كەزدەسۋ بارىسىندا مەملەكەت باسشىسى قازاقستاننىڭ ەۋروپا وداعىمەن اراداعى ستراتەگيالىق سەرىكتەستىك پەن ىنتىماقتاستىقتى ودان ءارى نىعايتۋعا باسا ءمان بەرەتىنىن ايتتى.
مەملەكەت باسشىسى ەۋروپالىق كەڭەستىڭ پرەزيدەنتى شارل ميشەلگە 10 قاڭتارداعى بەينەبايلانىس رەجيمىندە وتكەن كەزدەسۋ بارىسىندا ەلىمىزدى قولداپ سويلەگەنى جانە ىنتىماقتاستىقتى نىعايتۋعا سەنىم بىلدىرگەنى ءۇشىن ريزاشىلىعىن ايتىپ, سالەمىن جولدادى.
قاسىم-جومارت توقاەۆ تەري حاكالانىڭ ءوتىنىشى بويىنشا ەلدە ورىن العان «قاسىرەتتى قاڭتار» وقيعاسى جونىندە بايانداپ, باس پروكۋراتۋراعا بولعان وقيعاعا قاتىستى تەرگەۋ جۇمىستارىن اشىق ءارى ءادىل جۇرگىزۋ جونىندە تاپسىرما بەرىلگەنىن ايتتى. مەملەكەت باسشىسى ادام قۇقىقتارى مەن بوستاندىعىنىڭ ساقتالۋى ەلىمىزدەگى بارلىق بيلىك تارماعى ءۇشىن باسىمدىق سانالاتىنىنا نازار اۋداردى.
قازاقستان پرەزيدەنتى ساياسي جۇيەنى ودان ءارى جاڭعىرتۋعا جانە الەۋمەتتىك تەڭسىزدىكتى سايكەستەندىرۋگە, ۇلتتىق ەكونوميكانى ارتاراپتاندىرۋعا باعىتتالعان جاڭا ەكونوميكالىق باعداردى ىسكە اسىرۋ جوسپارى جونىندە دە ەگجەي-تەگجەيلى ايتىپ بەردى.
قاسىم-جومارت توقاەۆ ەۋروپا وداعىمەن ىنتىماقتاستىقتىڭ بارلىق باعىتى بويىنشا تىعىز بايلانىستاردى دامىتۋعا جانە بۇعان دەيىن قول جەتكىزىلگەن ۋاعدالاستىقتاردى تولىققاندى جۇزەگە اسىرۋعا نيەتتى ەكەنىن جەتكىزدى.
ءوز كەزەگىندە تەري حاكالا بريۋسسەلدىڭ قازاقستانمەن اراداعى بايلانىستاردى دامىتۋعا مۇددەلى ەكەنىن ايتىپ, پرەزيدەنتكە مازمۇندى ءارى پايدالى پىكىر الماسقانى ءۇشىن العىس ءبىلدىردى.
كەزدەسۋ سوڭىندا تەري حاكالا ەۋروپا وداعى قازاقستان پرەزيدەنتىنىڭ ساياسي رەفورمالارىن تولىق قولدايتىنىن جانە ەلىمىزدىڭ وركەندەۋىنە, تۇراقتىلىعىنا مۇددەلى ەكەنىن قوسا ايتتى.
