ەكى وليمپيادانى وتكىزگەن تۇڭعىش قالا بولادى
XXIV قىسقى وليمپيا ويىندارىنىڭ وتكىزىلۋ تاريحىنا كوز جۇگىرتسەك, بىرقاتار قىزىقتى دەرەككە تاپ بولامىز. ماسەلەن, بۇل وليمپيادا بيىل بەيجىڭدە ەمەس, قازاقستاننىڭ كورىكتى قالاسىنىڭ ءبىرى – الماتىدا ۇيىمداستىرىلۋى مۇمكىن ەدى. ويتكەنى 2013 جىلدىڭ تامىز ايىنىڭ ورتاسىندا الماتى وليمپيادانى وتكىزۋگە ءبىرىنشى بولىپ رەسمي ءوتىنىم بەردى. الايدا شەشۋشى داۋىس بەرۋ ساتىندە بەيجىڭ الماتىنى بار بولعانى 4 داۋىس (44:40) ارتىقشىلىعىمەن جەڭىپ, سوڭعى ساتتە قىسقى وليمپيادانى وتكىزۋ قۇقىعىن جەڭىپ الدى. ال ەڭ قىزىعى, قىتاي استاناسى الەمدە قىسقى جانە جازعى وليمپيا ويىندارىن قابىلداعان ەڭ العاشقى قالا رەتىندە تاريحقا ەندى. وسىدان 14 جىل بۇرىن بەيجىڭ جازعى وليمپيا ويىندارىن وتكىزۋ قۇرمەتىنە دە يە بولعانى بەلگىلى.
بيىلعى وليمپيادا باسەكەلەرى جاڭادان بوي كوتەرگەن سپورت عيماراتتارىنان بولەك, 2008 جىلعى جازعى ويىنداردى قابىلداعان سپورتتىق نىسانداردا دا وتكىزىلەدى. ماسەلەن, وليمپيادانىڭ اشىلۋ جانە جابىلۋ سالتاناتى «قۇس ۇياسى» رەتىندە تانىلعان بەيجىڭنىڭ ۇلتتىق ستاديونىندا وتەدى. 2008 جىلعى جازعى ويىنداردىڭ سالتاناتتى ءىس-شارالارى دا ءدال وسى كەشەندە وتكەنى ءمالىم.
سۋرەتشى لين تسۋنچجەن جاساعان 2022 جىلعى وليمپيادانىڭ ەمبلەماسى قىتايدىڭ ءداستۇرلى جانە زاماناۋي مادەنيەتىنىڭ ەلەمەنتتەرىن بىرىكتىرىپ, قىتايدىڭ قىسقى سپورت تۇرلەرىنە دەگەن سۇيىسپەنشىلىگىن كورسەتكەن.
لوگوتيپ قىتايلىق «قىس» يەروگليفىنە نەگىزدەلگەن. ەمبلەمانىڭ جوعارى بولىگى كونكيمەن جۇگىرۋشىنىڭ بەينەسىنە, تومەنگى بولىگىندە شاڭعىشىنىڭ سيلۋەتىنە ۇقسايدى. ۇشاتىن تاسپانىڭ ءموتيۆى قىتايدىڭ تاۋ جوتالارىن, سپورتتىق نىسانداردى, شاڭعى تەبۋدى جانە مۇز ايدىندارىن بىلدىرەدى. ەمبلەمادا وليمپيا ويىندارى قىتايدىڭ جاڭا جىلىمەن سايكەس كەلەتىنى دە كورسەتىلگەن.
كوك ءتۇس ارماندى, بولاشاقتى, سونداي-اق مۇز بەن قاردىڭ تازالىعىن بىلدىرەدى. قىزىل جانە سارى قىتاي تۋىنىڭ تۇستەرى ەكەنىن انىق اڭعارامىز. ولار ۇمتىلىستى, جاستىقتى جانە ومىرلىك ەنەرگيانى مەڭزەيدى.
«ورتاق بولاشاق ءۇشىن بىرگە»
قىسقى وليمپيادا جانە پاراليمپيادانىڭ رەسمي ۇرانى – Together for a Shared Future («ورتاق بولاشاق ءۇشىن بىرگە»). جارىستى ۇيىمداستىرۋشىلار بەيجىڭ-2022 دوداسى ميلليونداعان قىتايدىڭ قىسقى سپورت تۇرلەرىنە دەگەن قىزىعۋشىلىعىن ارتتىراتىنىنان ءۇمىتتى.
ۇران جاھاندىق پروبلەمالاردى جەڭۋدە بۇكىل ادامزات ءۇشىن ورتاق بولاشاعى بار ويىندار مەن قوعامداستىقتىڭ كۇشىن بەينەلەيدى. بۇل سوزدەر بۇكىل الەمدە جارقىن بولاشاق ءۇشىن, اسىرەسە كوروناۆيرۋس پاندەمياسىنان تۋىنداعان قيىندىقتاردى ەسكەرە وتىرىپ, بىرلەسىپ جۇمىس ىستەۋ قاجەتتىگىن كورسەتەدى.
ۇراندى تاڭداۋ پروتسەسى 2020 جىلدىڭ مامىر-قىركۇيەك ايلارىنا دەيىن سوزىلدى. وسى ۋاقىت ىشىندە بەيجىڭ-2022 ۇيىمداستىرۋ كوميتەتى قىتاي ۋنيۆەرسيتەتتەرىنەن كەلىپ تۇسكەن 79 ۇسىنىستى جيناپ, ءارتۇرلى سالاداعى ساراپشىلار جوعارىداعى ۇراندى بەكىتتى.
