وبالى – بۋراباي باۋرايىنداعى شوق جۇلدىزداي شاعىن عانا ەلدى مەكەن. تامىلجىعان تۇمسا تابيعاتى تۋرالى تاڭدى تاڭعا ۇلاستىرىپ جىرلاۋعا بولار ەدى. كۋرورتتى ءوڭىردىڭ ەتەگىن باسا قونىس تەپكەن اۋىلدىڭ تەمىرقازىعى ىسپەتتى ورتا مەكتەپكە بيىل بالا سانى جەتپەگەندىكتەن جابىلىپ قالۋ قاۋپى تۋدى. اتامەكەندى قيماي, مال سۇمەسىمەن كۇن كورىپ وتىرعان اعايىن العاشقى بەتتە سارى ۋايىمعا سالىنعانى دا راس. ورتا مەكتەپتىڭ جابىلعانىنا دا كوپ بولماعان, ەندى نەگىزگى مەكتەپ جابىلسا, قيىن بولعالى تۇر. بەس جىل بۇرىن وبالىدان توعىز شاقىرىم جەردەگى تۇلكىلى اۋىلىنىڭ مەكتەبى وقۋشىلاردىڭ ازايۋى سەبەبىنەن باستاۋىشقا اينالىپ, سوڭىندا جابىلىپ تىنعان.
مەكتەپ تۋرالى مازانى قاشىرار قاۋەسەت پايدا بولعالى وبالىلىقتاردىڭ ويى ونعا, ساناسى سانعا ءبولىندى. ەندى نە ىستەۋ كەرەك؟ اۋىلدىڭ باس كوتەرەر اقساقالدارى اقىلداسا كەلە, الدىمەن ءبىر-ەكى ءۇي دايىنداۋعا كەلىستى. كوپبالالى وتباسىلاردى اۋىلعا كوشىرىپ اكەلسەك, بالا سانى كوبەيەدى, مەكتەپ تە جابىلمايدى دەپ بولجادى. بۇل ءۇشىن جاڭاعى كوپبالالى وتباسىعا اۋىلدىڭ باس كوتەرەر ازاماتتارى تۇگەل قامقور بولۋعا ءتيىستى. ۇلكەننىڭ ءسوزىن سىيلايتىن كەيىنگى تولقىن دا الگى ۋاجگە توقتالدى. ورتاعا اقشا جينادى. بۇرىن كوشىپ كەتكەن وتباسىلارىنىڭ بوس تۇرعان ۇيلەرىن ساتىپ الا باستادى. ءتورت ءۇي الىندى. تورتەۋىنە دە جوندەۋ جۇمىستارىن جۇرگىزدى. مەكتەپ مۇعالىمدەرى الەۋمەتتىك جەلى ارقىلى وبالىداعى وڭدى باستاما تۋرالى حابار تاراتتى.
شىن مانىندە وبالى ادام قىزىعارلىق جەر. ماڭگى جاسىل قاراعايلار مەن شوق قايىڭدار كومكەرگەن, ورمان قويناۋى جاز ايلارىندا جەمىس-جيدەككە تۇنىپ تۇراتىن قۇنارلى ولكە. ەلەكتر جەلىسى بار, ۇڭعىمادان تارتىلعان تازا سۋ اۋىلداعى ۇيلەرگە تاراتىلادى. اۋىل كوشەلەرى تەگىس اسفالتتالعان. جەكە شارۋامەن اينالىسۋعا, ءتورت ت ۇلىك مالدى تۇگەل وسىرۋگە جاعداي ابدەن بار. قانداي قۋاڭشىلىق جىل بولسا دا نۋلى ولكەنىڭ شابىندىعىندا وسكەن ءشوپ اتتىلى كىسىنىڭ كەۋدەسىنەن كەلەدى. ءۇي جانىندا كوكونىستىڭ نەشە ءتۇرىن وسىرۋگە بولادى.
ەرىنبەگەن ادامعا ەل ىشىندە كۇنكورىس تابىلادى ەمەس پە؟ «بۋراباي» جشس مەن ەكى شاعىن شارۋا قوجالىعى جۇمىستارىن ۇرشىقشا ءۇيىرىپ وتىر. ايتا كەتۋ كەرەك, اۋىل ىشىندە جۇمىسشى جوق. سەرىكتەستىككە مەحانيزاتورلار, كولىك جۇرگىزۋشىلەرى قاجەت. ءتىپتى مال باعاتىن ادام تابا الماي وتىر. ويتكەنى اركىم ءوزىنىڭ جەكە شارۋاسىن كۇيتتەيدى.
