مەديتسينا • 08 اقپان، 2022

اۋرۋدى العاشقى ساتىسىندا انىقتاعان ابزال

86 رەت كورسەتىلدى

ونكولوگيالىق اۋرۋلارعا قارسى كۇرەس جونىندەگى حالىقارالىق وداق 4 اقپاندى قاتەرلى ىسىككە قارسى كۇرەس كۇنى رەتىندە بەلگىلەگەن بو­لاتىن. جۋىردا اتالعان كۇننىڭ اياسىندا ەلورداداعى ۇلتتىق عى­لىمي ونكولوگيا ورتالىعىنىڭ كلينيكالىق-دياگنوستيكالىق ورتا­لىعىندا اسقازان ىسىك الدى اۋرۋلارى مەن اسقازان وبىرىن انىق­تاۋعا ارنالعان اشىق ەسىك كۇنى ءوتتى. مەديتسينا قىزمەت­كەر­لەرىنىڭ مۇنداعى ماقساتى – اتالعان اۋرۋلاردى العاشقى ساتى­سىندا انىقتاۋ.

ونكولوگ عالىمداردىڭ بولجاۋى بويىنشا، وبىر دەرتىمەن اۋىراتىن ادامداردىڭ سانى جىل سايىن ارتۋى مۇمكىن. دەنساۋلىق ساقتاۋ مينيسترلىگىنىڭ مالىمەتىنە سۇيەنسەك، قازاقستاندا ونكولوگيانىڭ جىل سا­يىن 36 مىڭعا جۋىق جاڭا جاعدايى تىركەلەدى. بۇگىندە ديسپانسەرلىك ەسەپتە 190 مىڭعا جۋىق قازاقستاندىق تۇر. ەلىمىزدە ەڭ كوپ تارالعان وبىر تۇرلەرى – ءسۇت بەزى وبىرى، وكپە وبىرى، اسقازان وبىرى، جاتىر موينى وبىرى جانە كولورەكتالدى قاتەرلى ىسىك اۋرۋلارى. وبىر دەرتى بويىنشا ستاتيستيكالىق دەرەكتەرگە سايكەس، 2020 جىلى ەل اۋماعىندا تەرى وبىرىن ەسەپتەمەگەندە قاتەرلى ىسىكتەردىڭ العاش رەت انىقتالعان 29 701 جاڭا جاعدايى تىركەلدى. 2019 جىلى بۇل كورسەتكىش 32 573 بولعان ەدى. سونىڭ ىشىندە گاستروەنتەرولوگيالىق اۋرۋلار بويىنشا ابسوليۋتتىك سانى: وڭەش وبىرى – 1 082، اسقازان وبىرى – 2 497، توق ىشەك وبىرى – 1 645، باۋىر وبىرى – 861، ۇيقى بەزى وبىرى – 1 143.

– ۇلتتىق عىلىمي ونكولوگيا ورتا­لىعى جىل سايىن جۇمىس جوس­پا­رىن ازىرلەيدى. اي سايىن ءارتۇرلى ءىس-شارالاردى وتكىزۋگە تىرىسامىز. سەبەبى ونكولوگيالىق اۋرۋلارعا شالدىققان ادامداردىڭ سانى كۇن سايىن ارتىپ كەلەدى. وكىنىشكە قاراي، ناۋقاستاردىڭ باسىم كوپشىلىگى ءدال وسى دەرتكە شالدىققانىن بىل­مەيدى. ونداي اۋرۋلار كوپ جاع­دايدا وسىنداي اشىق ەسىك كۇندەرى انىقتالىپ جاتادى. اشىق ەسىك كۇنىنىڭ ماقساتى – وسى. نۇر-سۇلتان قالاسىنىڭ تۇرعىندارىن عانا ەمەس، قازاقستاننىڭ قاي وڭىرىنەن بولسىن ات باسىن بۇرعان ادامداردى قابىلداۋعا دايىنبىز. ونكولوگيالىق اۋرۋلار العاشقى ساتىسىندا انىقتالعان بولسا، ەمگە دە كونەدى، – دەدى ۇلتتىق عىلىمي ونكولوگيا ورتالىعىنىڭ كونسۋلتاتيۆتى-دياگنوستيكالىق ور­تا­لىعىنىڭ مەڭگەرۋشىسى ينديرا قۇسايىنوۆا.

