ايماقتار • 26 قاڭتار، 2022

الماتى وبلىسىندا پوليتسيا قىزمەتكەرى قاماۋعا الىندى

110 رەت كورسەتىلدى

الماتى وبلىسىندا جول اپاتىن جاساعان پوليتسيا قىزمەتكەرى قاماۋعا الىندى، دەپ حابارلايدى Egemen.kz.

جول-كولىك وقيعاسى سالدارىنان 20 جاستاعى جولاۋشى اۋرۋحانادا كوز جۇمدى.

وبلىستىق پوليتسيا دەپارتامەنتىنىڭ ءباسپاسوز قىزمەتى ءمالىم ەتكەندەي، وقيعا 23 قاڭتار كۇنى الماتى-تالعار جولىنىڭ 12-ءشى شاقىرىمىندا ورىن الدى.

«تويوتا پرادو» جانە «حوندا ستريم» ماركالى اۆتوكولىكتەردىڭ اپاتى بويىنشا قر قك 345 بابىنىڭ 3 بولىگى جانە قىلمىستىق كودەكستىڭ 347 بابىنا سايكەس ءىس قوزعالىپ، تەرگەۋ جۇرگىزىلۋدە.

وقيعا سالدارىنان «حوندا ستريم» كولىگىنىڭ جۇرگىزۋشىسى جانە جولاۋشىسى ءتۇرلى دەنە جاراقاتىمەن الماتى قالاسىنداعى وبلىستىق اۋرۋحاناعا جەتكىزىلدى. بىرۆق 20 جاستاعى جولاۋشى اۋرۋحانادا كوز جۇمدى.

«تويوتا پرادو» كولىگىنىڭ جۇرگىزۋشىسى وقيعا ورنىنان قاشىپ كەتكەنى انىقتالدى. كوپ ۇزاماي پوليتسيا قىزمەتكەرلەرى كۇدىكتىنىڭ ورنالاسقان جەرىن انىقتاپ، قولعا ءتۇسىردى.

«تەكسەرىس بارىسىندا كولىكتى ىشكى ىستەر ورگانىندا قىزمەت اتقاراتىن ەر ادام جۇرگىزگەنى انىقتالدى. وبلىستىق پوليتسيا دەپارتامەنتى قىزمەتتىك تەكسەرىس جۇرگىزىپ، قىلمىسكەر 24  قاڭتار كۇنى جۇمىستان قۋىلدى. قازىر بارلىق ساراپتاما تاعايىندالىپ، تەرگەۋ جۇمىستارى ءجۇرىپ جاتىر»، دەپ تۇيىندەدى وبلىستىق پوليتسيا دەپارتامەنتىنىڭ ءباسپاسوز قىزمەتى.

سوڭعى جاڭالىقتار

ۇقساس جاڭالىقتار