سالتاناتتى ءىس-شارا بارىسىندا ەلىمىزدىڭ جىل سايىنعى «ۇزدىك عىلىمي قىزمەتكەر» سىيلىعىنىڭ 36 يەگەرى, عىلىم سالاسىنداعى اتاۋلى سىيلىقتاردىڭ 10 يەگەرى ماراپاتتالدى.
ودان بولەك, ءبىلىم جانە عىلىم ءمينيسترى مەملەكەتتىك عىلىمي ستيپەنديانىڭ 10 يەگەرى, جەتەكشى عالىمداردى جانە ۆەدومستۆولىق سىيلىقتىڭ 7 لاۋرەاتىن ماراپاتتادى.
شارا بارىسىندا مينيستر عىلىمدى قارجىلاندىرۋ ءىسىنىڭ ۇلعايعانىن حابارلادى.
عىلىمي جوبالاردى قارجىلاندىرۋعا ارنالعان كونكۋرستار 3 جىلدا ءبىر رەت ەمەس, ەندى جىل سايىن وتكىزىلەدى. سونىمەن قاتار, العاش رەت 2022 جىلى جوعارى وقۋ ورىندارى مەن عىلىمي زەرتتەۋ ينستيتۋتتارىندا پوستدوكتورانتۋرا ەنگىزىلەدى.
مينيستر اتاعانداي, ەگەر بۇرىن عالىمدار جالاقىنى تەك كونكۋرستار ارقىلى عانا الاتىن بولسا, ەندى جەتەكشى عالىمدار تۇراقتى جالاقى الادى. بۇل 85 عىلىمي ۇيىمنىڭ 1 200-گە جۋىق جەتەكشى عالىمدارىنىڭ جاعدايىن جاقسارتادى.
«بۇعان قوسا ەلىمىز ءۇشىن اسا ماڭىزدى فۋندامەنتالدى زەرتتەۋلەرمەن اينالىساتىن تاريح جانە ەتنولوگيا ينستيتۋتى, ءتىل ءبىلىمى ينستيتۋتى, ماتەماتيكا ينستيتۋتى, يادرولىق فيزيكا ينستيتۋتى, ادەبيەت جانە ونەر ينستيتۋتى, فيلوسوفيا جانە باسقا دا ينستيتۋتتاردىڭ عالىمدارى ەندى جالاقىلارىن تۇراقتى رەجيمدە الىپ, ۇزدىكسىز جۇمىس ىستەيدى», دەدى اسحات ايماعامبەتوۆ.
