«2022 جىلعى 25 قاڭتاردا ساعات 11:59-دا (نۇر-سۇلتان ۋاقىتى بويىنشا) ورتالىق ازيانىڭ ەنەرگيا جۇيەسىندەگى ەلەۋلى اۆاريالىق تەڭگەرىمسىزدىككە بايلانىستى «قازاقستاننىڭ سولتۇستىك-شىعىس-وڭتۇستىك» 500 كۆ ەلەكتر ەنەرگياسىنىڭ ترانزيتىنە قۋات ءتۇسىرىلدى. ناتيجەسىندە, قازاقستاننىڭ وڭتۇستىك ايماعى تۇتىنۋشىلارىنىڭ ەداۋىر بولىگىن اجىراتۋ ارقىلى «قازاقستاننىڭ سولتۇستىك-شىعىس-وڭتۇستىك» ءترانزيتىنىڭ اۆاريالىق ءبولىنۋى ورىن الدى. شەكتەۋلەر كولەمى 1500 مەگاۆاتتان استى» دەلىنگەن حابارلامادا.
اتاپ ايتقاندا, الماتى قالاسى مەن الماتى وبلىسىندا – 1000 مۆت, جامبىل وبلىسىندا – 300 مۆت, تۇركىستان وبلىسىندا – 500 مۆت جانە قىزىلوردا وبلىسىندا - 200 مۆت.
«جيىلىكتىڭ وتىرىپ قالۋى سالدارىنان (47 گتس-تەن تومەن) وزبەكستان, قىرعىزستان ەنەرگيا جۇيەلەرى تولىق ءوشىرىلدى. اۆتوماتيكا جۇمىسىمەن جامبىل گرەس, شىمكەنت جەو-3, قىزىلوردا جەو-6 جانە الماتى وبلىسىنىڭ ەلەكتر ستانتسيالارىنىڭ تولىق وشىرىلۋىنە جول بەرىلمەدى, اتالعان وبلىستاردىڭ تۇتىنۋشىلارى شامامەن 500 مۆت ەلەكترمەن جابدىقتالدى. اۆتوماتيكانىڭ ارەكەتىمەن الماتى ەنەرگيا تورابى شامامەن 700 مۆت ەلەكتر تۇتىنۋدى ساقتاي وتىرىپ, وقشاۋلانعان جۇمىسقا بولىنگەن», دەدى مينيسترلىكتەن.
حابارلامادا ايتىلعانداي بۇگىن ساعات 13: 39-دا ۇلتتىق ەلەكتر جەلىسىنىڭ الماتى ەنەرگيا تورابى تولىق قالپىنا كەلتىرىلدى. ياعني الماتى جانە الماتى وبلىسىنىڭ وڭىرلىك ەلەكتر جەلىلىك كومپانيالارى شەكتەۋلەردى الىپ تاستاۋدى جۇزەگە اسىردى. سونداي-اق, وڭتۇستىك وبلىستاردى ەلەكترمەن جابدىقتاۋدى قالپىنا كەلتىرۋ جۇمىستارى جالعاسۋدا.
