زەرتتەۋشىلەر قۇندى جادىگەردى ءبىزدىڭ زامانىمىزعا دەيىنگى 500-600 جىلدارعا جاتاتىن ساق ءداۋىرىنىڭ مۇراسى دەيدى. ساق داۋىرىندە قولدانبالى ونەر جاقسى دامىپ, اسىرەسە التىن بۇيىمداردى زەرگەرلىك ىسىنە پايدالانۋ كەڭ ەتەك العان.
جادىگەردىڭ سيپاتى مەن جاسالۋ ەرەكشەلىگىنە قاراي ونى «بۇرمەلى التىن سىرعا نەمەسە ساقينا» دەپ اتاۋعا بولادى. سىرعانىڭ سالپىنشاق بولىگىندە قۇمىرا پىشىندەس 20 ۇساق بۇرشىك بۇرمەلەنگەن. ءبىر قاراعاندا, بۇل بۇرمەلەر بيداي دانىنە ۇقسايدى. جادىگەردىڭ سالماعى – 20 گرامم, تازا التىننان جاسالعان, شەڭبەرىنىڭ ديامەترى – 2,9 سم, ەنى – 8 مم, بۇيىمنىڭ نەگىزگى بيىكتىگى – 5,4 سم, قۇمىراعا ۇقساس بۇرشىكتەردىڭ بيىكتىگى – 9 مم, ونىڭ ديامەترى – 6-6,1 مم, قۇمىرا اۋزىنىڭ بيىكتىگى – 1 مم, ديامەترى – 2,5 مم.
التىن بۇيىمدى مۇراجاي قورىنا مەتسەنات ساپار ىسقاق ۇلى جاساقتاعان ەكسپەديتسيا مۇشەلەرى مەن ەلورداداعى ۇلتتىق مۋزەي جانىنان قۇرىلعان «حالىق قازىناسى» عىلىمي-زەرتتەۋ ينستيتۋتىنىڭ باسشىسى احان وڭعار ۇلى تاپسىرعان.
