كەنجەعالي ابەن ۇلى جاستايىنان ءبىلىم مەن عىلىمعا ۇمتىلىپ, سول سالالاردىڭ شىڭىنا جەتتى. مەكتەپتى ۇزدىك ءبىتىرىپ, الدىنا ەكونوميكا سالاسىنىڭ مامانى بولۋدى ماقسات ەتىپ, جوعارى ءبىلىم الىپ, ءوزىنىڭ وقىعان س.م.كيروۆ اتىنداعى قازاق مەملەكەتتىك ۋنيۆەرسيتەتىندە ەڭبەك جولىن اسسيستەنتتىكتەن باستاپ شيرەك عاسىردىڭ ىشىندە رەسپۋبليكامىزداعى ءتورت ۋنيۆەرسيتەتتىڭ رەكتورى دارەجەسىنە كوتەرىلدى.
كەنجەكەڭنىڭ باسقارعان ۋنيۆەرسيتەتتەرى وقۋ پروتسەسىنە وزىق ادىستەمەلەردى ەنگىزۋدە جانە ماتەريالدىق بازالارىن جاقسارتۋدا مەملەكەتىمىزدەگى وقۋ ورىندارىنىڭ الدىڭعى قاتارىنا شىققان. بىرنەشە مىڭداعان مامان دايارلانعان.
كەنجەعالي ابەن ۇلى عىلىممەن اينالىسىپ, گ.ۆ. پلەحانوۆ اتىنداعى ماسكەۋ حالىق شارۋاشىلىعى ينستيتۋتىنىڭ اسپيرانتۋراسىندا 28 جاسىندا كانديداتتىق, 39 جاسىندا دوكتورلىق ديسسەرتاتسيا قورعاپ, ەكونوميكا عىلىمدارىنىڭ بىلگىرى اتاندى.
ك.ءا.ساعاديەۆتىڭ زەرتتەۋشىلىك قابىلەتى ماسكەۋ عىلىمي ورتالىقتارىندا سىنالىپ, شىنىقتى. ونىڭ العاشقى عىلىمي جۇمىستارى ماتەريالدىق-تەحنيكالىق جابدىقتاۋدى ۇيىمداستىرۋدىڭ كەلەلى ماسەلەلەرىنە بايلانىستى بولدى. ول وسى باعىتتا ءونىمدى ىزدەنىستەر جاساپ, ءوندىرىس قۇرالدارىنىڭ اينالۋ زاڭدىلىقتارىن اشاتىن, وندىرىستىك ينفراقۇرىلىم سالالارىنىڭ ەكونوميكانىڭ دامۋ قارقىنى مەن ءوزارا بايلانىسىنا اسەرىن انىقتايتىن ىرگەلى ەڭبەكتەر جازىپ شىعاردى. مىسالى, «ماتەريالدىق-تەحنيكالىق جابدىقتاۋدىڭ ەكونوميكالىق تيىمدىلىگىن ارتتىرۋ ماسەلەلەرى», «قازاقستاندا ماتەريالدىق-تەحنيكالىق جابدىقتاۋدى باسقارۋ» «ماتەريالدىق-تەحنيكالىق جابدىقتاۋ جانە ءوندىرىس تيىمدىلىگى», «قازاقستاننىڭ ماتەريالدىق-تەحنيكالىق جابدىقتاۋ جانە ساتۋ قورى» جانە وسى سەكىلدى ءوزى جەكە نەمەسە باسقا عالىمدارمەن بىرىگىپ جازعان ماقالالار مەن مونوگرافيالارىندا ك.ءا.ساعاديەۆ رەسپۋبليكادا ماتەريالدىق-تەحنيكالىق جابدىقتاۋدى اۋماقتىق ۇيىمداستىرۋدى جانە ءوندىرىس قۇرالدارىن كوتەرمە ساۋدا ارقىلى تاراتۋدى جەتىلدىرۋدىڭ عىلىمي نەگىزىن قالاپ, پراكتيكالىق ۇسىنىستار جاسادى.
