سەنبىدە سپورتتىڭ التى تۇرىنەن باسەكەلەر ءوتىپ, العاشقى جۇلدەلەر جيىنتىعى ساراپقا سالىندى. اتاپ ايتساق, شاڭعىشىلاردىڭ ايەلدەر اراسىنداعى سكياتلونىندا تەرەزا يوحاۋگقا تەڭ كەلەر ەشكىم تابىلمادى. ءبىر عاجابى, 33 جاستاعى نورۆەگيانىڭ ماقتانىشى سوناۋ 2010 جىلى ۆانكۋۆەردە الاۋى تۇتانعان وليمپيا ويىندارىندا التىننان القا تاققان ەدى. 2014 جىلى سوچيدە ول كۇمىس پەن قولانى قاناعات تۇتتى. 2018 جىلى پحەنچحاندا تەرەزانىڭ جولى بولمادى. مىنە, ەندى اراعا 12 جىل سالىپ, جەڭىس تۇعىرىنىڭ ەڭ بيىك ساتىسىنا قايتا كوتەرىلدى. بۇل جولى يوحاۋگتا ءوزىنىڭ باستى قارسىلاسى رەسەيلىك ناتاليا نەپرياەۆادان 30,2 سەكۋند وزدى. قولا مەدال اۋستريالىق تەرەزا شتادلوبەرگە بۇيىردى. قازاقستاندىقتار اراسىندا ەڭ ۇزدىك ناتيجە كسەنيا شالىگينا مەن انگەلينا شۋرىگاعا تيەسىلى. ولار 48 جانە 49-ورىنداردى قاناعات تۇتتى.
نورۆەگيانىڭ قورجىنىنا ەكىنشى التىندى بياتلونشىلار سالدى. ارالاس ەستافەتادا مارتە ۋلسبيۋ-رويسەلانن, تيريل ەكحوفف, تارەي بو جانە يوحاننەس بو سىندى تالاي ءدۇبىرلى دودالاردا ىسىلعان دۇلدۇلدەرگە سەنىم ارتقان كوماندا اسپاناستى ەلىندە الدىنا جان سالمادى. فرانتسيا مەن رەسەي قۇرامالارى ەكىنشى جانە ءۇشىنشى ورىنداردى ءوزارا ءبولىستى.
كونكيشى قىزدار 3 000 مەترلىك قاشىقتىقتا سايىسقا ءتۇستى. بۇل باسەكەدە ءبىزدىڭ نادەجدا موروزوۆا 3:59,647 سەكۋندتىق كورسەتكىشپەن 21 جىل بويى مۇرتى بۇزىلماي تۇرعان قازاقستان رەكوردىن جاڭارتتى. بۇرىنعى رەكورد ايگىلى ليۋدميلا پروكاشەۆاعا تيەسىلى ەدى. بىراق سونىڭ ءوزى ۇزدىكتەر قاتارىنا قوسىلۋ ءۇشىن جەتكىلىكسىز بولدى. موروزوۆا نەبارى 13-ورىنعا تۇراقتادى. ال باس جۇلدەنى پحەنچحان وليمپياداسىنىڭ قولا جۇلدەگەرى, الەمنىڭ ءتورت دۇركىن چەمپيونى, نيدەرلانديالىق يرەن سحاۋتەن ولجالادى. يتاليالىق فرانچەسكا لوللوبريدجيدا كۇمىس السا, كانادالىق يزابەل ۆايدەمانن قولا مەدالدى موينىنا ءىلدى.
National Speed Skating Oval كەشەنىندە وتكەن باسەكەلەر جايىندا اڭگىمەلەگەندە مىنا ءبىر جايتقا نازار اۋدارماۋعا بولماس. جوعارىدا اتالعان قاشىقتىقتا ايگىلى نەمىس كونكيشىسى كلاۋديا پەحشتاين دا ونەر كورسەتتى. 22 اقپاندا ول مەرەيلى 50 جاسقا تولعالى وتىر. بۇل جولى جالىندى جاستار ارداگەرگە شاڭ قاپتىرىپ كەتتى. قىتايدا تۋىپ-وسكەن قازاق قىزى اقنار ارداقتىڭ ءدال سول پەحشتاينمەن بىرگە ءبىرىنشى جۇپتا جۇگىرىپ, ودان وزىپ كەتكەنىن ايتا كەتسەك, ەش ايىبى جوق دەپ ويلايمىز. دەسەك تە, كلاۋديانىڭ ەسىمى قىسقى وليمپيا ويىندارىنا قاتىسقان ەڭ قارت سپورتشى رەتىندە تاريحتا قالدى. بىراق گەرمانيا وكىلىنىڭ وتكەنگە ەش وكپەسى جوق دەپ ويلايمىز. ويتكەنى سپورتتىڭ بۇل تۇرىندە پەحشتايننىڭ باعىندىرماعان بەلەسى جوق. اق وليمپياداعا سەگىز مارتە قاتىسقان ول 5 التىن, 1 كۇمىس جانە 2 قولا مەدالدى ولجالادى. الەم چەمپيوناتىندا 11 رەت (1 التىن, 8 كۇمىس, 2 قولا) جەڭىس تۇعىرىنا كوتەرىلدى. جەكەلەگەن قاشىقتىقتار بويىنشا وتكەن دۇنيەجۇزىلىك دودادا 30 رەت (5 التىن, 13 كۇمىس, 12 قولا) ولجا سالدى. مىنە, وسى دەرەكتەردىڭ ءوزى-اق نەمىس حالقىنىڭ باعىنا تۋعان كلاۋديا پەحشتايننىڭ قانداي عالامات سپورتشى بولعانىن ايقىنداپ تۇرعانى انىق.
