ىزدەنىمپاز ەكى دوس – ۆيكتور كوحنو مەن ماكسيم سۋرين ويلاپ تاپقان اۆتونومدى شلەمنىڭ كومەگىمەن قالادا وزدىگىنەن جانە قاۋىپسىز قوزعالۋعا بولادى. ولار بۇل قۇرىلعى وسىلايشا زاعيپ ادامداردىڭ كۇندەلىكتى ءومىرىن ايتارلىقتاي جەڭىلدەتەدى دەگەن قورىتىندىعا كەلدى.
– ءوزىڭىزدى قاراڭعىلىقتا ەلەستەتىپ كورىڭىزشى, ءسىزدىڭ العاشقى ارەكەتتەرىڭىز قانداي؟ ءسىز قاي جەردە ەكەنىڭىزدى ءتۇسىنۋ ءۇشىن دىبىستاردى تىڭداي باستايسىز. ءاربىر زاعيپ ادام سەنسورعا, دىبىستىق سيگنالدارعا, جەكە كومەكشىلەرگە جانە ەكراننان وقۋ قۇرالدارىنا تىكەلەي تاۋەلدى. قازاقستاندا عانا 160 مىڭ ادامنىڭ كورۋ قابىلەتى ناشار بولسا, ال الماتى وبلىسىنىڭ «زاعيپتار قوعامىندا» 1 500 ادام تىركەلگەن ەكەن. دەمەك, ءبىز بۇل ماسەلەنى شەشۋ ءۇشىن بارىمىزدى سالۋىمىز كەرەك. مىنا شلەم ولارعا ايتارلىقتاي كومەك بەرەدى, – دەيدى جوبانى ازىرلەۋشىنىڭ ءبىرى ۆيكتور كوحنو.
وقۋشىلار ۇسىنعان شلەمنىڭ قۇرىلىمى قاراپايىم ەكەن. باس كيىمدە قۋات تۇيمەسى, كەڭ ەكراندى كامەرا, بانك كارتاسىنىڭ كولەمىندەي ءبىر تاقتالى كومپيۋتەر جانە ەكى قۇلاققاپ بار. شلەم ارنايى باعدارلاما ارقىلى اۆتوموبيلدەردى, پويىزداردى, اۆتوبۋستاردى, باعدارشامداردى, جول بەلگىلەرىن, ۆەلوسيپەدشىلەردى جانە اينالاداعى ادامداردى انىقتاۋعا قابىلەتتى. باس كيىمدى قولدانعان زاعيپ جان باعدارلاما ارقىلى بەرىلگەن دىبىستىق حابارلامانى ءتۇسىنىپ, ساقتانادى. سونداي-اق ۆيكتور مەن ماكسيم شلەمنىڭ جۇمىسى قولجەتىمدى بولۋى ءۇشىن سمارتفونعا ورناتىلعان «بولاشاقتى كور!» ارنايى قوسىمشاسىن جاساپ شىعارىپتى. قازىر بۇل ءموبيلدى قولدانبادا گەولوكاتسيا, اۋا رايى, كومپاس, مۋزىكا, پودكاستتار, اۋديوكىتاپتار سياقتى فۋنكتسيالار جۇمىس ىستەيدى ەكەن.
تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىلارى ۆيكتور كوحنو مەن ماكسيم ءسۋريننىڭ اتالعان جوباسى حالىقارالىق Samsung بايقاۋىنا قاتىسىپ, جۇزدەگەن جۇمىستاردىڭ اراسىنان ۇزدىك وندىققا ەنىپ وتىر. كومپانيا جاس ىزدەنىمپازدارعا 450 مىڭ تەڭگەنىڭ سەرتيفيكاتىن تابىستادى.
الماتى وبلىسى
