ءيا, وڭاي بولمادى. سەرىك پەن گاۋھاريا ءبۇلدىرشىن قىزدارىن تاڭنىڭ ەلەڭ-الاڭىنان قالادان توعىز شاقىرىم جەردەگى تاۋعا جاتتىعۋعا اپارادى. ودان كەيىن ساباقتان قالماۋ كەرەك. العاشقى باپكەرى س.اكسەنوۆ, ودان كەيىنگى ۇستازى ۆ.سوكولوۆ مىقتى جاتتىقتىرۋشى بولدى, بىلگەندەرىن جالىقپاي ۇيرەتتى. اتا-اناسى, قىسقاسى, اياۋلىمنىڭ بيىك ناتيجەگە جەتۋى ءۇشىن 17 جىلدان بەرى قىزدارىمەن بىرگە تەر توگىپ كەلەدى. شىركىن, كەز كەلگەن اتا-انا بالالارىنىڭ سپورتتا بيىك تابىستارعا جەتۋى ءۇشىن سەرىك پەن گاۋھاريا سياقتى قۇلشىنىس پەن جىگەر تانىتقاندا, وليمپ شىڭىن باعىندىرعان قازاق قىزدارى مولايا تۇسەر ەدى-اۋ دەگەن ويعا قالاسىز.
پحەنچحان وليمپياداسىنا بارۋ ءۇشىن اياۋلىم تالاي سىننان مۇدىرمەي ءوتتى. فينليانديانىڭ رۋكا, قىتايدىڭ تايبۋ, كانادا مەن اقش-تىڭ بىرنەشە قالاسىندا وتكەن الەم كۋبوگى كەزەڭدەرىنە قاتىستى. مۇنىڭ الدىندا ول اۋستريانىڭ كريشپەل قالاسىندا وتكەن ەۋروپا كۋبوگىنىڭ كەزەڭىندە ەكى بىردەي التىن مەدال يەلەندى. شۆەيتساريانىڭ پراتو لەۆەنتينو قالاسىندا جالاۋى جەلبىرەگەن كۋبوك جارىسىندا دا جەڭىس تۇعىرىنا كوتەرىلدى. سول جولى اياۋلىم 3 التىن, 1 كۇمىس, 1 قولا مەدال يەلەنىپ, ەۋروپا كۋبوگىنىڭ باس جۇلدەسى مەن حرۋستال كۋبوكتى يەلەندى.
اياۋلىمنىڭ پحەنچحانداعى ونەرىن اكەسى سەرىك ەكەۋمىز بىرگە تاماشالاعان ەدىك. قاناتى قاتايىپ, تاجىريبەسى مولايعان قازاقتىڭ قارشاداي قىزى جامان ناتيجە كورسەتكەن جوق. العاشقى جيىرمالىقتان ويىپ تۇرىپ ورىن الدى. ەلگە ورالعان سوڭ وقۋىن جالعاستىردى. ورتا مەكتەپتى التىن مەدالمەن ءبىتىرىپ, الماتىداعى قازاق سپورت جانە تۋريزم اكادەمياسىنا وقۋعا ءتۇستى. ول ءوزىنىڭ ەكىنشى اق وليمپياداسىنا بارۋ ءۇشىن دە «تار جول, تايعاق كەشۋدەن» ءوتتى. ەۋروپا مەن مۇحيتتىڭ ار جاعىنداعى الەم كۋبوكتارىنا قاتىسىپ, ۇپاي جيناي بەردى. جۋىردا قازاق ەلى اتىنان قىتايدا ونەر كورسەتۋگە جولداما العان بەس ساڭلاقپەن بىرگە اتتانىپ كەتتى.
– اياۋلىم ءسابي كەزىنەن وجەت, العىر بولىپ ءوستى. ول دومبىرا, بي ۇيىرمەلەرىنە دە قاتىستى. اعىلشىن تىلىندە ەركىن سويلەيدى. كەشە بىزبەن سويلەستى, ولار تۇرىپ جاتقان جەر ءسال سالقىنداۋ بولسا دا, سپورتشىلارعا بارلىق جاعداي جاسالعان ەكەن. ءتارتىپ قاتال, شىداۋ كەرەك دەگەندى ايتتى. «فريستايل موگۋلدان ارىپتەستەرىم قايتكەندە دە ءبىر مەدال الۋعا تىرىسادى», دەدى. قىزىما عانا ەمەس, قازاق ەلىنىڭ بارلىق سپورتشىسىنا تابىس تىلەيمىن. اتتەڭ, پاندەميا بولماعاندا اياۋلىمعا بەيجىڭگە بارىپ, جانكۇيەر بولار ەدىم, – دەيدى س.امىرەنوۆ.
وڭداسىن ەلۋباي,
جۋرناليست
وسكەمەن