ەلىمىز تاۋەلسىزدىككە يە بولعاننان كەيىن ك.ءا.ساعاديەۆ مەرزىمدى باسپاسوزدە ەكونوميكالىق كادرلار دايارلاۋ جاعدايى, رەسپۋبليكا عىلىمىن ۇيىمداستىرۋ, نارىققا كوشۋ بارىسىن جاقسارتا ءتۇسۋ جولدارى جونىندە ءجيى ماقالالار جازىپ تۇردى. مىسالى: «نارىقتىق كادرلار كوپ نارسەنى شەشەدى», «نارىق حالىققا بەت بۇرسىن», «رەفورما باسپالداقتارى», «قازاقستان ەكونوميكاسىنىڭ نارىقتىق وزگەرىستەرىن جاساۋ ستراتەگياسى تۋرالى» جانە باسقالارى.
سونىمەن قاتار ول رەفورما پروبلەمالارى تۋرالى بىرنەشە رەت رەسپۋبليكا باسشىلىعىنا دا حات جولدادى. ماسەلەن: «شەتەلدىك ينۆەستيتسيالار جونىندەگى ۇلتتىق اگەنتتىك قۇرۋ», «ۇلتتىق ۆاليۋتا ەنگىزۋدىڭ كەزەك كۇتتىرمەس شارالارى», «قازاقستانداعى ەكونوميكالىق رەفورمالاردىڭ تۇبەگەيلى ستراتەگيالىق جانە تاكتيكالىق ماسەلەلەرى», «قازاقستاننىڭ قارجى-قاراجات ساياساتى تۋرالى».
1994 جىلى 2 اقپاندا ك.ءا.ساعاديەۆ ۇلتتىق عىلىم اكادەمياسىنىڭ جالپى جينالىسىندا ونىڭ تولىق مۇشەلەرىنىڭ (اكادەميكتەرىنىڭ) كوپشىلىك داۋسىمەن ۇعا پرەزيدەنتى بولىپ سايلاندى. كوپ كەشىكپەي ونى ۇعا-نىڭ جالپى جينالىسى تولىق مۇشە (اكادەميك) ەتىپ سايلادى.
قازاقستان پرەزيدەنتىنىڭ 1994 جىلدىڭ اقپانىنداعى «قر ۇلتتىق عىلىم اكادەمياسىنىڭ مارتەبەسى جانە عىلىمى مەملەكەتتىك قولداۋ شارالارى تۋرالى» جارلىعىنا جانە عىلىمدى رەفورمالاۋ جونىندەگى باسقا دا قۇجاتتارعا سايكەس اكادەميا قۇرىلىمدارى مەن ونىڭ مۇشەلەرىنىڭ قىزمەتىن رەتتەيتىن ۇعا-نىڭ جاڭا ءنورماتيۆتى ماتەريالدارى دايىندالىپ, قابىلداندى, ىرگەلى جانە ىرگەلى-قولدانبالى زەرتتەۋلەردىڭ باسىم باعىتتارى بەلگىلەندى. عىلىمي قۇرىلىمداردىڭ قىزمەتى, ماماندار الەۋەتى جانە ماتەريالدىق-تەحنيكالىق بازا تەكسەرىلىپ, اتتەستاتسيالاندى. ىرگەلى زەرتتەۋلەردىڭ تەحنولوگيالىق باعدارى جانە عىلىمي زەرتتەۋ ينستيتۋتتارىنىڭ زەرتتەمەلەرىن ءىس جۇزىندە قولدانۋ باعىتتارى كۇشەيتىلدى.
كۇردەلى عىلىمي-تەحنيكالىق ماسەلەلەردى مۇددەلى مينيسترلىكتەر مەن ۆەدومستۆولاردىڭ قاتىسۋىمەن ۇعا پرەزيديۋمىنىڭ بىرلەسكەن جانە كەڭەيتىلگەن ماجىلىستەرىندە قاراستىرۋ تاجىريبەسى ەنگىزىلدى.
ەلىمىزدەگى وتكىر ەكونوميكالىق ماسەلەلەردىڭ شەشىمىن تابۋعا عىلىمي قىزمەتكەرلەردى جۇمىلدىرۋ ماقساتىندا رەسپۋبليكالىق اشىق كونكۋرس جاريالانىپ, جەڭىمپازداردى ماراپاتتاۋعا اقشالاي سىيلىق تاعايىندالدى. عالىمداردى ءوز ەڭبەگىنىڭ ناتيجەسىن شىعارۋعا قىزىقتىرۋ ءۇشىن كەلىسىمشارت جاعدايىندا جۇمىس ىستەۋ كەڭ تۇردە قولعا الىندى.