پە

ونىڭ ايتۋىنشا، اشىق ەسىك كۇنىنە كەلۋگە نيەت بىلدىرۋشىلەر ورتالىقتىڭ ونكولوگ، گاستروەنتەرولوگ دارىگەرلەرىنەن تەگىن كەڭەس الا الادى. الايدا كەلۋشىلەرگە ساپالى ءارى ۋاقتىلى كەڭەس بەرۋ، ەپيدەمياعا قارسى شارالاردى ساقتاۋ ماقساتىندا اشىق ەسىك كۇنىن وتكىزۋ كەزىندە بىرقاتار ەرەجە دە بەكىتىلدى. ماسەلەن، كەلۋشىلەر الدىن الا سall ورتالىققا حابارلاسىپ، دارىگەرگە جازىلۋى جانە ءوزىنىڭ قابىلداۋ ۋاقىتىندا كەلۋى قاجەت. سونىمەن قاتار ەرىپ جۇرۋشىلەردىڭ، اسىرەسە بالالاردىڭ سانىن ازايتقان ءجون. بۇعان قوسا جرۆي بەلگىلەرى بار، تەمپەراتۋراسى جوعارى ادامدار ۇلتتىق عىلىمي ونكولوگيا ورتالىعىنىڭ كلينيكالىق-دياگنوستيكالىق ورتا­لى­عىنا جىبەرىلمەيدى. الدىن الا جازىلعان ادامدار وزىمەن بىرگە جەكە كۋالىگىن جانە الدىڭعى زەرت­تەۋلەردىڭ ناتيجەلەرىن (ولار بولعان جاعدايدا) الا كەلۋى قاجەت.

– ونكولوگ دارىگەر رەتىندە 18 جىلعا جۋىق تاجىريبەم بار. بۇگىنگى اشىق ەسىك كۇنى اسقازان ىسىك الدى اۋرۋلارى مەن اسقازان وبىرىن انىقتاۋعا ارنالعان سوڭ، وسى سالاعا قاتىستى ماسەلەلەرى بار ناۋقاستاردى قاراپ جاتىرمىز. بىرەر ساعاتتا بىرنەشە ادامدى قابىلداپ ۇلگەردىم. ولاردىڭ اراسىندا 66 جاستاعى، 40 جاستاعى، 34 جاستاعى ەرەسەكتەر بولدى. وكىنىشكە قاراي، قاتەرلى ىسىك جاس تاڭدامايتىن بولىپ تۇر. كەلۋشىلەر ءارتۇرلى شاعىمدارىن ايتىپ جاتىر. بىرەۋىنىڭ جۇرەگى اينيدى، ەندى بىرەۋىنىڭ وڭ جاق ءىش قۋىسى اۋىرادى. ءار شاعىمدى جەتە تەكسەرىپ، زەرتتەۋگە جىبەرىپ، قا­تەر­لى ىسىكتىڭ بار نەمەسە جوق ەكەنىن انىق­تاي­مىز. ۋلترادىبىس زەرتتەۋ، ەن­دوس­كوپيالىق زەرتتەۋ جاسالادى. ىسىك انىقتالعان جاع­داي­دا ىسىك بولىگى بيوپسياعا الىنادى، – دەدى كون­سۋلتاتيۆتى-دياگنوستيكالىق ورتا­لىعىنىڭ ونكولوگ-دارىگەرى گۇلجان ميرمانوۆا.

