دانيلينا برازيليالىق بەاتريس حادداد مايامەن بىرگە جارتىلاي فينالدا جارىستىڭ 2-راكەتكالارى, جاپونيالىقتار سيۋكو اوياما – ەنا شيباحارامەن شەبەرلىك بايقاستى. اننا مەن بەاتريس جۋىردا عانا سيدنەيدەگى WTA تۋرنيرىندە بۇل قارسىلاستارىن تىزە بۇكتىرگەن بولاتىن. بۇل جولى ءبىرىنشى پارتيادا قازاقستاندىق-برازيليالىق جۇپ باسىم ءتۇستى – 6:4. ەكىنشىسىندە جاپونيالىقتار ەسە قايتاردى – 7:5. ءۇشىنشى, شەشۋشى سەتتە اننا مەن بەاتريس قايتادان تارازى باسىن وزدەرىنە اۋدارىپ, 6:4 ەسەبىمەن جەڭىسكە جەتتى. وسىلايشا, اننا دانيلينا ءوزىنىڭ سپورتتىق جولىندا العاش رەت «ۇلكەن دۋلىعا» ءتۋرنيرىنىڭ فينالىنا شىقتى. اننا مەن بەاتريس فينالدا دودانىڭ 1-راكەتكالارى, چەحيالىقتار باربورا كرەيچيكوۆا جانە كاتەرينا سينياكوۆامەن كەزدەسەدى.
سونىمەن قاتار وسى ءتۋرنيردىڭ جاسوسپىرىمدەر اراسىنداعى باسەكەسىندە ونەر كورسەتكەن وتانداسىمىز ارۋجان ساعىندىقوۆا جۇپتىق سىننىڭ جارتىلاي فينالىنا شىعا المادى. 17 جاستاعى ا.ساعىندىقوۆا رەسەيلىك ەكاتەرينا حايرۋتدينوۆامەن بىرگە شيرەك فينالدا كانادالىقتار كايلا كروسس – ۆيكتوريا مبوكومەن كەزدەسىپ, 2:6, 2:6 ەسەبىمەن قارسىلاستارىنا جول بەردى.