سونداي-اق ك.ءا.ساعاديەۆ عىلىمدى دامىتۋدىڭ ۇزدىك باعىتتارى بويىنشا جاڭا ءتورت عىلىمي زەرتتەۋ ينستيتۋتىن ۇيىمداستىردى.
ولاردىڭ ءبىرى (قاراعاندىداعى فيتوحيميا ينستيتۋتى) بۇگىندە شەتەلدەردە سۇرانىسقا يە ناتيجەلى دارىلىك پرەپاراتتار جاساپ حالىقارالىق ارەناعا شىعىپ وتىر.
ۇعا-نىڭ ديرەكتورلىق قۇرامى ايتارلىقتاي جاسارىپ, جاڭاردى. پرەزيدەنت عزي-دىڭ بيۋدجەتكە يەك ارتۋشىلىق قالپىن وزگەرتىپ, ولاردىڭ باسشىلارىن شەتەلدەرمەن قارىم-قاتىناس جاساۋعا, ءار ءتۇرلى عىلىمي قورلاردىڭ كونكۋرستارىنا قاتىسۋعا, كوممەرتسيالىق ىستەرگە بەلسەنە ارالاسۋعا باعىتتادى.
اتىراۋ جانە ەلىمىزدىڭ باتىس وڭىرىندە ورنالاسقان وبلىستاردىڭ دامۋى, اسىرەسە وتىن-ەنەرگەتيكا كەشەندەرى تابيعي بايلىقتى عىلىمي تۇرعىدا تەرەڭ زەرتتەۋدى, وزىق عىلىمي تەحنولوگيانى ەنگىزۋدى تالاپ ەتەتىنى بەلگىلى.
سول كەزدە اتىراۋ وبلىسىندا حالىقارالىق جانە رەسپۋبليكالىق عىلىمي اكادەميانىڭ 40-تاي اكادەميگى, جۇزدەگەن دوكتور مەن كانديدات تۇراتىن. جوعارىدا ايتىلعان سەبەپپەن, الەمنىڭ دامىعان مەملەكەتتەرىنىڭ تاجىريبەسىنە ساي عالىمداردىڭ الەۋەتىن بىرىكتىرىپ, اتىراۋ وبلىستىق قوعام اكادەمياسى (ابك «اكادەميا») بىرلەستىگىن قۇردىق.
بۇل عىلىمي ورتالىق مۇناي-گاز سالاسىمەن بىرگە ەكولوگيا, ازعىر-تايسويعان يادرولىق پوليگونىنداعى جارىلىستىڭ زاردابىنان قۇتىلۋ, اۋىل شارۋاشىلىعىن رەفورمالاۋ, قۇندى بالىقتاردىڭ قورىن ساقتاپ قالۋ جانە ءبىلىم بەرۋ, دەنساۋلىق ساقتاۋ سالالارىن جەتىلدىرۋدى, باسقا دا ماڭىزدى ماسەلەلەر كەڭىنەن قامتىدى.
اقب «اكادەميا» مۇشەلەرى مەنى وسى ۇسىنىستى باستاۋشى جانە ۇيىمداستىرۋشى وبلىس اكىمى رەتىندە بىرلەستىكتىڭ توراعاسى ەتىپ سايلادى.
عىلىمي بىرلەستىك جۇمىسىنىڭ ناتيجەلىلىگىن بايقاعان سوڭ, ءبىز عىلىم جانە وزىق تەحنولوگيالار مينيسترلىگىنە ۇسىنىس بەردىك.
مەنىڭ يدەيامدى جانە مينيسترلىكتىڭ القاسىندا جاساعان باياندامامدى, ياعني اتىراۋ قالاسىندا باتىس وبلىستارىنىڭ (اتىراۋ, اقتوبە, باتىس قازاقستان جانە ماڭعىستاۋ) عالىمدارىن بىرىكتىرەتىن «ۇعا باتىس بولىمشەسىن» قۇرۋدى مينيستر ۆ.س.شكولنيك, ۇعا پرەزيدەنتى ك.ءا.ساعاديەۆ باستاعان القا مۇشەلەرى قولدادى.