جەتى جارىس پەن گەندەرلىك تەڭدىك
وليمپيادا باعدارلاماسىنا ەنگەن جاڭا جارىس تۇرلەرىن ايتقاندا, گەندەرلىك تەڭدىكتى دە اتاپ ءوتۋ قاجەت. 2022 جىلعى بەيجىڭ وليمپياداسىنىڭ باعدارلاماسىنا جەتى جاڭا جارىس ءتۇرى قوسىلدى. اتاپ ايتار بولساق, شورت-ترەكتەن ارالاس ەستافەتا, شاڭعى اكروباتيكاسىنان, شاڭعىمەن تۇعىردان سەكىرۋدەن جانە سنوۋبورد-كروسستان ارالاس كوماندالىق تۋرنير, فريستايلدان ەرلەر مەن ايەلدەر اراسىنداعى بيگ-ەير, سونداي-اق مونوبوبتان ايەلدەر اراسىنداعى باسەكەدەن جۇلدەلەر تاراتىلادى. قوسىمشا جارىس تۇرلەرى ارقىلى قىسقى ويىندار تاريحىندا العاش رەت گەندەرلىك تەپە-تەڭدىك ساقتالماقشى. 2018 جىلعى ويىنمەن سالىستىرعاندا, ايەلدەر سانى 45 پايىزدان اسادى.
اتلەتتەردىڭ ومىرىندەگى ەڭ ەستە قالارلىق ساتتەردىڭ ءبىرى – ماراپاتتاۋ ءراسىمى ەكەنى بەلگىلى. بەيجىڭ وليمپياداسىن ۇيىمداستىرۋشىلار بۇل ءساتتىڭ دە كەرەمەت وتۋىنە بار جاعدايدى جاساپ وتىر. قاڭتار ايىنىڭ باسىندا ماراپاتتاۋ ءراسىمىنىڭ اتريبۋتتارى تانىستىرىلدى. تانىستىرىلىم اياسىندا كوپشىلىككە گۇلدەر, تۇعىر مەن ماراپاتتاۋشىلاردىڭ كيىمدەرى كورسەتىلدى. ايتا كەتەلىك, وليمپيادا جەڭىمپازدارى مەن جۇلدەگەرلەرى گۇلدەن بولەك ارنايى تاپسىرىسپەن دايىندالعان ويىننىڭ بويتۇمارىن دا سىيعا الادى.
قوس قولا التىنعا اينالا ما؟
بۇعان دەيىن قازاقستان قاتىسقان قىسقى وليمپيا ويىندارىنىڭ ىشىندەگى ەڭ تابىستىسى 1994 جىلعى وليمپيادا بولعانى داۋسىز. سول جىلى جەرلەستەرىمىز ءۇش مەدالمەن كوماندالىق ەسەپتە 12-ورىنعا يە بولعان ەدى. وسى ءبىر دودادان كەيىن سپورتشىلارىمىزعا قىسقى وليمپيادانىڭ التىنى ارمانعا اينالدى. شاڭعىشى ۆلاديمير سميرنوۆتىڭ 1994 جىلى العان ەكى كۇمىسى مەن ءبىر التىنى ازىرگە ەڭ ۇزدىك كورسەتكىش بولىپ تۇر. ءتورت جىلدان كەيىنگى ناگانوداعى (1998) دودادا قازاقستان 2 قولا الدى. شاڭعىشى ۆلاديمير سميرنوۆ پەن كونكيشى ليۋدميلا پروكاشەۆا ۇزدىك ۇشتىكتەن كورىندى. وكىنىشكە قاراي, 2002 جانە 2006 جىلعى وليمپيادالاردا قورجىنىمىز بوس قايتتى. ال 2010 جىلى ۆانكۋۆەردە بياتلونشى ەلەنا حرۋستالەۆا جەكەلەي جارىستا كۇمىس مەدال ەنشىلەدى. ءتورت جىلدان كەيىن سوچيدە (2014) دەنيس تەن مانەرلەپ سىرعاناۋدان العاشقى قولانى سىيلاسا, 2018 جىلعى پحەنچحان وليمپياداسىندا يۋليا گالىشەۆا دا موگۋلدان قولا جۇلدەگەر اتاندى. وسىلايشا, قازاقستان ءوز تاريحىندا جەتى قىسقى وليمپياداعا قاتىسىپ, سەگىز (1 التىن, 3 كۇمىس جانە 4 قولا) مەدال جەڭىپ الدى. ەندىگى كەزەكتە XXIV قىسقى وليمپيادادا 87 جولداماعا يە بولعان 34 سپورتشىعا ءۇمىت ارتامىز. 1994 جىلدان بەرى 18 جىل بويى التىن مەدال جەڭبەگەن وليمپياداشىلارىمىز وسى جولى سول ولقىلىقتىڭ ورنىن تولتىرسا دەيمىز.
كىمدەر جۇلدەگە قول جەتكىزۋى مۇمكىن؟
بەيجىڭدە وتەتىن وليمپيا ويىندارىنا بولجام جاسايتىن مامانداردىڭ پىكىرىنە سۇيەنسەك, قازاقستان قۇراماسىنىڭ سپورتشىلارى بەيجىڭدە ءبىر كۇمىس, نە ءبىر قولا مەدال ەنشىلەۋى مۇمكىن. اقش ەلىنىڭ ساراپشى ماماندارى فريستايل-موگۋل سپورتىنان وتانداستارىمىزعا ءبىر قولا مەدال بۇيىرادى دەسە, Gracenote Nielsen Company اگەنتتىگى ەلىمىزدىڭ اتىنان سىنعا تۇسەتىن سپورتشىلاردىڭ ءبىرى كۇمىسكە قول جەتكىزەدى دەپ بولجام جاسايدى. ال ۇزدىك ۇشتىكتى نورۆەگيا, رەسەي, گەرمانيا قۇرامالارى ءوزارا بولىسەدى دەيدى ماماندار.