شورت-ترەكتەن قازاقستان قۇراماسى ارالاس ەستافەتالىق سايىستى التىنشى ورىنمەن قورىتىندىلادى. ءبىزدىڭ كوماندا ساپىندا يانا حان, ولگا تيحونوۆا, دەنيس نيكيشا جانە ابزال اجىعاليەۆ ونەر كورسەتتى. بىراق فينالدا كانادالىقتار جارىستان شەتتەتىلگەندىكتەن جەرلەستەرىمىز بەسىنشى ورىنعا كوتەرىلدى. بۇل باسەكەدە قىتاي سپورتشىلارىنىڭ باعى جاندى. وسى ورايدا تورەشىلەردىڭ ولارعا بۇيرەگى بۇرعانىن دا ايتا كەتۋگە ءتيىسپىز. نەگىزى جارتىلاي فينالدا جارىس قوجايىندارىنا ءتورتىنشى ورىندا قالىپ قويعان ەدى. الايدا «ەرەجەنى بۇزدى» دەگەن جەلەۋمەن قازىلار اقش پەن رەسەي شورت-ترەكشىلەرىن جارىس جولىنان شەتتەتىپ, قىتايلىقتاردى فينالعا جەتەكتەپ شىعاردى. بىراق ءبارىبىر اسپاناستى ەلىنىڭ وكىلدەرى مىقتىلىعىن مويىنداماسقا لاج جوق. اقتىق سىندا ايشىقتى ونەر كورسەتكەن قىتايدىڭ شورت-ترەكشىلەرى باس جۇلدەنى ولجالادى. ەكىنشى ورىندى يتاليا يەلەنسە, ماجارستان ءۇشىنشى ساتىعا تابان تىرەدى.
شاڭعىمەن ترامپليننەن سەكىرۋدەن ايەلدەردىڭ سايىسى سەنساتسيالىق ناتيجەمەن اياقتالدى. بىرقاتار اتاقتى سپورتشىلارعا سان سوقتىرعان ۋرسا بوگاتاي بەيجىڭ كوگىندە سلوۆەنيانىڭ ءانۇرانىن شىرقاتسا, ونىڭ كوماندالىق ارىپتەسى نيكا كريجنار قولاعا قول سوزدى. ال وسى جارىستىڭ باستى فاۆوريتتەرىنىڭ ءبىرى – وليمپيادانىڭ كۇمىس جۇلدەگەرى, الەمنىڭ ءتورت دۇركىن چەمپيونى كاتارينا التحاۋس ەكىنشى ورىندا قالىپ قويدى.
فريستايل-موگۋلدان وتكەن جارىستا دا ەسىمى كوپشىلىككە بەيمالىم 21 جاستاعى شۆەتسيانىڭ وكىلى ۆالتەر ۆاللبەرگ توپ جاردى. ودان كەيىنگى ورىنداردى پحەنچحان وليمپياداسىنىڭ جەڭىمپازى, كانادالىق ميكاەل كينگسبەري مەن جاپونيالىق يكۋما حيروسيما ەنشىلەدى. ەلىمىزدىڭ ەڭ ۇزدىك فريستايلشىسى دميتري رەيحەرد سەگىزىنشى ورىندى قاناعات تۇتتى.
وليمپيا ويىندارىنىڭ العاشقى جۇلدەلەرى ساراپقا سالىنعان سەنبى كۇنى بەس ەلدىڭ ورەندەرىنە باس جۇلدە بۇيىردى. كوش باسىندا – نورۆەگيا. سكانديناۆيا تۇبەگىنەن كەلگەن سايىپقىراندار ەكى التىندى يەلەندى. سلوۆەنيا ءبىر التىن مەن ءبىر قولانى قورجىنعا سالدى. قىتاي, نيدەرلاند جانە شۆەتسيانىڭ دا ءانۇرانى ءبىر-ءبىر رەتتەن شىرقالدى. ال رەسەي سپورتشىلارى ءبىر كۇمىس پەن ءبىر قولاعا قول جەتكىزدى.