نۇر-سۇلتان قالاسىنداعى ۇلتتىق عىلىمي ونكولوگيالىق ورتالىعى قازاقستاندا ونكوحيرۋرگيا، ونكوگەماتولوگيا، ترانسپلانتولوگيا جانە رەانيماتولوگيا سياقتى باعىتتار بويىنشا وزىق مەديتسينالىق تەحنولوگيالاردى ەنگىزۋ سالاسىندا جەتەكشى ينستيتۋت سانالادى. ۇلتتىق عىلىمي ونكولوگيالىق ورتالىعىنىڭ دارىگەرلەرى ەلىمىزدە العاشقىلاردىڭ ءبىرى بولىپ باۋىر، بۇيرەك جانە تەرى ترانسپلانتاتسياسى بويىنشا وپە­راتسيالار جۇرگىزە باستادى. سونىمەن قاتار قازاقستاندا قاتەرلى قان اۋرۋلارى بار ەرەسەكتەرگە سۇيەك كەمىگىن ترانسپلانتاتسيالايتىن جال­عىز مەديتسينالىق مەكەمە دە وسى ونكولوگيالىق ورتالىق سانالدى. جىل سايىن وسى ۇلتتىق عى­لى­مي ونكولوگيالىق ورتالىعىندا ەلىمىزدىڭ بارلىق ءوڭىرى مەن تمد اۋماعىنان 6 مىڭنان اسا ناۋقاس ونكولوگيالىق اۋرۋلاردىڭ بارلىق ءتۇرىن قامتيتىن ەم الادى. عىلىمي ورتالىق بازاسىندا ستاتسيونارلىق جاعدايدا 16 باعىت بويىنشا جىل سايىن 5 200-دەن اسا وپەراتسيا جاسالىپ، ىسىك پروتسەسىنىڭ ءارتۇرلى لوكاليزاتسياسىندا شاعىن ءينۆازيۆتى جانە ورگان ساقتايتىن وپەراتسيالار كەڭىنەن قولدانىلادى.

– جاسىم – 73-تە. زەينەتكەرمىن. جەتپىستەن اسقان سوڭ اۋىرمايتىن جەرىڭ قالمايدى ەكەن. نەسىن جاسىرايىن، ون ەكى مۇشەمنىڭ ون ءبىرى اۋىرادى. الايدا بۇل ۇلتتىق عىلىمي ونكولوگيالىق ورتالىعىنا العاشقى رەت كەلۋىم. جاڭا عانا ونكولوگتىڭ قابىلداۋىندا بولدىم. ەندى گاس­ترو­ەنتەرولوگتى كۇتىپ وتىرمىن. 22 جىلدان استام ۋاقىت بولدى اۋىرىپ جۇرگەنىمە. ءبارى سول ءوت قابىن الىپ تاستايتىن وپەراتسيادان باستالدى عوي. مەديتسينا تىلىندە وپەراتسيانىڭ بۇل ءتۇرىن حولەتسيستەكتوميا دەپ اتايدى. كەيىن اسقازانىم اۋىراتىن بولدى. سودان بەرى ءتۇرلى ەم قابىلداپ ءجۇرمىن. جىل سايىن دارىگەرلەردىڭ كەڭەسىمەن ساۋىقتىرۋ كۋرورتىنا بارامىن. ءوز ەسەبىمنەن، ارينە. قارتايعان، زەينەتاقىعا عانا قاراپ وتىرعان ادام ءۇشىن ول دا وڭاي ەمەس ەكەن. مەم­لەكەت تاراپى تىم بولماعاندا وسىنداي شىعىندارىمىزدى وتەپ بەرسە دەيمىز عوي باياعى. جاستاۋ كەزىمدە جۇمىسىم دا، جولداسىم دا بولعان سوڭ ساۋىقتىرۋ كۋرورتىنىڭ شىعىنى قالتاعا سالماق سالا قوي­مايتىن ەدى. قازىر ەندى ونداي جاعداي جوق. اڭدىعانىمىز وسى – اشىق ەسىك كۇندەرى، – دەدى ەلوردا تۇرعىنى قورلان سارباسوۆا.

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار