«وتكەن جىلى اقمولا وبلىسىنىڭ مادەنيەت باسقارماسى ءوڭىر اكىمدىگىمەن بىرلەسىپ جاقسى جانە قورعالجىن اۋداندارىندا عىلىمي-زەرتتەۋ ەكسپەديتسيالارىن ۇيىمداستىردى. ەكسپەديتسيا اياسىندا باۋبەك باتىر قورىمىندا, جانىبەك-شالقار كەسەنەسىندە جانە بىتىعاي كەشەنىندە ارحەولوگيالىق قازبا جۇمىستارى جۇرگىزىلدى. زەرتتەۋگە ۇلتتىق مۇراجايدىڭ عىلىمي قىزمەتكەرلەرى, اقمولا تاريحي-ولكەتانۋ مۇراجايىنىڭ, جاقسى اۋدانىنىڭ زاپوروجە ورتا مەكتەبىنىڭ مۇعالىمدەرى, سونداي-اق ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى مەن باسقا دا مامانداردان تۇراتىن عىلىمي توپ قاتىستى. بىرقاتار جەكەلەگەن سالا ماماندارىنىڭ كومەگىمەن گەواقپاراتتىق جانە جاراتىلىستانۋ عىلىمىنىڭ جەتىستىكتەرى ارقىلى قورىتىندىلار الۋعا قول جەتكىزدىك», دەدى وبلىستىق مادەنيەت باسقارماسىنىڭ باسشىسى ايگۇل ءسابيتوۆا.
باسقارما باسشىسى اتاپ وتكەندەي, قازبا جۇمىستارى بارىسىندا سۇيەك قالدىقتارى, ەجەلگى مونەتالار تابىلعان. ولاردى زەرتتەۋگە رەسەيدەن كەلگەن ماماندار قاتىستى. مونەتالاردىڭ قۇرامىن جانە جەرلەۋ ورىندارىنىڭ ناقتى جاسى مەن گەنەتيكالىق شىعۋ تەگىن انىقتاۋعا مۇمكىندىك تۋدى. بريفينگتە ايتىلعانداي, ەكسپەديتسيا ناتيجەسى بويىنشا زەرتتەلگەن جەرلەردىڭ تسيفرلى مودەلىن, نىسانداردىڭ ەگجەي-تەگجەيلى جوسپارى مەن كارتاسىن, جانىبەك-شالقار كەسەنەسىنىڭ جانە باۋبەك باتىر جەرلەنگەن جەرىنىڭ 3D-بەينەسى دايىندالدى. مۇنىڭ ءبارى «اقمولا وبلىسىنىڭ مادەني مۇراسى: جاڭا زەرتتەۋلەر» اتتى عىلىمي-تانىمدىق باسىلىمىندا بەرىلگەن.
