قازاقستاندىق جانكۇيەرلەر فريستايلشى يۋليا گالىشەۆانىڭ جارىس جولىنا شىعۋىن تاعاتسىزدانا كۇتىپ, كونكيمەن جۇگىرۋشى نادەجدا موروزوۆانىڭ دا جولىنا سونداي ۇلكەن ۇمىتپەن قارادى. سەبەبى وتانداسىمىز بىرەر كۇن بۇرىن 3000 مەتر قاشىقتىقتا 30 سپورتشىنىڭ ىشىندە 13-ورىنعا تۇراقتاپ, باسەكەدەن كەيىن باق وكىلدەرىنە بەرگەن سۇحباتىندا بار كۇشىن 1500 مەتر قاشىقتىقتاعى جارىسقا سالاتىنىن جانە مىندەتتى تۇردە ءبىر جۇلدە بولاتىنىن ايتقان. «بۇدان دا جاقسى, بۇدان دا جىلدام ناتيجە كورسەتكىم كەلەدى. ەندى بار كۇشىمدى 1500 مەتر قاشىقتىقتاعى جارىسقا سالامىن. بەيجىڭدەگى مۇز ايدىنى ءبىز ءۇشىن ىڭعايلى. قازاقستانعا مەدال اكەلەتىنىمە 100 پايىز سەنىمدىمىن», دەدى نادەجدا موروزوۆا جارىستان كەيىن.
نادەجدانىڭ بۇلاي سەنىمدى سويلەۋىنە دە نەگىز بار ەدى. ويتكەنى 1500 مەتر – ونىڭ وڭ جامباسىنا كەلەتىن قاشىقتىق. ماسەلەن, ول بىلتىر قاراشا ايىندا الەم كۋبوگى جارىسىنىڭ پولشاداعى كەزەڭىندە 1500 مەتردى 01:56.92 ۋاقىتتا باعىندىرىپ, ۇزدىك ۇشتىكتىڭ قاتارىنان كورىندى. ءبىرىنشى جانە ەكىنشى ورىن العان جاپونيالىق ميحو تاكاگي مەن اقش وكىلى بوۋي بريتتاني بۇل قاشىقتىقتى 01:56.00 جانە 01:56.60 ۋاقىت كورسەتكىشىمەن باسىپ وتكەن بولاتىن.
موروزوۆا كەشەگى باسەكەدە جوعارىداعى ناتيجەسىن ءسال جاقسارتقانىمەن, ۇزدىك ۇشتىك بىلاي تۇرسىن, توپ-10 سپورتشىنىڭ قاتارىنان دا كورىنە المادى. بەيجىڭدەگى «ۇلتتىق كونكيمەن جۇگىرۋ» سپورت كەشەنىندە وتكەن جارىستا نادەجدا موروزوۆا 01:56.85 ۋاقىت كورسەتكىشىمەن 14-ورىنعا تۇراقتادى. ال تۋ ۇستاۋشى ەكاتەرينا ايدوۆا بۇل قاشىقتىقتى 1:59.01 ۋاقىتتا ءجۇرىپ ءوتىپ, جارىستى 18-ورىنمەن اياقتادى.
1500 مەتر قاشىقتىققا جارىسۋدا وليمپيادا رەكوردىن جاڭارتقان نيدەرلاند وكىلى يرەن ۆيۋست توپ جاردى. ونىڭ ۋاقىت كورسەتكىشى – 1:53.28. بۇل – ونىڭ وليمپيا ويىندارىنداعى التىنشى التىن مەدالى. ال 1500 مەتردەگى ءۇشىنشى باس جۇلدەسى. كۇمىس جۇلدەنى جاپونيالىق ميحا تاكاگي (1:53.72) يەلەنسە, ۇزدىك ۇشتىكتى تاعى ءبىر نيدەرلاند سپورتشىسى انتۋانەتتە دە يونگ (1:54.82) تۇيىندەدى.
بياتلونشىلاردىڭ جەكەلەي باسەكەسىندە ەل نامىسىن قورعاعان گالينا ۆيشنەۆسكايا-شەپورەنكو ۇزدىكتەر قاتارىنان كورىنە المادى. جەرلەسىمىز 15 شاقىرىمدىق جارىستىڭ ءتورت وق اتۋ ساتىندە ءبىر عانا قاتەلىك جىبەرسە دە, جالپى ەسەپتە نەبارى 44-ورىننان كورىندى. ءبىر ايتا كەتەرلىگى, گالينا ۆيشنەۆسكايا بيىلعى بياتلون ماۋسىمىندا نىسانا كوزدەۋدەن ءتاۋىر ناتيجە كورسەتىپ كەلەدى. الايدا ونىڭ جىلدامدىعى وزگە سپورتشىلاردان كەمشىن ءتۇسىپ جاتىر. ەگەر الداعى ۋاقىتتا جىلدامدىعىن ارتتىرۋعا جۇمىس ىستەسە, الەم كۋبوگى جارىستارىندا جوعارى ورىنداردان كورىنۋى ابدەن مۇمكىن.
