سونىمەن قاتار, باسقوسۋدىڭ ۇيىمداستىرىلۋىنا ازەربايجان رەسپۋبليكاسىنىڭ رەسەي فەدەراتسياسىنداعى ەلشىلىگى, وزبەكستان رەسپۋبليكاسىنىڭ رەسەي فەدەراتسياسىنداعى ەلشىلىگى, گەيدار اليەۆ قورىنىڭ رەسەيدەگى وكىلدىگى قولداۋ ءبىلدىردى.
ايتا كەتۋ كەرەك, ونلاين فورماتتا وتكەن القالى جيىن نيزامي گانجاۋيدىڭ 880 جىلدىعى مەن الىشەر ناۋايدىڭ 580 جىلدىعىنا وراي ۇيىمداستىرىلدى.
كەلەلى باسقوسۋعا ازەربايجان, قازاقستان, وزبەكستان, رەسەي, تاجىكستان ەلدەرىنىڭ كورنەكتى مەملەكەت جانە قوعام قايراتكەرلەرى, زيالى قاۋىم وكىلدەرى, تانىمال شىعىستانۋشى عالىمدار مەن تۇركولوگتار جانە ەلشىلەر مەن ديپلوماتتار قاتىستى.
جيىندى م.ۆ. لومونوسوۆ اتىنداعى ممۋ ازيا جانە افريكا ەلدەرى ينستيتۋتى ورتالىق ازيا جانە كاۆكاز ەلدەرى كافەدراسىنىڭ مەڭگەرۋشىسى, پروفەسسور جىبەك سىزدىقوۆا جۇرگىزىپ وتىردى.
تاعىلىمدى ءىس-شارانىڭ اشىلۋ سالتاناتىنا حالىقارالىق تۇركى اكادەمياسىنىڭ پرەزيدەنتى دارحان قىدىرالى, م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتى ازيا جانە افريكا ەلدەرى ينستيتۋتىنىڭ ديرەكتورى الەكسەي ماسلوۆ, ازەربايجان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى پولاد بۋلبۋل وگلى, وزبەكستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى بوتيرجون اسادوۆ, ەۋرازيا حالىقتارى اسسامبلەياسى باس حاتشىسىنىڭ ءبىرىنشى ورىنباسارى – باس حاتشىلىق مەڭگەرۋشىسى, رەسەي فەدەراتسياسى پرەزيدەنتى جانىنداعى ۇلتارالىق قاتىناستار جونىندەگى كەڭەستىڭ مۇشەسى, رەسەي حالىقتارى اسسامبلەياسى كەڭەسىنىڭ ءتورايىمى سۆەتلانا سميرنوۆا, تاشكەنت مەملەكەتتىك شىعىستانۋ ۋنيۆەرسيتەتىنىڭ رەكتورى گۇلچەحرا ريحسيەۆا قاتىسىپ, قۇتتىقتاۋ ءسوز سويلەدى.
.JPG)
ءوز كەزەگىندە اكادەميا باسشىسى د.قىدىرالى پوەزيا, ادەبيەت جانە عىلىم حالىقتاردى جاقىنداستىراتىنىن اتاپ ءوتتى.
«نيزامي گانجاۋي مەن الىشەر ءناۋايدىڭ الەمدىك مادەنيەتتىڭ ۇلى مۇراسى سانالاتىن جاۋھار جىرلارى تەك شىعىستىڭ عانا ەمەس, بۇكىل ادامزاتتىڭ باعا جەتپەس رۋحاني بايلىعى. جالپى, XII-XVI عاسىرلار شىعىس ادەبيەتىندە قايتا ورلەۋ ءداۋىرى دەپ اتالادى جانە بۇعان نيزامي گانجاۋي, الىشەر ناۋاي سىندى تۇلعالاردىڭ سىڭىرگەن ەڭبەگى زور», - دەدى د. قىدىرالى.