1995 جىلى ماۋسىم ايىندا اقب «اكادەميا» اتىراۋ قالاسىندا عىلىمي-پراكتيكالىق كونفەرەنتسيا ۇيىمداستىرىپ, وعان الماتىدان جانە ەلىمىزدىڭ باتىستاعى ءتورت وبلىسىنان عالىمدار قاتىستى. سول كونفەرەنتسيادا سويلەگەن سوزىندە ك.ءا.ساعاديەۆ ەلىمىزدىڭ باتىس ءوڭىرىن دامىتۋ جونىندە ءوز پىكىرىن بايانداپ, اسىرەسە مۇناي-گاز سالاسىنا مول كوڭىل اۋداردى جانە ۇعا پرەزيديۋمىنىڭ باتىس بولىمشەسىن قۇرىپ, ورتالىعىن اتىراۋ قالاسى ەتۋ جونىندەگى شەشىمىن حابارلادى.
كونفەرەنتسياعا قاتىسۋشىلارعا كەنجەعالي ابەن ۇلى جاڭادان قۇرىلعان باتىس بولىمشەسىنىڭ توراعاسى بولىپ, تەحنيكا عىلىمنىڭ دوكتورى شميدت مۇسا ۇلى ايتاليەۆ تاعايىندالعانىن حابارلاپ, تانىستىردى.
كونفەرەنتسيا بارىسىندا سويلەگەن عالىمدار ەلىمىزدەگى باتىس ءوڭىرىنىڭ دامۋى جونىندە ءبىرتالاي ۇسىنىستارىن بەردى.
فورۋمعا قاتىسقان عالىمدار ەلىمىزدە العاش رەت اكادەميك ق.ي.ساتپاەۆ اتىنداعى كوشەدە ونىڭ ەسكەرتكىشىن اشۋ راسىمىنە قاتىستى. وسىدان كەيىن ۇعا شىعىس جانە وڭتۇستىك بولىمشەلەرىن اشتى.
1994-1996 جىلدارى ۇعا جانە ونىڭ پرەزيديۋمى جالپى رەسپۋبليكالىق شارالاردى ۇيىمداستىرۋ ورتالىعى بولدى. وسى جىلدارى ۇعا-نىڭ ۇلى عالىم-ەنتسيكلوپەديست جانە مەملەكەت قايراتكەرى مۇحامەد تاراعاي ۇلىقبەكتىڭ 600 جىلدىعىنا, قازاقتىڭ ۇلى اقىنى, ويشىلى اباي قۇنانباي ۇلىنىڭ 150 جىلدىعىنا وراي وتكىزگەن سەسسيالارى مەن كونفەرەنتسيالارى سول ۋاقىتتىڭ ءىرى وقيعالارى بولىپ سانالدى.
ك.ءا.ساعاديەۆ دەلەگاتسيانىڭ مۇشەسى نەمەسە جەتەكشىسى رەتىندە, كەيدە عىلىمي ۇيىمداردىڭ شاقىرۋىمەن شەتەلدەرگە ءجيى شىعىپ, عىلىمي باياندامالار جاسادى. سونداي-اق عىلىم-ءبىلىم بەرۋ بايلانىستارىن قۇرۋ جانە ءدارىس وقۋ ءۇشىن اقش, فرانتسيا, ۇلىبريتانيا, گەرمانيا, وڭتۇستىك كورەيا, پاكىستان, يران, يزرايل, قىتاي جانە باسقا شەتەلدەرگە شىقتى.
1996 جىلى ك.ءا.ساعاديەۆ قازاق مەملەكەتتىك اگرارلىق ۋنيۆەرسيتەتىنىڭ رەكتورى بولىپ تاعايىندالدى.
2001 جىلى ك.ءا. ساعاديەۆ حالىقارالىق بيزنەس ۋنيۆەرسيتەتىنىڭ پرەزيدەنتى بولدى. مۇندا ءوزىنىڭ سۇيىكتى ءىسى بيزنەسكە ماماندار دايارلاۋ مەن ەكونوميكالىق رەفورمالارداعى زەرتتەۋ جۇمىستارىنا بەلسەنە قاتىسۋ مۇمكىندىگى تۋدى.
حالىقارالىق بيزنەس ۋنيۆەرسيتەتى – ەلىمىزدەگى دامىپ كەلە جاتقان بيزنەسكە ماماندار دايارلاۋ ءۇشىن قۇرىلعان جەكەمەنشىك جوعارى وقۋ ورنى. ونىڭ كلاسسيكالىق ۋنيۆەرسيتەتتەردەن ەرەكشەلىگى – ەكونوميكالىق تاجىريبەمەن تىعىز بايلانىس, نارىق سۇرانىسىنا جەدەل كوڭىل ءبولۋ, ەكونوميكا رەفورمالارىنىڭ قۇبىلىسىنا ساي وقۋ جوسپارلارىنىڭ يكەمدىلىگى.
