«جاقىندا ءبورلى اۋدانىنىڭ بىرقاتار شارۋا قوجالىعى جەتەكشىلەرى ءوزارا اقىلداسىپ, اۋدانىمىزدىڭ اگروونەركاسىپ كەشەنىن, سونىڭ ىشىندە باۋ-باقشا ەگۋ سالاسىن كوتەرۋگە اتسالىسۋدى ءجون كوردىك. ناقتىراق ايتساق, اۋدانىمىزدىڭ ءار اۋىلىنا قاراستى شارۋا قوجالىقتارى, ەگەر سول اۋىلدان باۋ-باقشا ەگۋدى كاسىپ قىلامىز دەگەن جاندار بولسا, 1-2 گەكتار جەر اۋماعىن تەگىن جىرتىپ, تىرمالاپ بەرۋگە دايىنبىز», دەيدى «امانات» شارۋا قوجالىعىنىڭ جەتەكشىسى باقىت دالاباەۆ.
شارۋا قوجالىعى باسشىلارىنىڭ بۇل ۇسىنىسىنا جەرگىلىكتى اكىمدىك تە قولداۋ ءبىلدىرىپ وتىر. قازىر ءار اۋىلدان باۋ-باقشا وسىرۋمەن اينالىسۋعا ىنتا بىلدىرگەن جانداردىڭ ءتىزىمى انىقتالۋدا.
«بۇل ماسەلەنى كوكتەمگى ەگىستىك جۇمىستارى باستالعانعا دەيىن انىقتاپ, الدىن الا جوسپارلاپ الۋ ءۇشىن ەرتەرەك كىرىسىپ وتىرمىز. ەگەر وڭىردە باۋ-باقشا ءوسىرۋ دامىسا, اۋدان تۇرعىندارىن قولجەتىمدى ازىق-ت ۇلىكپەن قامتۋ ماسەلەسى جولعا قويىلادى دەپ ويلايمىز», دەيدى باستاماشىل كاسىپكەر.
ايتا كەتەيىك, باقىت دالاباەۆ باستاعان بورلىلىك شارۋا قوجالىقتارى بىلتىر مال ازىعىنان تاپشىلىق كورگەن ماڭعىستاۋ وڭىرىنە دە قايىرىمدىلىق كومەگىن ۇيىمداستىرعان بولاتىن.
قازىنالى قاراشىعاناق كەنىشى ورنالاسقان ءبورلى اۋدانى – باتىس قازاقستان وبلىسىنىڭ ءوندىرىستى ءوڭىرى سانالادى. سونىمەن بىرگە اۋداننىڭ قۇنارلى توپىراعى مۇندا اۋىل شارۋاشىلىعىن دامىتۋعا دا كوپ مۇمكىندىك بەرەدى. اۋداندا 13 اۋىلدىق وكرۋگ بار.
باتىس قازاقستان وبلىسى
