باس دارىگەردىڭ ايتۋىنشا, شاقىرتۋ جيىلەپ كەتكەن سوڭ, مەديتسينا قىزمەتكەرلەرى دە ءجيى اۋىرىپ قالىپ جاتقان كورىنەدى. ماسەلەن, وبلىس تۇرعىندارى «103» قىزمەتىنە سوڭعى تاۋلىكتىڭ وزىندە 2 020 رەت قوڭىراۋ شالعان. دارىگەرلەر بريگاداسى 1 321 شاقىرتۋعا بارىپ, 600-دەن استام تۇرعىننىڭ سۋىق تيگىزىپ العانىن انىقتاعان.
– سوڭعى بەس كۇننىڭ ىشىندە جەدەل جاردەم شاقىرتۋلارى 30%-عا ءوسىپ كەتتى. ناۋقاستاردىڭ كوبى سۋىق ءتيىپ, دەنە قىزۋى كوتەرىلىپ جاتقاندار. الايدا بۇل جەردە جالپىحالىقتىق ۆاكتسينالاۋدىڭ ءوز ناتيجەسىن بەرىپ وتىرعانىن ايتا كەتۋ كەرەك. شاقىرتۋ كوبەيگەنىمەن, گوسپيتالعا جاتقانداردىڭ سانى 1 پايىزدان اسپايدى. بىلتىر پاتسيەنتتەرىمىزدىڭ 30 پايىزى اۋرۋحانا كەرەۋەتىنە جاتقىزىلعان ەدى. بيىل كوبى ءۇي جاعدايىنداعى ەم-دوم شارالارىمەن شەكتەلۋدە. وسى ورايدا, «103» قىزمەتىنە دەگەن سۇرانىستىڭ كۇرت وسكەنىن تاعى ەستەرىڭىزگە سالا كەتكىم كەلەدى. كەشىگىپ جاتساق, كەشىرىممەن قاراۋلارىڭىزدى سۇرايمىز. ءبىزدىڭ قىزمەتكەرلەرىمىزدىڭ دە ءبىرازى اۋىرىپ قالدى, سوندىقتان جەدەل جاردەمدى كۇتۋ ۋاقىتى دا ۇزارىپ وتىر, – دەدى باس دارىگەر.
جەڭىل-جەلپى سىرقاتتانىپ قالعان ادامداردىڭ دا جەدەل جاردەم قىزمەتىن شاقىرتىپ جاتقانىن ايتقان يرينا شتەيگەرۆالد تۇرعىنداردان ەنتىگۋ جانە تىنىس جولدارىنىڭ تارىلۋ بەلگىلەرى بولماسا, دەنە قىزۋىنىڭ كوتەرىلۋى مەن جەڭىل جوتەلگە بولا «103» قىزمەتىنە قوڭىراۋ شالۋدى ازايتۋدى سۇرادى.
قوستاناي وبلىسى