ۋنيۆەرسيتەت قابىرعاسىنان شەتەل تاجىريبەسىمەن جاقسى تانىس, ءوز ءىسىن, ءوز كاسىبىن جۇرگىزۋگە قابىلەتتى, كومپانيا, فيرما جانە باسقا جەكە جوبالاردى باسقارا الاتىن مەنەدجەر ماماندار شىعا باستادى.
ك.ءا. ساعاديەۆ «نۇر وتان» حالىقتىق-دەموكراتيالىق پارتياسىنىڭ مۇشەسى رەتىندە 2004 جىلى جانە 2007 جىلى پارتيالىق ءتىزىم بويىنشا 3-ءشى جانە 4-ءشى شاقىرىلعان پارلامەنت ءماجىلىسىنىڭ دەپۋتاتى بولىپ ەكى رەت سايلاندى. پارلامەنت ءماجىلىسىنىڭ ءۇشىنشى شاقىرىلىمىندا قارجى جانە بيۋدجەت كوميتەتىنىڭ توراعاسى قىزمەتىن اتقاردى.
وسى كەزەڭ ىشىندە ك.ءا.ساعاديەۆ ەلىمىزدىڭ بيۋدجەت جۇيەسىن وركەندەتۋ جانە ونىڭ تۇراقتىلىعىن دامىتۋ ماقساتىندا كوپ ەڭبەك ەتتى. ونىڭ ۇسىنىسى بويىنشا ەكونوميكا سالالارىنىڭ بيۋدجەت جوبالارى بولەك قارالاتىن بولدى, بۇل بيۋدجەت باعدارلامالارى اكىمدىكتەرگە بولىنەتىن قارجى-بيۋدجەت رەسۋرستارىن ءدال زەرتتەۋگە مۇمكىندىك بەرەدى. وسىنداي تاجىريبە 4-ءشى شاقىرىلعان پارلامەنت ءماجىلىسىنىڭ جۇمىس ادىسىنە دە ەندى.
سونىمەن قاتار سالىق قۇرىلىمىن جاقسارتۋ, ونى جىلجىمايتىن م ۇلىك پەن باسقا م ۇلىككە كوبەيتۋ, ال كەرىسىنشە, ەڭبەكاقى قورىنا, ياعني بىرلەسكەن كىرىس سالىعىن ازايتۋ جونىندە دە ءوز ۇسىنىسىن ايتقانى ەسىمىزدە.
پارلامەنت دەپۋتاتى رەتىندە ك.ءا.ساعاديەۆ قور نارىعىن دامىتۋ تۋرالى, رەيدەرلىككە قارسى تۇرۋ شارالارى مەن ەلىمىزدەگى زاڭسىز كوشى-قون جاعدايلارى, شەتەلدىك ينۆەستيتسيالاردى تارتۋ جانە باسقا دا كەلەلى ماسەلەلەر بويىنشا ۇكىمەتكە بىرنەشە رەت ساۋال جولدادى. كەنجەعالي ابەن ۇلى بۇرىن شەتەلدىك كومپانيالارعا بەرىلگەن قازاقستاننىڭ مۇناي جانە باسقا دا كەن ورىندارىن مەملەكەت مەنشىگىنە قايتارۋدىڭ بەلسەندى جاقتاۋشىسى, «كەن ورىندارىن پايدالانۋ تۋرالى» زاڭىنا تۇزەتۋلەر ەنگىزۋدى ۇسىنۋشىلاردىڭ ءبىرى, وسىعان سايكەس ەل اۋماعىنداعى شەتەلدىك كومپانيالار اكتسيالارىن ساتقان جاعدايدا, رەسپۋبليكا ولاردى ساتىپ الۋعا باسىم قۇقىققا يە بولادى.
كەنجەعالي ابەن ۇلى ەلىمىزدە العاشقىلاردىڭ ءبىرى بولىپ قازاقستاننىڭ دۇنيەجۇزىلىك ساۋدا ۇيىمىنا كىرۋىنىڭ تيىمدىلىگى مەن كولەڭكەلى جاقتارىنا جۇرگىزگەن ساراپتاماسىمەن ءباسپاسوز بەتتەرىندە ءسوز الدى.
