– وسىنداي سەبەپپەن ومىرلىك قيىن جاعدايدا قالعان ادامداردى قايتا الەۋمەتتەندىرۋگە ارنالعان ورتالىقتا تۇرۋىنا ءماجبۇر بولدى. بۇعان دەيىن وعان الەۋمەتتىك كومەك تاعايىندالماعان. اتىراۋ قالالىق اكىمدىگىنىڭ تىكەلەي قولداۋىمەن بۇل ماسەلە ءوز شەشىمىن تاپتى. ونىڭ ەكىنشى توپتاعى مۇگەدەكتىگى مەن جەكە باسىن كۋالاندىراتىن قۇجاتتاردى دايىنداپ بەردىك. ەندى ول الەۋمەتتىك جاردەماقى الاتىن بولدى. ەڭ باستىسى, قازاقستان رەسپۋبليكاسىنىڭ ازاماتتىعىن الدى. اكىمدىك تاراپىنان ارنايى الەۋمەتتىك قىزمەتكەر ءبولىندى, – دەيدى اتىراۋ قالالىق جۇمىسپەن قامتۋ, الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمى باسشىسى نۇرلى حابيەۆا.
قازىر پاتەر قۇجاتىن قانداستىڭ اتىنا راسىمدەۋ جۇرگىزىلىپ جاتىر. پاتەرىنىڭ كوممۋنالدىق قىزمەتتەرگە بەرەشەگى تولىعىمەن وتەلىپ, تۇرمىسقا قاجەتتى زاتتارمەن, كيىممەن قامتىلعان.
ال وبلىستىق پوليتسيا دەپارتامەنتى كوشى-قون قىزمەتى باسقارماسىنىڭ باستىعى رۋسلان ءادىلوۆتىڭ ايتۋىنشا, ەلىمىزدە ازاماتتىق الۋدىڭ جەڭىلدەتىلگەن ءتارتىبى 2020 جىلعى تامىز ايىنان بەرى قولدانىسقا ەنگىزىلگەن. بۇل مۇمكىندىكتى رەسەي فەدەراتسياسى مەن وزبەكستان رەسپۋبليكاسىنان كوشىپ كەلگەن قانداستار پايدالانا باستاعان.
– قانداستار ءبىر مەزگىلدە قازاقستان رەسپۋبليكاسىنىڭ ازاماتتىعى جانە تۇراقتى تۇرۋعا ىقتيارحات الۋ ءۇشىن قۇجاتتار مەن ءوتىنىشتى بەرە الادى. مۇنداي قۇجاتتار مەن ءوتىنىشتى قاراستىرۋ مەرزىمى شامامەن ءۇش ايعا سوزىلادى. جىل باسىنان رەسەي فەدەراتسياسى مەن وزبەكستان رەسپۋبليكاسىنان كوشىپ كەلگەن 16 قانداس قازاقستاننىڭ ازاماتتىعىن الدى, – دەيدى پوليتسيا پولكوۆنيگى ر.ءادىلوۆ.
قازاقستان رەسپۋبليكاسىنىڭ ازاماتتىعىن جەڭىلدەتىلگەن تارتىپپەن يەلەنگەن قانداستىڭ قاتارىندا قۋانىشبەك بازارباەۆ تا بار. جاسى – 24-تە.
– بۇرىن وزبەكستان رەسپۋبليكاسىندا تۇرعان ەدىم. اتاجۇرتىمىزعا كوشىپ كەلىپ, قازاقستاننىڭ ازاماتى اتاندىم. قۋانىشىمدا شەك جوق. ەلدىڭ ازاماتى اتانعاننان ارتىق قۋانىش بولا ما؟ ەندى ەلىمىزدىڭ وركەندەۋىنە ۇلەسىمدى قوسۋدى ماقسات ەتىپ وتىرمىن. كوشى-قون قىزمەتىنىڭ قىزمەتكەرلەرى ازاماتتىق الۋدىڭ جەڭىلدەتىلگەن ءتارتىبىن ءتۇسىندىرىپ, قولداۋ كورسەتكەنى ءۇشىن العىس ايتامىن, – دەيدى ق.بازارباەۆ.
اتىراۋ وبلىسى