الەۋمەتتىك جەلى ارقىلى حابار تاراعان سوڭ قاسكەلەڭ قالاسىنان كاميلا يسمايلوۆا اتتى كوپبالالى انا حابارلاسىپتى. اۋەلى اۋىلدىڭ جايىن, تۇرعىن ءۇي مەن مەكتەپ ماسەلەسىن سۇراستىرسا كەرەك. ءمان-جايدى ابدەن بىلگەن سوڭ كوشۋگە قامداناتىنىن ايتقان. جەرگىلىكتى مەكتەپتىڭ ديرەكتورى قىمبات احمەتوۆا كوشىپ كەلۋ شىعىنىنا قاراجات جىبەرىپتى. اقىرى مىنە, كوپتەن كۇتكەن كۇن جەتكەن. ءدال سول كۇنى وبالىنىڭ جۇرتى اق تۇيەنىڭ قارنى جارىلعانداي قۋانعان. قاسكەلەڭنەن بۋرابايعا بەت تۇزەگەن شاعىن كوشتى قاڭتاردىڭ 15-ءى كۇنى الىستان اڭساپ جەتكەن اعايىندارىنشا قۇشاق جايىپ قارسى الدى. شاعىن اۋىلدىڭ شىرايىن كەلتىرگەن توي بولعانعا ۇقسايدى. قىس تۇسكەلى مۇعالىمدەر كەزەك-كەزەك كەلىپ وت جاعىپ, ءۇيدى جىلىتىپ تۇرعان. اۋىل ازاماتتارى قىسقا قاجەتتى وتىنىن جەتكىزىپ بەرگەن. ءاربىر وتباسى كوش كولىكتى بولسىن دەپ قولدارىنان كەلگەنىنشە ازىق-ت ۇلىك اكەلىپ, شاشۋ شاشقان.
– قاسكەلەڭ قالاسىندا پاتەر جالداپ تۇراتىن ەدىك, – دەيدى كاميلا يسمايلوۆا, – پاتەراقى تولەيتىن اقشامىز بولمادى. وسى ءبىر جاقسى حاباردى ەستىگەننەن كەيىن تاۋەكەل دەدىم. اۋىل ادامدارىنىڭ اڭقىلداعان اق كوڭىلىنە, جان جادىراتار جاردەمىنە ابدەن ريزامىن. قاتتى قينالىپ ەدىم. ەندى باقشا ەگىپ, ازىن-اۋلاق مال ۇستاپ, ەل قاتارلى جۇمىس ىستەسەم كوشتەن قالمايمىن عوي.
اۋىل ادامدارىمەن بىردەن توننىڭ ىشكى باۋىنداي ارالاسىپ كەتكەنى سونشالىق, ءتىپتى ارقايسىسىن كوپتەن بىلەتىن ءتارىزدى. ەندى مىنە, ءبىزدىڭ دە ەل قاتارلى شاڭىراعىمىز بار دەپ شاتتانىپ وتىر.
ءبىز بارعان كۇنى بىرنەشە ازامات وسى شاڭىراققا ات باسىن بۇرىپ, ازىق-ت ۇلىك, كىلەم, كىشكەنتاي بالالاردىڭ قىسقى كيىم-كەشەگىن اكەلىپ بەرىپ جاتىر ەكەن. كورشىسى جارىلعاسىن شادىروۆ ءوز ۇيىنەن سۋ تارتىپ بەرەمىن دەپ قۇلشىنىپ وتىر.
كاميلانىڭ ءتورت بالاسى مەكتەپكە بارعاننان كەيىن نەگىزگى مەكتەپتىڭ جابىلۋ قاۋپى سەيىلگەن. بۇرىن 38 وقۋشى بولسا, قازىر – 42. مەكتەپتە اسحانا تۇراقتى جۇمىس ىستەيدى. قۇستىڭ ۇياسىنداي جىپ-جىلى.
ءبىز تاراتا ايتىپ وتىرعان باعالى باستامانىڭ باسى-قاسىندا جۇرگەندەردىڭ ءبىرى نۇرلان قابدۋللين ناۋرىز ايىندا قىزىلوردادان ءتورت بالالى ءبىر وتباسىنىڭ كوشىپ كەلەتىنىن ايتىپ وتىر. باسقا اۋىلداردان دا كەلەمىن دەپ ىنتا بىلدىرگەن تابىلىپ جاتىر ەكەن. قازىر ءۇش بىردەي ءۇي دايىن تۇر. وبالىعا اعىلعان ەل قاراسى كوبەيسە, ورتا مەكتەپتىڭ قايتادان اشىلىپ قالۋى دا مۇمكىن. وسىنىڭ بارىنە دەم بەرىپ وتىرعان دۇنيە – اۋىلىن ويلاعان ازاماتتاردىڭ اۋىز بىرلىگى. بىرلىك بار جەردە تىرلىكتىڭ دە وڭىنان وڭعارىلاتىنىن وبالىنىڭ وڭدى ىسىنەن قاراپ بىلۋگە ابدەن بولادى.
اقمولا وبلىسى,
بۋراباي اۋدانى