گالينا جەكەلەي جارىستىڭ جەڭىمپازى, سوچي وليمپياداسىنىڭ ەستافەتاداعى چەمپيونى گەرمانيالىق دەنيز حەررماننان 5 مينۋت 04 سەكۋند قالىپ قويدى. حەررمان دا وق اتۋ ساتىندە ءبىر مارتە قاتەلەستى. فرانتسيالىق انايس شەۆالە-بۋشە كۇمىسپەن كۇپتەلسە, نورۆەگيالىق مارتە ولسبيۋ-رويسەلانن قولا جۇلدەگەر اتاندى.
شاڭعى قوسسايىسىنان ەكىنشى رەسمي جاتتىعۋىنىڭ ءۇشىنشى كەزەڭىنە قاتىسقان شىڭعىس راكپاروۆ 87,5 مەترگە سەكىرىپ, ناتيجەسىن ءبىرشاما جاقسارتىپ الدى. مۇنىڭ الدىنداعى جاتتىعۋلاردا ول 68 جانە 87 مەترگە سەكىرگەن ەدى. ءبىر ايتا كەتەرلىگى, شىڭعىس راكپاروۆ قازاقستان قۇراماسى ءۇشىن شاڭعى قوسسايىسىنان تاريحي جولدامانى جەڭىپ العان بولاتىن. بۇعان دەيىنگى وليمپيا ويىندارىندا بىردە-ءبىر وتانداسىمىز بۇل سپورت تۇرىنەن سىنعا تۇسپەگەن ەدى.
سونىمەن قاتار بەسىنشى جارىس كۇنىندە شاڭعىدان قازاقستاننىڭ ەرلەر جانە ايەلدەر قۇراماسى ىرىكتەۋ سايىستارىنا قاتىسىپ, العاشقى 30 سپورتشىنىڭ قاتارىنا ىلىگە الماي, جانكۇيەرلەر الدىندا ۇياتتى بولدى. ەرلەر اراسىنداعى جارىستى ەۆگەني ۆەليچكو 62-ءشى, ۆيتالي پۋحكالو 66-شى ورىنمەن اياقتادى.
ايەلدەر باسەكەسىندە قازاقستاندىقتار ساپىنان ەڭ جوعارى ناتيجەنى نادەجدا ستەپاشكينا تىركەدى. ول جارىستى 51-ءشى بولىپ اياقتادى. ال انگەلينا شۋرىگا – 60, كسەنيا شالىگينا – 67 جانە يرينا بىكوۆا 68-ءشى ساتىعا تۇراقتادى. جارىس ەرەجەسى بويىنشا باسەكەنىڭ شيرەك فينالىنا مارەنى العاش بولىپ كەسكەن 30 سپورتشى جولداما الادى.
ەرلەر اراسىنداعى بياتلوننان 20 شاقىرىمدىق جەكەلەي جارىستا دا جەرلەستەرمىز ۇزدىك ناتيجەسىمەن كوزگە تۇسە المادى. 29 جاستاعى ۆلاديسلاۆ كيرەەۆ ءتورت وق اتۋ ايلاعىندا بىردە-ءبىر قاتەلىككە بوي الدىرماسا دا, جىلدامدىعىنىڭ ناشارلىعىنا بايلانىستى مارە سىزىعىن 25-ءشى بولىپ كەستى. ول جارىس جەڭىمپازى فرانتسيالىق فيون مايەدەن 3 مينۋت 41 سەكۋندقا قالىپ قويدى. ال الەكساندر مۋحين وق اتۋ ساتىندە ءتورت رەت قاتەلەسىپ, مارەگە 52-ءشى بولىپ جەتتى.
بۇل جارىستا فرانتسيالىق فيون مايەنىڭ باعى جاندى. ول 20 شاقىرىمدى 48:47 ۋاقىتتا باعىندىرىپ, وليمپيادا چەمپيونى اتاندى. بەلارۋس وكىلى انتون سمولسكي ەكىنشى ورىنعا تابان تىرەدى. ءۇشىنشى ساتىعا ەكى دۇركىن وليمپيادا چەمپيونى نورۆەگيالىق يوحاننەس تيننەس بە جايعاستى.
