمىن. سەبەبى بۇل – مەنىڭ العاشقى وليمپيادام. سوندىقتان كىل مىقتىلارمەن بىرگە جۇلدەگە تالاسۋ مەن ءۇشىن ۇلكەن تاجىريبە بولدى. فينالدىڭ سوڭىنا قاراي كۇشىم جەتپەي قالدى. مويىنداۋ كەرەك. ەندى كەلەسى وليمپياداعا دەيىن تاجىريبەمدى ارتتىرىپ, تالاي الەمدىك سىندارعا قاتىسىپ, جۇلدە الۋعا تىرىسامىن. بۇل ناتيجەنى ءوزىم سەنىممەن العا باسقان قادامىم دەپ ەسەپتەيمىن. ءبىر قىزىعى, بيىلعى ماۋسىمدا ەكى رەت فينالعا شىقتىم. ەكەۋىندە دە بەيجىڭ ايدىنىندا ونەر كورسەتتىم. الەم كۋبوگىندا كۇمىس الىپ ەدىم, بۇل جولى جۇلدە بۇيىرمادى. دەسە دە, ماعان ۇلكەن سەنىم سىيلاعان جارىس بولدى. فينالداعى قارسىلاستارىمنىڭ بارلىعىن بالا كۇنىمنەن بىلەمىن. ولاردىڭ جارىسقان ءساتىن تەلەديداردان كورىپ وسكەنمىن. وسى ورايدا, ءبىزدى ۇنەمى العا جەتەلەيتىن باپكەرىمىز مادىعالي قارسىبەكوۆكە, دارىگەر, ماسساجشى, پسيحولوگتەرگە راحمەت», دەدى ول.
ءادىل 2017 جىلدان بەرى قازاقستان قۇراماسى ساپىندا ونەر كورسەتىپ كەلەدى. سول ۋاقىتتان بەرى ول الەم چەمپيوناتتارى مەن الەم كۋبوگى كەزەڭدەرىندە ەل نامىسىن قورعاپ, 2021 جىلدىڭ قازانىندا بەيجىڭدەگى الەم كۋبوگى كەزەڭىندە 1 500 مەتردە كۇمىس مەدال العان. 2021 جىلى نيدەرلاندتاعى الەم چەمپيوناتىندا 1 500 مەترلىك جارىستا 9-ورىنعا تابان تىرەگەن. سونداي-اق بەيجىڭ وليمپياداسىندا ارالاس كوماندالىق ەستافەتادا 5-ورىن يەلەنگەن-ءدى.
شورت-ترەكتەن قازاقستان كومانداسىنىڭ باس باپكەرى مادىعالي قارسىبەكوۆ 1 500 مەتردە فينالدا ونەر كورسەتكەن شاكىرتىنە جوعارى باعا بەردى. ء«ادىل ءوزىنىڭ تۇڭعىش وليمپياداسىندا فينالعا شىعىپ, ۇزدىك سەگىزدىككە ەنىپ وتىر. بۇل – تورتجىلدىق دوداسىنا العاش قاتىسقان سپورتشى ءۇشىن ۇلكەن جەتىستىك. ءادىل بيىلعى ماۋسىمدا ناتيجەسىن جاقسارتا ءتۇستى. الەم كۋبوگى كەزەڭىندە كۇمىس مەدال الدى. مىنە, ەندى وليمپيادانىڭ فينالىندا ۇزدىكتەرمەن يىق تىرەستىرىپ, جۇلدەگە تالاسا الاتىنىن كورسەتتى. ودان بولەك, ارالاس ەستافەتادا باق سىنادى. الدا 500 مەترلىك جارىس بار. سول سىندا ءادىل عالياحمەتوۆ, ابزال اجىعاليەۆ پەن دەنيس نيكيشا ەل نامىسىن قورعايدى», دەدى باس باپكەر.
شاڭعى قوسسايىسىندا قازاقستان قۇراماسىنان جالعىز ءوزى قاتىسىپ جاتقان شىڭعىس راكپاروۆ كوش سوڭىندا قالىپ قويدى. الدىمەن سپورتشىلار شاڭعىمەن تۇعىردان سەكىرۋدەن سىنعا ءتۇستى. بۇل سىندا جەرلەسىمىز 79,5 مەترگە سەكىرىپ, قورىتىندى ەسەپتە 69,9 ۇپاي يەلەندى. ال شاڭعىمەن جارىسۋدا ول جارىس جولىنا 38-ءشى بولىپ شىعىپ, مارە سىزىعىن 41-ءشى بولىپ كەستى. بۇل سىندا التىن مەدالدى گەرمانيالىق ۆينچەنتس گايگەر جەڭىپ الدى. ەكىنشى ورىنعا نورۆەگيالىق يورگەن گرااباك, ءۇشىنشى ساتىعا اۋستريالىق لۋكاس گرايدەرەر جايعاستى.
ايەلدەر اراسىنداعى شاڭعىشىلاردىڭ سكياتلون جارىسىندا نورۆەگيالىق تەرەزا يوحاۋگ جاسىنداي جارقىلدادى. ول قاتارىنان ەكىنشى جارىستا وليمپيادا چەمپيونى اتانىپ وتىر. كۇمىس جۇلدەنى موينىنا ىلگەن فينليانديالىق كەرتتۋ نيسكانەن وسىمەن ءۇشىنشى وليمپياداسىندا ەكىنشى ورىنعا تابان تىرەدى. نيسكانەن سوچيدەگى دودادا كوماندالىق جانە ەستافەتادا كۇمىس العان ەدى. قولا جۇلدە كەرتتۋدىڭ وتانداسى, بۇعان دەيىنگى وليمپيا ويىندارىنىڭ كۇمىس جانە قولا جۇلدەگەرى كريستا پيارمياكوسكيگە بۇيىردى.
قازاقستاندىق شاڭعىشى قىزدار بۇل جولى دا ۇزدىك 50 سپورتشىنىڭ قاتارىنا ەنە الماي, جانكۇيەرلەردى جەرگە قاراتتى. اتاپ ايتقاندا, انگەلينا شۋرىگا مارەگە – 52-ءشى, كسەنيا شالىگينا – 53-ءشى, نادەجدا ستەپاشكينا – 57-ءشى جانە ۆالەريا تيۋلەنەۆا 59-شى بولىپ جەتتى.
