2022 جىلعا ارنالعان ءىس-قيمىل باعدارلاماسى اياسىندا ۇلتتىق ەكونوميكا مينيسترلىگى ۇسىناتىن شارالار حالىقتىڭ تابىسىن ارتتىرۋعا, شاعىن جانە ورتا بيزنەستى دامىتۋعا, جاڭا ينۆەستيتسيالىق ساياساتتى قالىپتاستىرۋعا, مەملەكەتتىڭ ەل ەكونوميكاسىنا قاتىسۋ ۇلەسىن قىسقارتۋعا, ماكروەكونوميكالىق تۇراقتىلىقتى قامتاماسىز ەتۋگە, مەملەكەتتىك باسقارۋ جۇيەسىن جاڭعىرتۋعا جانە تاريفتىك ساياساتتى جەتىلدىرۋگە باعىتتالعان.
اۋىل شارۋاشىلىعى مينيسترلىگى ۇسىنعان شارالار جاڭا الما باقتارىن وتىرعىزۋ, ەت ونىمدەرىن قايتا وڭدەۋ, قۇس ەتىن ءوندىرۋ, بالىق ءوسىرۋ, كارتوپ پەن كوكونىستەردى ساقتاۋ جونىندەگى ينۆەستيتسيالىق جوبالاردى ىسكە اسىرۋدى كوزدەيدى. اۋىل شارۋاشىلىعى تاۋار وندىرۋشىلەرىن جەڭىلدەتىلگەن نەسيە بەرۋمەن, كوكتەمگى ەگىس جۇمىستارىن جۇرگىزۋگە ارزانداتىلعان ديزەل وتىنىمەن قامتاماسىز ەتۋ, اوك سۋبەكتىلەرىن سۋبسيديالاۋ جۇيەسىن جەتىلدىرۋ, ۆەتەريناريالىق جۇيەنى رەفورمالاۋ جوسپارلانىپ وتىر. وندىرىسكە قازىرگى زامانعى رەسۋرس ۇنەمدەۋشى تەحنولوگيالاردى ەنگىزۋ, تۇقىم شارۋاشىلىعىن جانە جەمشوپ ءوندىرىسىن دامىتۋ جونىندە شارالار قابىلداناتىن بولادى.
ەكولوگيا, گەولوگيا جانە تابيعي رەسۋرستار مينيسترلىگى قورشاعان ورتاعا لاستاۋىش زاتتار شىعارىندىلارىن ازايتۋ, ب ۇلىنگەن جەرلەردى قالپىنا كەلتىرۋ, «تاريحي» لاستانۋلاردى جويۋ, قالدىقتاردى باسقارۋ جۇيەسىن جەتىلدىرۋ, كولدەردى قالپىنا كەلتىرۋ, سۋ ينفراقۇرىلىمىن تسيفرلاندىرۋ, بالىق سالاسىن دامىتۋ بويىنشا شارالاردى ۇسىندى. وعان قوسا, كادەگە جاراتۋ الىمىنىڭ ستاۆكالارى قايتا قارالاتىن بولادى.
توتەنشە جاعدايلار مينيسترلىگى ازاماتتىق قورعانىس اسكەري بولىمدەرىنىڭ ۇيىمدىق-شتاتتىق قۇرىلىمىن رەفورمالاۋ, ازاماتتىق قورعاۋ ورگاندارىنىڭ ماتەريالدىق-تەحنيكالىق جانە الەۋمەتتىك قامتاماسىز ەتىلۋىن نىعايتۋ جونىندە شارالار قابىلداۋدى جوسپارلاپ وتىر.
قورعانىس مينيسترلىگى قارۋلى كۇشتەردى رەفورمالاۋ جونىندەگى ءبىرىنشى كەزەكتەگى مىندەتتەردى ىسكە اسىرۋ جونىندە شارالار قابىلدايدى. اسكەرلەردىڭ جاۋىنگەرلىك ازىرلىگى مەن جاۋىنگەرلىك قابىلەتىن ارتتىرۋ ماقساتىندا جەكە قۇرامنىڭ سانىن ۇلعايتۋ, اسكەرلەردى قازىرگى زامانعى قارۋ-جاراقپەن جانە اسكەري تەحنيكامەن جاراقتاندىرۋ, قاجەتتى اسكەري ينفراقۇرىلىممەن جايلاستىرۋ جونىندەگى شارالار كوزدەلگەن.