قازاقستان ەكونوميكاسىن جاڭالاۋداعى وتكىر ماسەلەلەردى زەرتتەۋدەگى ك.ءا.ساعاديەۆتىڭ جۇيەلى دە ۇزاق ەڭبەگى ونى ۇزدىك عالىم-رەفورماتورلار قاتارىنا شىعاردى.
«قازاقستانداعى رەفورمالار: تالدامالىق كوزقاراس» اتتى ونىڭ ءتورت تومدىق ەڭبەگى قازاقستانداعى رەفورما ءۇردىسىنىڭ جوعارى ءماندى حرونيكاسى, ولاردىڭ جەتىستىگى مەن كەمشىلىكتەرىنىڭ تۋرا كورىنىسى. اۆتوردىڭ وندا جازعان كەلەلى ۇسىنىستارى مەن كەڭەستەرى وسى كۇنى دە, بولاشاقتا دا ءوز ءمانىن جوعالتپايدى.
اكادەميك ك.ءا.ساعاديەۆتىڭ جەتەكشىلىگىمەن 15 دوكتورلىق جانە 40 كانديداتتىق ديسسەرتاتسيا قورعالدى. ونىڭ 250-دەن استام جۇمىسى, 30-عا جۋىق مونوگرافياسى, كىتابى جانە كىتاپشالارى جارىق كوردى.
عالىم, قوعام جانە مەملەكەت قايراتكەرى ك.ءا.ساعاديەۆتىڭ كوپ جىلدىق جەمىستى ەڭبەگىن كەڭەستىك – پارتيا ورگاندارى, قازكسر جانە ۇكىمەتى جانە بارلىق عىلىمي, رەسپۋبليكالىق قوعامدىق ورىندار جوعارى باعالادى.
ول ەڭبەك قىزىل تۋ, حالىقتار دوستىعى, «پاراسات», II دارەجەلى «بارىس», «وتان» وردەندەرىمەن جانە بىرنەشە مەدالدارمەن ماراپاتتالدى. «قازاقستان رەسپۋبليكاسىنىڭ عىلىمى جانە تەحنيكاسىنىڭ ەڭبەك سىڭىرگەن قايراتكەرى» دەگەن اتاققا يە بولدى.
كەنجەعالي ابەن ۇلى قوستاناي وبلىسىنىڭ اۋليەكول, امانگەلدى, ناۋىرزىم, جانگەلدى اۋداندارىنىڭ جانە ارقالىق قالاسىنىڭ قۇرمەتتى ازاماتى.
العاشقى كەزدەسۋىمىز شيرەك عاسىردان استام ۋاقىت بۇرىن بولدى. ءبىرىنشى كۇننەن باستاپ ارامىزدا جىلى قارىم-قاتىناس باستالىپ, دوستىققا اينالدى. ەكونوميكا سالاسى جانە جالپى, ءومىر جونىندە ۇنەمى اقىلداسىپ, پىكىرلەسىپ, سىرلاسىپ جۇرەتىن ەدىك.
پارلامەنت ءماجىلىسىنىڭ ءۇشىنشى شاقىرىلىمىنىڭ دەپۋتاتى بولىپ, كەنجەكەڭمەن بىرگە «وتان» پارتياسىنىڭ ۇسىنىسىمەن سايلاندىق جانە كورشى بولىپ ءبىر عيماراتتا تۇردىق, ءومىرىنىڭ سوڭىنا دەيىن جانۇيامىزبەن ارالاستىق.
كەنجەكەڭنىڭ سۇيىكتى جارى ناعىتاي ابىتايقىزى كىشكەنوۆا – ەكونوميكا عىلىمدارىنىڭ كانديداتى, دوتسەنت اعامىزدىڭ, ارقا سۇيەر كومەكشىسى. جەڭگەمىز, وتە اقىلدى جانە ىسكەرلىگىمەن ەرەكشە جان. وسىرگەن تاماشا ۇرپاقتارى وزدەرىنىڭ جولىن جالعاستىردى.
قورىتىپ ايتقاندا, ك.ساعاديەۆ ونەگەلى ءومىر ءسۇردى, ءوزىنىڭ بويىنداعى اسىل قاسيەتتەرى ارقاسىندا قوعامنىڭ تورىنەن ابرويلى ورىن الدى جانە ەرەن ەڭبەگىمەن ارتىندا وشپەستەي ءىز قالدىردى.
راۆيل شىرداباەۆ,
مەملەكەت جانە
قوعام قايراتكەرى