سونىمەن قاتار, اكادەميا پرەزيدەنتى نيزاميدەن كەيىن الىشەر ناۋاي باستاعان جۇزدەگەن اقىن-جازۋشىلار ونىڭ شىعارماشىلىعىنان تامىر تارتىپ, وزىق يدەيالارىن دامىتقاندىعىن اتاپ ءوتتى. ماسەلەن, قازاق ۇلى اقىنى اباي قۇنانباي ۇلى نيزامي مەن ناۋايدى ءوزىنىڭ ۇستازى ساناپ, ءپىر تۇتقان.
«شىعىس پەن باتىسقا ورتاق نيزامي مەن ناۋاي شىعارمالارىنداعى رۋحاني قۇندىلىقتار قازىرگى ەۋرازيا كەڭىستىگىندەگى عىلىمي-گۋمانيتارلىق ينتەگراتسيا جاعدايىندا دا وزەكتى», - دەدى د. قىدىرالى.
.JPG)
سونىمەن قاتار, ول نيزامي جانە ناۋاي سىندى ۇلى ويشىلداردىڭ شىعارماشىلىعىن زەرتتەۋ جانە ناسيحاتتاۋ اكادەميانىڭ باسىمدىقتارىنىڭ ءبىرى ەكەنىن اتاپ ءوتىپ, ۇيىمنىڭ «الىشەر ناۋاي» التىن مەدالىن تاعايىنداعانىن مالىمدەدى.
ءسوزىنىڭ سوڭىندا د.قىدىرالى حالىقارالىق تۇركى اكادەمياسىنىڭ نيزامي مەن ناۋاي شىعارماشىلىعىنا ارنالعان جۇمىستارى تۋرالى بايانداپ, كونفەرەنتسياعا قاتىسۋشى عىلىمي ۇيىمدارمەن تابىستى ىنتىماقتاستىعىنا تىلەك ءبىلدىردى.
جيىننىڭ پلەنارلىق وتىرىسىندا «رۋكوپيسي اليشەرا ناۆوي ۆ سوبرانياح كازاني» (قازان جيناقتارىنداعى الىشەر ناۋاي قولجازبالارى) اتتى كىتاپتىڭ تانىستىرىلىمى ءوتتى.
بۇدان كەيىن ازەربايجان, قازاقستان, قىرعىزستان, وزبەكستان, رەسەي, تاجىكستان جانە ت.ب. شەت ەلدەردىڭ عالىمدارى قاتىسقان جيىن ءتورت تاقىرىپ بويىنشا ارنايى سەكتسيالىق وتىرىستارعا جالعاستى. سەكتسيالىق وتىرىستا ازەربايجان ۇلتتىق عىلىم اكادەمياسىنىڭ ۆيتسە-پرەزيدەنتى, نيزامي گانجاۋي اتىنداعى ادەبيەت ينستيتۋتىنىڭ باس ديرەكتور يسا گابيببەيلي, شىعىس مەملەكەتتىك مۇراجايى ديرەكتورىنىڭ ورىنباسارى يليا زايتسەۆ, ا.م. گوركي اتىنداعى الەم ادەبيەتى ينستيتۋتىنىڭ عىلىمي جەتەكشىسى الەكساندر كۋدەلين, الىشەر ناۋاي حالىقارالىق قوعامدىق بىرلەستىگىنىڭ جەتەكشىسى ۋلۋگبەك ساتتوروۆ جانە تاعى دا باسقا بەلگىلى عالىمدار بايانداما جاسادى.
ايتا كەتۋ كەرەك, حالىقارالىق تۇركى اكادەمياسى بىلتىر الىشەر ناۋاي مەن نيزامي گانجاۋي جىلىن جاريالاپ, ۇلى اقىنداردىڭ ەڭبەكتەرىن باسىپ شىعارىپ, تۇساۋكەسەر ءراسىمىن وتكىزگەن بولاتىن.
