«قازىر ەلوردا اۋماعىندا 26 462 بەينەباقىلاۋ كامەراسى ورناتىلعان. وتكەن جىلدىڭ جەلتوقسان ايىندا قوعامدىق ورىندارعا 500 جانە دەنساۋلىق ساقتاۋ مەكەمەلەرىنە 2 مىڭعا جۋىق كامەرا قويىلدى. قاۋىپسىزدىكتى قامتاماسىز ەتۋ جوباسى بيىل دا جالعاسىن تابادى. سونىمەن قاتار ءبىز مەملەكەتتىك-جەكەمەنشىك سەرىكتەستىك تۋرالى زاڭعا وزگەرىس ەنگىزدىك. جاڭا وزگەرىستەرگە سايكەس مەملەكەتتىك-جەكەمەنشىك سەرىكتەستىكتەرمەن بىرلەسىپ, ءۇي اۋلالارىنا «سەرگەك» بەينەباقىلاۋ كامەراسىن ورناتۋدى قولعا الىپ جاتىرمىز. جوسپارعا سايكەس اۋلالارعا 7,5 مىڭ بەينەباقىلاۋ كامەراسىن قويامىز», دەدى بوتاگوز قاسابەك قالالىق ءماسليحاتتىڭ وتىرىسىندا.
ونىڭ ايتۋىنشا, اتالعان جوبانى جۇزەگە اسىرۋعا بيۋدجەتتەن قاراجات الىنبايدى.
«بۇگىندە ازىرلەۋ جۇمىستارى ءجۇرىپ جاتىر. اۋلا كامەراسىن ورناتۋدا پوليتسيا قىزمەتىنىڭ كومەگىنە جۇگىنىپ وتىرمىز. بەينەباقىلاۋ كامەرالارى ۇيلەردىڭ بۇرىشىنا, ياعني ادام جۇرە قويمايتىن جەرلەرگە قويىلادى. قالا كۇن ساناپ ءوسىپ جاتىر, سايكەسىنشە قاۋىپسىزدىكتى كۇشەيتۋدى تالاپ ەتەدى. بۇل ماسەلە اسىرەسە جاڭادان سالىنىپ جاتقان اۋداندارعا قاتىستى», دەدى ول.
